«Ватанпересар хьухь»
«…Исятда гьатта гадайривай ва рушаривай (гьатта аялривай) мискIиндиз физ жезва – Аллагьди ﷻ гьахьтин мумкинвал ганва. Мектебда кIелунивай къакъат тавуна, абурувай Исламдин илимра генани вилик физ жеда. Идай, гьелбетда, Аллагьдиз ﷻ шукур авун лазим я.
Кьвед лагьайди, квез заз фикир гуз кIанзаватIа – им Аллагьди ﷻ а диде-бубайрин кьиле чпин аялар мискIиндиз ракъурдай фикир туна, са тIимил кьванни диндикай чирвал жедайвал. Нагагь Аллагьди ﷻ диде-бубайриз ахьтин фикирар таганайтIа, аялар чеб мискIиндиз фидачир.
Пуд лагьайдини: гьатта диде-бубайриз ахьтин фикирар атанатIани ва абуру чпин аялар мискIинриз ракъурзавайтIани, вири аялри диде-бубайриз яб гузвач хьи – акI хьайила, Аллагьди ﷻ квез яб гудай, хъсан аялар гана, Исламдихъ, диндихъ кIанивал авай.
Эгер генани яргъаз килигайтIа, мискIинра йисалай-суз чун патал къвердавай хъсан шартIар арадал гъизва, чун желбдайвал, гьа яшда авайла чи аялрин диндихъ кIанивал мягькем жедайвал. Имамар гьакьван алахъуниз килигна, абуруз чухсагъул, ва Аллагьдизни ﷻ чна шукур авун лазим я.
Эгер генани гегьеншдиз килигайтIа – чун светский гьукуматда яшамиш жезва, амма, ятIани, ам чаз гьар жуьредалди шартIар туькIуьриз, хатасузвал таъмин ийиз алахъзава. Гьатта араб уьлквейра, зун инанмиш я, ихьтин куьмек авач.
Нагагь анализ авуртIа, араб уьлквейриз килигайтIа – абурукай гьим кIандатIани къачу, - ана иви, ана дяве ава. Аллагьди ﷻ и патахъайни чун, дагъустанвияр хвена, Дагъустан хвена.
Кьилди аялрихъ ва диде-бубайрихъ элкъвена лугьузва: за Аллагьдивай ﷻ тIалабзава, куьне, чIехи несилди, куь диде-бубаяр шадардайвал, аялри лагьайтIа – куьн шадардайвал. Аялар инсанризни, гьукуматдизни менфятлубур жедайвал, абур ватанпересар ва жуван диндин вафалу терефдарар жедайвал».
