Кьасумхуьрел диндин межлис

Кьасумхуьрел диндин межлис

И мукьвара Стlал Сулейманан райондин Кьасумхуьруьн юкьвал алай медениятдин Кlвале «Ас-Салам» газетдиз талукьарнавай гурлу межлис кьиле фена. Мярекатдиз неинки Стlал Сулейманан райондин хуьрерай, гьакl къунши районрайни мусурманар атанвай.

Къуръандин аятралди ачухай межлисдал сифте гаф лезги чlалал акъатзавай «Ас-Салам» газетдин редактор Гьасан Амахановаз гана. Ада Исламдин чирвилер михьи бинейрай къачунин важиблувиликай ва ягъалмиш инсанрин гафариз яб гунин хаталувиликай ахъайна.

Гуьгъуьнлай алим Мугьаммад Сулейманов рахана. Ада дуьньядин агъузвиликай ва эхиратдин винизвиликай насигьат авуна.

Адалай кьулухъ Стlал Сулейманан райондин имамрин председатель Шамил Омароваз гаф гана. Ада межлисдал атанвайбуруз виридаз чухсагъул лагьана ва лезги халкьдин тарихдикай ахъайна. Гьакlни Омаров Шамила виридаз Аллагьдин ﷻ вилик квай ибадатдин буржар вахкунихъ ва сада-садахъ галаз хъсан алакъаяр хуьнихъ эвер гана.

Мярекат эвелдилай эхирдалди Дагъустандин Огни шегьерда РД-дин Муфтиятдин диндиз эвер гунин хилен регьбер Аливердиев Абубакра кьиле тухвана.

Насигьатрин арайра мярекатдал Заур Салигьова мавлидар-нашидар кlелна.

Гьакlни сегьнедал Умар асгьабди Ислам дин кьабулай къайдадикай рикlиз эсердай тамашадин перде (сценка) къалурна.

Мярекатдал кlватl хьанвайбурун арада гзаф кьадар савкьватар къугъун патал чип вегьена. Абурукай виридалайни багьабур умрадал (гъвечl гьаж) финин кьве путёвка тир.

Эхирдайни инал атанвайбуру вирида санал дуьньядин мусурманриз хушбахтвал ва саламатвал тlалабна.

Къуй Аллагьди ﷻ кьабулрай!