Дажалан фитнедикай жув гьикl хуьда?
Дажалан фитнедикай жув гьикl хуьда?
1. Риб`и бин Хираша лагьана: «Са сеферда зун Абу Масуд аль-Ансаридихъ галаз санал Хузайфа бин аль-Яманидин патав фена ва Абу Масуда адавай тIалабна: «Ваз Аллагьдин Расулдивай ﷺ Дажалан патахъай вуч ван хьанатIа, заз ахъая».
Хузайфади лагьана: «Гьакъикъатда, Дажал атана акъатайла, адахъ галаз яд ва цIай жеда, ва инсанриз яд хьиз акур шей, гьакъикъатда кудай цIай жеда, амма абуруз цIай хьиз акур шей, гьакъикъатда къайи ва хъсан яд жеда, ва гьакьван чIавалди квекай амукьай касди къуй вичиз цIай хьиз акур чкадиз хкадаррай, вучиз лагьайтIа гьакъикъатда ам ширин ва хуш яд жеда». Ахпа Абу Масуда лагьана: «Зазни Пайгъамбардивай ﷺ икI ван хьанай» (Аль-Бухари, Муслим).
- Абдуллагь бин Амр бин аль-Аса агакьарайвал, Аллагьдин Расулди ﷺ лагьана: «Зи умматдин арада Дажал пайда жеда ва ана яхцIур йикъан къене амукьда, ва заз чидач, ам яхцIур югъ жедани, яхцIур варз жедани ва я яхцIур йис, ахпа Аллагь Таалади Марьяман хва Иса ракъурда, ам Дажалахъ къекъведа ва яна рекьида. Адалай кьулухъ инсанар ирид йисуз яшамиш жеда, а вахтунда абурун арада са душманвални жедач, ахпа Къудратлу ва ЧIехи Аллагьди аш-Шамдин патахъай къайи гар ракъурда ва Чилел рикIе хъсанвал ва я зерре кьванни иман авай са инсанни амукьдач, абур вири гару вичихъ галаз тухуда, ва гьатта квекай са кас дагъдин къенез гьахьайтIани, гарни аниз гьахьда, ам тухун патал. Ахпа Чилел анжах виридалайни пис инсанар амукьда, абур къушар хьиз кьезил жеда ва вагьши гьайванриз ухшар жеда (яни, абур къушар хьиз регьятдиз вири пис крарихъ тадиз фида ва вагьши гьайванар хьиз сад-садан гуьгъуьна гьатда), ва абуру я хъсанвал кьабулдач, я писвал айибдач. Ахпа абурун патав инсандин къаматда аваз шейтIан къведа ва абурувай хабар кьада: «Куьн заз муьтIуьгъ жедани?» Абуру жузада: «Вуна чаз вуч буйругъда?» Ада абуруз бутриз ибадат авун буйругъда ва абур и карда адаз муьтIуьгъ жеда. И кар себеб яз абуруз бул ризкьи жеда ва хъсан уьмуьрдикай лезет хкудда. Ахпа турбадай гьарайда (яни, Дувандин йикъан сад лагьай сеферда турбадай гьараюнин ван къведа, адалай кьулухъ вири чан алай затIар рекьида) ва и ван хьайи гьар са касди гардан акъажна ва агъуз авуна адаз яб гуда. И къаргъудин ван хьайи сад лагьай инсан – вичин девейриз яд гудай гьавиздин цлар кьарадай асунзавай кас жеда. Ам, амай вири инсанар хьиз, гзаф тажуб жеда, ахпа Аллагьди ﷻ чиг хьтин марф ракъурда ва инсанрин беденар чIехи жез башламишда (яни, сифте турбадай гьараяйдалай кьулухъ, инсанар нефес амачиз ярх хьайила, гзаф вахт фида ва абурун беденар ктIана руг жеда). Ахпа кьвед лагьай сеферда турбадай гьарайда ва инсанар и патаз, а патаз килигиз къарагъда. Адалай кьулухъ лугьуда: «Эй инсанар, алад куь Раббидин патав!» Ахпа лугьуда: «Абур акъвазара!» Адалай кьулухъ инсанривай хабар кьада (яни, абур чилел хьайи уьмуьрда квел машгъул тиртIа, адан патахъай суалар гуда). Ахпа малаикриз лугьуда: «ЦIуз ракъурдайбур акъуд!» Абуру хабар кьада: «Гьикьванбур?» Абуруз лугьуда: «Гьар са агъзурдикай кIуьд вишни къудкъанни цIекIуьд», - ва и Йикъа аялар рехи ийида, ва и Юкъуз занг кьецIил жеда (Им лагьай чIал я хьи, вири крарин гьакъикъат ачух жеда ва инсанрик зегьле ракъурдай кичIевал акатда. Баянра гьакIни лагьанва хьи, и гафарин мана ихьтинди хьун мумкин я: чIехи экуьни нур гуда ва инсанар саждадиз аватда. ГьакIни мумкин я ина фикирда авайди Аллагьдин къудрат ачух хьун я) (Муслим).
