Ша фин Меккадиз!
Ша фин Меккадиз!
Адетдин яшайишда, дуьньядин крарин гъиляй бязи вахтара чаз гьатта са декьикьа азад вахт авач рикIин сидкьидай Халикьдихъ ﷻ элкъведайвал ва и кар себеб яз гьамиша гьиниз ятIани тади ийизва, хъел къвезва, бязи вахтара умуд атIузва ва жуваз гуж гузвай гьалда жезва, ва гьар юкъуз умуд кутазва аламатдин кар жеда лугьуз, са цIийи затI хьунал вил жезва, хъсан хьуник умуд кутазва.
Амма, адет яз, пакадин юкъуз кьетIен са затIни жезвач ва гьар юкъуз гьа са жуьреда уьмуьр давам жезва: кIвалах – кIвал, кIвал – кIвалах… «КIвалахар гьикI ава, вуч цIийивилер ава?» - лагьана хабар кьурлани, гьихьтин жаваб гудатIа чизвач.
Чакай гьар са кас са вахтунда гъавурда акьазва вири крарикай галат хьанвайди, къуватар бес тежезвайди; къайгъуяр ва кат-калтугунар акъвазарна гьакI ял ягъиз кIан жезва: чун и дуьньядиз атунин себеб тир – Аллагьдиз ﷻ ибадат авуникай ягъалмишарзавай кIвалахдикай, месэлайрикай ва амай вири шейэрикай фикир тийидайвал.
Ихьтин гьалдай экъечIдай лап хъсан рехъ – умрадиз фин я.
Адет яз зияратдин программадик нурлу Мединада – чи кIани Мугьаммад Пайгъамбардин ﷺ шегьерда – хьун ва гьуьрметлу Меккада гъвечIи гьаждин шартIар кьиле тухун ква.
Медина ва Мекка – Исламдин чIехи пак тир чкаяр я, гьакI абурун тIвар кьурла рикI секин жезва. Аниз фин вири мусурманрин мурад я.
Къуръандай ва Пайгъамбардин ﷺ михьи Суннадай гьаждинни умрадин къиметлувал ва еке метлеблувал виридаз чизва.
Умради чаз чи вири месэлаяр гьялдай ва четинвилерикай азад ийидай Раббидивай ﷻ тIалабдай мумкинвал гузва. Чун пак чилерал фенмазди чаз цIийи ажайиб гуьзел ва бахтавар дуьнья ачух жезва, ва чаз четин аквазвай, чун гужа твазвай вири шейэр гьакIан гъвечIи, метлеб тIимил авай куьлуь-шуьлуьяр хьиз аквазва.
Умради чаз чи уьмуьрдиз са патахъай килигдай, цIийи кьилелай фикир хъийидай, жуван гъалатIар ва ягъалмишвилер аквадай ва арадал атанвай гьалдилай вине жедай мумкинвал гузва. Аннамишиз башламишзава ва гъавурда акьазва, умрадиз фидалди чна чи уьмуьр гьикI метлебсузвилелди канатIа.
Гьавиляй вич жагъуриз кIанзавай, уьмуьр хъсан патахъ дегишариз кIанзавай гьар садаз ам чарасуз я.
Пак чилел сифте кам къачунмазди инсан тамам секинвал авай, лугьуз тежедай хьтин берекатлу гьалдиз, руьгьдин цIийи алемдиз гьахьзава. МасакIа хьунни мумкин туш, вучиз лагьайтIа а чилел Аллагьдин ﷻ Илчи, чи кIани Мугьаммад Пайгъамбар ﷺ ва маса пайгъамбарар къекъвена.
Ахпа гъавурда гьатзава хьи, а гьал – чун гьамиша къазанмишиз алахънавай дуьньядин бахт я.
Мекка ва Медина берекатди кьунва, ана инсанрикай виридалайни хъсанди – Мугьаммад Пайгъамбар ﷺ, пак Кябе ва Исламдин чIехи тарих ава.
Гьахьняй, Халикьдик ﷻ умуд кутуна, квез мус рухсат (отпуск) аватIа килиг ва умрадиз физ гьазурвал ая. Шукур хьуй Аллагьдиз ﷻ, и кар чи уьлкведа пешекарвилелди тешкилнава.
Къуй Аллагьди ﷻ чаз виридаз гьаждизни умрадиз эверрай.
