Кьасумхуьрел мавлид-межлис
И мукьвара СтIал-Сулейманан райондин Кьасумхуьруьн юкьван жуьмя мискIинда Мугьаммад Пайгъамбар хайи Рабиуль-Авваль вацраз талукьарнвай пак межлис кьиле фена. Иниз чпин рикIера Пайгъамбардихъ кIеви муьгьуьббат авай, жемятдалди санал Аллагьдиз ялвар ийиз кIандай мусурман итимар ва дишегьлияр атана. Къуръандин аятралди ачухай и мярекат СтIал-Сулейманан райондин имамрин Советдин председатель Амаханов Гьасана кьиле тухвана. Сад лагьай гаф инал районда муьгьтежбуруз куьмек гунин карда еке зегьмет чIугвазвай «Инсан» фондунин регьбер Яралиев Эльмараз гана. Ахпа Курхуьруьн имам ва районда «Ас-Салам» газетдин векил Баталов Шамил рахана.
Гуьгъуьнлай Герейханован тIварцIихъ галай 1-отд. хуьруьн имам Эминов Арифаз гаф гана. Абуру инсанриз куьмек гуникай, Пайгъамбардин къилихдикай, диндин чирвилерин важиблувиликай, стхавиликай насигьатар авуна. ГьакIни мярекатда СтIал-Сулейманан райондин кьил АбдулмутIалибов Наримана иштиракна. Ада кIватI хьанвайбуруз межлис мубаракна, имамрин насигьатрин важиблувал къейдна ва абур себеб хьана гележегда халкь хъсан патахъ дегиш жедайдак умуд кутуна. Рахунрин арайра Вини СтIалрин имам Гьамидов Ислама иер нашидар кIелна. Къуй Аллагьди кьабулрай ва и межлисдин берекат вири Дагъустандиз раиж авурай!
Штула мавлид-межлис
Кьурагь райондин Штулрин хуьре берекатлу мавлид кьиле фена. Хуьруьн мискIинда тешкилнавай и мярекат Рабиуль-Авваль вацраз талукьарнавай. Инал хуьруьн агьалияр ва гьакIни райондин маса хуьрерай мугьман хьайи мусурманар кIватI хьана. Мярекат ачухай КIийирин имам Бугъаев Рамазана диндин межлисрин къиметлувиликай ахъайна. Гуьгъуьнлай Кьурагьрин имамдин куьмекчи Омаров Рамазана Мугьаммад Пайгъамбар кIан хьуникай ва ада къалурай рекьяй финикай насигьат авуна. ГьакIни инал Штулрин имам Керамов Умара хъсан хъилихдин фазилатлувиликай вяз гана. Рахунрин арайра кIватI хьайибуру гуьзел мавлидар, нашидар кIелна. Къуй Аллагьди кьабулрай ва ихьтин межлисар себеб хьана вири мусурманар чпин рикIера авай хъсан мурадрив агакьрай!