- Анаса агакьарайвал, Аллагьдин Расулди ﷺ лагьана: «Ахьтин хуьр авач, вичин чилел Дажала кIвач эциг тийидай, эгер Меккадин ва Мединадин чил гьисаб тавуртIа, вучиз лагьайтIа абуруз физвай гьар са рекьел а шегьерар хуьдай малаикрин жергеяр акъвазда. А вахтунда Дажал шуьрекат чкадал (солончак) эвичIда ва Медина пудра зурзада, ахпа Аллагьди анай гьар са кафир ва мунафикь акъудда» (Муслим).
- Анаса агакьарайвал, Аллагьдин Расулди ﷺ лагьана: «Дажалан гуьгъуьна аваз тайлясанар (Персиядин къацу плащ) алай Исфагьандай тир пудкъанни цIуд агъзур чувуд къведа» (Муслим).
- Умм Шарика агакьарайвал, адаз Аллагьдин Расулди ﷺ икI лугьуз ван хьана: «Инсанар Дажалахъай дагълариз катда» (Муслим).
- Имран бин Гьусайна лагьана: «Заз ван хьана Аллагьдин Расулди ﷺ икI лугьуз: «Адам халкь авурдалай кьулухъ и Сят алукьдалди Дажал пайда хьунилай еке (яни, адалай еке имтигьан, вичикай анжах тIимилбур къутармиш жедай) са карни жедач» (Муслим).
- Абу Саид аль-Худриди агакьарайвал, Пайгъамбарди ﷺ лагьана: «Дажал атайла, адан патав иман гъанвайбурукай са инсан фида. Ам Дажалан къаравулрал гьалтда ва абуру адавай хабар кьада: «Вун гьиниз физва?» Ада жаваб гуда: «Зун чи арада акъатнавайдан патав физва». Абуру адавай жузада: «Вун чи Раббидихъ инанмиш тушни кьван?» Ада лугьуда: «Чи Раббидикай ﷻ чин тийизвай ахьтин са затIни авач (яни, Аллагьдин ﷻ чIехи лишанар малум я, амма Дажалаз талукь яз лагьайтIа, адан акунри къалурзава хьи, ада тапарарзава). А чIавуз абуру лугьуда: «Ам яна йикь!», - амма абуру чпи-чпиз икI лугьуда: «Куь Раббиди Вич галачиз са кас хьайитIани рекьиз квез къадагъа авуначирни кьван?» Ахпа ам Дажалан патав тухуда. Ам акурла, и иман гъанвай инсанди гьарайда: «Эй инсанар, им Дажал я хьи, вичикай Аллагьдин Расулди ﷺ лагьай!» А вахтунда Дажалан буйругъдалди ам руфун кIаник кваз ярхарда ва ада лугьуда: «Яхъ ам ва адал хирер ая!» Адан далу ва руфун гзаф сеферра яда, ахпа Дажала хабар кьада: «Вун захъ инанмиш тушни мегер?» Ада лугьуда: «Вун Дажал я!» Адалай кьулухъ Дажалан буйругъдалди а кас кьилин кукIвалай башламишна кIвачерал мишердалди кьве патал атIуда. Ахпа Дажал адан жендекдин кьве паюнин арадай фида ва адаз лугьуда: «Къарагъ!», - ва ам къарагъда. Адалай гуьгъуьниз ада жузада: «Вун захъ инанмиш тушни кьван?» А касди лугьуда: «Заз анжах вун генани хъсан чир хьана! (Яни, и вири крари вун тапархъан тирди зун генани инанмишарзава!)» Ахпа ада лугьуда: «Эй инсанар, гьакъикъатда, залай кьулухъ ада са инсандизни ихьтин кар мад хъийидач!» А чIавуз Дажала ам тукIун патал кьада, амма Аллагьди ﷻ адан гардандин ва жинабдин кIарабдин арада авай бедендин паяр цуруниз элкъуьрда ва Дажалавай адаз са затIни ийиз жедач. А чIавуз Дажала ам гъилерни кIвачер кьуна гадарда. Инсанриз ада ам ЦIуз гадарайди хьиз жеда, амма анжах ам Женнетдиз гадарнаваз жеда!»
