Игьтиятвал тийиз хъсанвал ая
Къе, чи играмибур, заз квез са, мумкин я, са низ ятIани шит хьанвай, кьиса ахъайиз кIанзава. Ам заз и мукьвара зи са дустуни ахъайна. Зи фикирдалди, адай къачуз жедай насигьат гьамиша важиблуди жеда.
Идакай ихтилат арадал атун хатадин кар туш – чна гьар са кас гьатун мумкин тир дуьшуьшар веревирд ийизвай. Гьа чIавуз и кьиса дуьздал акъатна.
Им чIехи шегьерда хьайи кар я. Гзаф галат хьанвай Марат кIвалахдилай кIвализ хквезвай. Адан кIвалах лагьайтIа, регьятбурукай тушир – ада недай затIар авай гзаф чIехи трейлерра авай пар ичIирзавай. Адалайни гъейри, вич кIвалахал кьунвай касдин куьмекдалди ада кIвал са шумуд сеферда муьгьлетдалди къимет вахкуз маса къачуниз (рассрочка) килигна, ада гьеле са кьадар маса тапшуругъарни тамамарун лазим жезвай.
Амма Марата вичин уьмуьрдилай арзаяр ийизвачир, чIехида виликамаз вичин мажибдин гьисабдай кIвалин пул гана вичиз куьмек гана лугьуз, ам гзаф рази тир. Вучиз лагьайтIа гьа икI ам вичиз виридалайни тIимил кIанзавай кар авуниз – кредит къачуниз – мажбур хьанач.
Рекьел экъечIайла, Марат пис авариядин шагьид хьана. Галатунизни килиг тавуна, адавай гьакI элячIна физ хьанач ва, куьмек герек ятIа лагьана, ам машиндай экъечIзава. Зиян хьанвайди жегьил дишегьли тир, ам михьиз ивидай хьанвай, адан гъилерал аялни алай – ада тади куьмекдал (скорая помощь) вил алаз акъваз тавуна, азарханадиз тухун тIалабзавай. Марата гьич фикирни тавуна абур машинда ацукьарзава ва виридалайни мукьвал алай азарханадиз зарбдиз физва. Гуьгъуьнлай ачух жезвайвал, эгер абур са зур сятинин геж хьанайтIа, руш къутармишиз жедачир. Авай са аял къутармиш хьунай Аллагьдиз ﷻ кьадар авачир кьван шукур ийиз, дишегьлиди Маратаз чухсагъул лугьузва. Адаз лагьайтIа, авариядик акатай дишегьли адан чIехидан хайи вах тирди ахпа чир жезва. Ада, вичин нубатда, хьайи кардикай хабар хьайила, чухсагъул лугьунин лишан яз неинки вичин гъилик кIвалахзавайдаз буржунин амай пай багъишзава, гьакIни ада ам парар ягъунин хилен чIехидан къуллугъдал эцигзава.
«Килиг садра, Маратаз вичин хъсан рикIиз килигна бахтуни гьикI гъанатIа!» - нетижа кьазва дустуни.
Гьелбетда, ам гьакI я ва и агьвалатди гзаф затIар чирзава. А вахтунда рекьел алай гзафбуру авурди хьиз, адавай машин акъвазар тавуна, куьмек теклиф тавуна гьакI элячIна физ хьанач.
Амма и агьвалатда мад са игит ава – директор. Адаз чизвайни кьван, вичи куьмек гайи касди са мус ятIани, вичиз авай са хтул къутармишдайди? Гьелбетда, ваъ. Адаз Маратан гьакъисагъвал ва намуслувал акуна, хъсандиз кIвалахзавай жегьил гададиз гьакI куьмек гана. Амма, рази хьухь, чи девирда ахьтин рикIин чIехивал тIимил ксарилай алакьда. Гьа ида ахлакь авай инсан тафаватлу ийизва – са затIунани вил авачиз хъсанвал авун. Чи кьве игитни гьахьтин инсанар хьана. Чун чалишмиш хьана кIанзавайди гьа им я – хъсанвал са затI паталди ваъ, са куьнизни килиг тавуна авун, Аллагь ﷻ паталди. Хъсанвал лагьайтIа, гьамиша элкъвена хквезвайди я, ида шак авач.
Ша чнани, чи играмибур, и четин вахтунда сада-садаз жувавай жедай куьмек гун, неинки виридалайни мукьвабуруз, амма бязи вахтара гьич тийижир инсанризни.
Квез ислягьвал ва хъсанвал хьурай, чи газет кIелзавай виридалайни багьабур!
