Лезги халкьдин мавлид

Лезги халкьдин мавлид

8-сентябрдиз Махачкъалада эцигзавай Мугьаммад Пайгъамбардин ﷺ тlварцlихъ галай мискlинда Рабиу-ль-Авваль вацраз талукьарнавай мавлид-межлис кьиле фена.

Мярекатда иштирак авун патал иниз Аллагь ﷻ ва Пайгъамбар ﷺ кlани, лезги халкь сад хьана кlанзавай цlуд агъзур кьван кас атана.

Межлис Стlал-Сулейманан райондин имамрин Советдин председатель Омаров Шамила ачухна ва ам кьиле тухвана. «Къе инал Стlал Сулейман рахада», - лагьана имамди. Гьа икl ада рахунрин арайра лезги халкьдин бажарагълу шаир Стlал Сулеймана кхьенвай диндин шиирар кlелна (абур чна и газетдин 11-чиниз акъудна).

Ярагъ Мугьаммад эфендидин неве Абдулмежид Гьамидова Къуръандин аятар кlелуналди гатlумай межлисдал сифте гаф Кьиблепатан Дагъустанда РД-дин Муфтиятдин векил Раджабов Мугьаммадаз гана.

Адалай кьулухъ РД-дин Правительстводин Председателдин заместитель, чилерин ва эменнидин алакъайрин министр Эминов Заур рахана.

Гуьгъуьнлай милли сиясатдин ва динрин кlвалахрин министр Селимов Энриказ гаф гана.

Гьакlни инал Мегьарамдхуьруьн райондин регьбер Ахмедов Фарид, Стlал-Сулейманан райондин Кьасумхуьруьн имам Рагьманов Шамил, шариатдин илимрин духтур (алим) Мегьамедов Мугьаммад, ДГУ-дин профессор, тарихдин рекьяй духтур Закарияев Замир ва масабур рахана.

Абуру диндин межлисрин важиблувиликай, халкь сад хьуникай, къилихар хъсанар авунин фазилатлувиликай, Мугьаммад Пайгъамбардин ﷺ уьмуьрдикай, капl авунин важиблувиликай насигьатар, рахунар авуна.

Рахунрин арайра Заур Салигьова ва «Хайрат» дестеди нашидар-мавлидар кlелна.

Межлисдал атайбурун арада умрадал (гъвечlи гьаж) фидай 5 путёвка ва Лада Гранта автомобиль акъатун патал чип вегьена. Автомобиль Кьурагьай тир са жегьил гададиз кьисмет хьана.

Эхирдайни кlватl хьанвайбуру вирида санал чи халкь ва вири мусурманар патал Аллагьдивай ﷻ хушбахтвал тlалабна!

Къуй Аллагьди кьабулрай!