Аллагьдин Расулди ﷺ лагьана: «А инсан алемрин Раббидин ﷻ вилик вири инсанрикай лап чIехи шагьид жеда» (Муслим. Аль-Бухариди и гьадисдин са пай гъизва).
- Аль-Мугъира бин Шу`бади лагьана: «Садани Аллагьдин Расулдивай ﷺ залай гзаф Дажалакай хабар кьадачир ва, гьакъикъатда, ада заз лагьана: «Ви рикIик куь секинсузвал кутазва?» За лагьана: «Абуру лугьузва хьи, адахъ галаз сагъ са дагъ фу ва сагъ са вацI яд жеда». Пайгъамбарди ﷺ лагьана: «Ам Аллагьдиз ﷻ гьадалай регьят жеда!» (Яни, Аллагьдиз ﷻ важиблубур инсанриз аквадай Дажалан къудратдин акунар ваъ, абурукай гзафбур адан гафар дуьзбур тирдахъ инанмиш хьун жеда) (Аль-Бухари, Муслим).
- Ибн Умара лагьана: «Са сеферда инсанрин арада Дажалакай рахай Аллагьдин Расулди ﷺ лагьана: «Гьакъикъатда, Аллагь ﷻ патахъди туш, Дажалан лагьайтIа, эрчIи вил патахъди я ва адан вил экъис хьайи ципицIдин са твар хьиз аквада» (Аль-Бухари, Муслим).
- Абу Гьурайради агакьарайвал, Аллагьдин Расулди ﷺ лагьана: «А Сят алукьдач, та мусурманри чувудрихъ галаз дяве ийидалди, а чIавуз чувудар къванерихъ ва тарарихъ чуьнуьх жеда ва къванерини тарари лугьуда: «Эй мусурман, ингье зи кьулухъ чувуд гала, ша ва ам яна йикь!» Ихьтин гафар гьар са тарци лугьуда, анжах гаркад (цацар алай кул-кусдин са жуьре) квачиз, вучиз лагьайтIа гаркад чувудрин тарарик акатзава» (Аль-Бухари, Муслим).
- Абу Гьурайради лагьана: «Аллагьдин Расулди ﷺ лагьана: «За кьин кьазва Адалди, Нин ихтиярда зи руьгь аватIа, и дуьнья куьтягь жедач акьван чIавалди, та сурун патавай физвай инсан икI гьарайиз, адалай авахьиз башламишдалди: «ТекIени зун и сура авайдан чкадал хьанайтIа!» АкI лугьунин себебни дин жедач, абур анжах и дуьньядин бедбахтвилер жеда» (Аль-Бухари, Муслим).
- Абу Гьурайради агакьарайвал, Аллагьдин Расулди ﷺ лагьана: «А сят алукьдач, та Евфратди къизилдин сагъ са дагъ ачухдалди. Ам патал инсанри сада-садахъ галаз дяве ийида ва гьар са вишекай кьудкъанни цIекIуьд кас рекьида ва абурукай гьар сада лугьуда: «Белки, гьа къутармиш жедайди зун жен».
И гьадисдин маса жуьреда агакьарзавайвал, Пайгъамбарди ﷺ лагьана: «Мукьвара Евфратди къизилдин хазина ачухда, амма а вахтунда яшамиш жедай касди къуй адакай са затIни къачун тавурай» (Аль-Бухари, Муслим).
