КпIунихъ галаз алакъалу тир бязи къадагъаяр
КпIунихъ галаз алакъалу тир бязи къадагъаяр
- Абу Гьурайради агакьарайвал, Пайгъамбарди ﷺ лагьана: «Квекай имамдилай вилик кьил хкажзавайдаз кичIезвачни кьван, Аллагьди ﷻ адан кьил ламран кьилиз ва я адан винел патан акунар ламранбуруз элкъуьриз?!» (Аль-Бухари, Муслим).
- Абу Гьурайради лагьана: «Аллагьдин Расулди ﷺ къваларал гъилер эцигна капI авун къадагъа ийизвай» (Аль-Бухари, Муслим).
- Аишади лагьана: «Заз ван хьана Аллагьдин Расулди ﷺ икI лугьуз: «Инсанди са чIавузни капI авун лазим туш тIуьн вилик гъайила ва ам кпIунихъай чIехи ва я гъвечIи игьтияжвилер бегьемариз кIан хьуни элкъуьрдайла» (Муслим).
- Анас бин Малика лагьана: «Са сеферда Пайгъамбарди ﷺ кIевиз лагьана: «КапI ийидайла цавуз килигзавай инсанри квекай фикирзава?!» ИкI лугьудайла ада кIевивалзавай, ва лагьайдал ада ихьтин гафар алава хъувуна: «Абуру а кар акъвазарун лазим я, тахьайтIа гьикI хьайитIани абур вилерин ишигъдикай магьрум жеда!» (Аль-Бухари).
- Аишади лагьана: «Садра за Аллагьдин Расулдиз ﷺ инсанди капI ийидайла ам и патаз, а патаз килигунин патахъай суал гана ва ада лагьана: «Ам шейтIандин чуьнуьхун я, ада Аллагьдин ﷻ лукIран кпIуникай са затI чуьнуьхзава» (Аль-Бухари).
- Анаса лагьана: «Садра Аллагьдин Расулди ﷺ заз лагьана: «Са чIавузни капI ийидайла и патахъ, а патахъ элкъвемир, вучиз лагьайтIа ахьтин элкъуьнар телеф ийидайбур я, амма элкъуьн чарасуз хьайитIа, ам суннатдин кпIуна хьурай, ферз кпIуна ваъ» (Ат-Тирмизи).
- Абу Марсад Канназ бин аль-Гьусайна лагьана: «Чин сурарихъ элкъуьрна капI ийимир ва абурал ацукьни ийимир» (Муслим).
- Абу-ль-Жугьайм Абдуллагь бин аль-Гьарис бин ас-Симма аль-Ансариди агакьарайвал, Аллагьдин Расулди ﷺ лагьана: «Эгер капI ийизвайдан виликай физвайдаз ада вичел гьихьтин гунагь къачузватIа чизвайтIа, ам гъавурда акьадай хьи, адан виликай фидалди гьа чкадал яхцIур акъвазнайтIа, адаз хъсан тир!»
И гьадис агакьарайда лагьана: «Заз чидач, ада дуьз вуч лагьанайтIа: яхцIур югъ, яхцIур варз ва я яхцIур йис» (Аль-Бухари, Муслим).
- Абу Гьурайради агакьарайвал, Пайгъамбарди ﷺ лагьана: «КапI гатIумзавайдакай хабар гайила, ферз кпIунилай гъейри са капIни авун лазим туш» (Муслим).
Имам ан-Нававидин «Риязу-с-салигьин» ктабдай.
