Чи халкь сад авур межлис
Шукур хьурай Аллагь Тааладиз чи халкьдиз Ислам дин кьисмет авур. Исламди чун сад ийизва ва инсанрин арайра авай такlанвилер акъудзава. Иллаки мусурманар Рамазандин вацра сад жезва, вучиз лагьайтlа и вацра шейтlанар кутlунзава ва инсанриз хъсанвилер ийиз, пис амалрикай чеб хуьз регьят жезва. Аллагьди ﷻ зурба суваб гузвай хъсан амалрикай сад – им сивер хвейибуруз тlуьн гун (ифтlар тешкилун) я. Ифтlаррин кьадар ва абурун гурлувал йисалай-суз чи патара артух жезва. Чи халкьдин векилри чеб яшамиш жезвай вири чкайра ифтlарар тешкилзава. Гьа икl ифтlарар кьиле фенва Дагъустанда авай гзаф пай лезги хуьрера. Ифтlарар Дагъустандин ва Урусатдин шегьеррани кьиле фена.
Вири ифтlар-межлисрикай инал кхьиз жедач, амма виридалайни зурба, 18 000 кас кlватlай ифтlардикай чарасуз хабар гана кlанда. Ам 8-апрелдиз Махачкъалада эцигзавай Мугьаммад Пайгъамбардин ﷺ тlварцlихъ галай мискlинда тешкилнавай. Мярекатда чи халкьдин вири къатарикай инсанри иштиракна. Диндин векилар, къуллугъчияр ва лежбер инсанар вири къуьн-къуьне туна суфрайрихъ ацукьнавай.
Межлисдал Кьиблепатан Дагъустанда РД-дин Муфтиятдин векил Шамил Алиханов, Муфтиятдин диндиз эвер гунин хилен регьбер Гьусейн Гьажиев, милли сиясатдин ва диндин крарин министр Энрик Селимов, Стlал Сулейманан райондин имам Шамил Омаров, Мегьарамдхуьруьн райондин регьбер Фарид Агьмедов ва масабур рахана. Сегьнедал экъечlайбуру Халикьдиз муьтlуьгъ хьунин ва диндин чирвилер къачунин важиблувиликай, халкь сад хьунин ва ата-бубайрин рекьяй финин чарасузвиликай ахъайна. Гьакlни абуру чи халкьдиз ва вири мусурманриз хийир дуьаяр авуна. Рахунрин арайра гуьзел мавлидар-нашидар кlелна.
Мярекатдал атайбурун арада цlийи автомобиль «Лада-Гранта» ва умрадин вад путёвка чип вегьиналди къугъвана. Автомобиль Дербент райондин Араблинка хуьряй тир са мусурман вахаз акъатна.
Къуй Аллагьди ﷻ кьабулрай и межлис ва мусурманрин арада гьамиша садвал хьурай!
Чи мухбир
