Мягькем иман
Са юкъуз Гьасан аль-Басридин кьилив са дишегьли атана. «Я алим кас, диндин михьивал, адан гевгьер, къуват ва хазина гьи шейэр я?», - жузуна ада. Гьасан аль-Басриди адаз лагьана: «Жува лагь, чазни чир хьурай».
А дишегьлиди вичи-вичин суалриз жавабар хгана: «Диндин михьивал дастамаз я, диндин гевгьер – Аллагь Тааладихъай кичIевал, диндин къуват – капI, диндин хазина – чирвилер. Аллагьдихъай ﷻ кичIе тушир касдихъ диндин гевгьер авач. Исламдин чирвилер авачирдахъ хазина авач». Гьасан аль-Басридиз а дишегьлидин гафар гзаф хуш хьана.
Гьар экуьнахъ яхцIур сеферда агъадихъ галай дуьа кIелзавай касдин иман мягькем жеда: «Я Гьаййу, я Къаййуму, я Заль-Жалали валь икрам, ля илягьа илляллагь».
ГьакIни лагьанва хьи, пуд карди иман зайифарзава: 1. Чирвилер авай касди абурал амал тавун; 2. Чирвилер авачиз амал авун (адахъ гзаф гъалатIар хьун мумкин я); 3. Вичиз чирвилер къачудай мумкинвал авай касди абур къачун тавун.
