Сив хуьнин сувар мубаракрай!
Дагъустандин Республикадин Муфтий, алимрин Советдин председатель шейх Агьмад эфендиди уьлкведин агьалийриз Сив хуьнин сувар мубаракна.
«Ассаламу алайкум ва рагьматуллагьи ва баракатугьу!
Гьуьрметлу стхаяр ва вахар! Квез Сив хуьнин сувар мубарак авуналди за Халикьдиз шукур ийизва, вучиз лагьайтIа Ада чаз мад сеферда Рамазандин вацрахъ галаз гуьруьш жедай ва а вацра жуьреба-жуьре ибадатар ийидай мумкинвал гана. Гила лагьайтIа, чна мусурманар сад ийизвай сувар – Ид аль-ФитIр (Сив хуьнин сувар) шаддиз къаршиламишзава. Мад за Аллагьдиз кьилди шукур гъизва чаз мискIинра таравигь кпIар тамамардай, санал кIватI хьана ифтIарар (сив хкудунин межлисар) ийидай ва садакьаяр пайдай мумкинвилер гунай.
И мумкинвилерай Халикьдиз сергьят авачир кьван шукур авун лап важиблу кар я, вучиз лагьайтIа алатай йисуз чун а кIвалахрикай бейхабардиз магьрум хьанвай.
Шукур гъайидалай кьулухъ за квез эвер гузва давамарун патал Рамазандин вацра авур хъсан амалар, мисал яз, Къуръан кIелун, жемятдин кпIар авун, мукьвабуруз куьмекар гун, садакьаяр паюн. Къуй Аллагьди чаз къуват ва сабур гурай пис амалар тадай! Суварин асул мана – им Аллагьдин диндал мягькем хьун я.
Гьисабиз тежер кьадар суваб анжах а мусурманриз жеда хьи, сивер хуьдайла, Аллагьдихъай (гунагьар туналди ва ферзер кьилиз акъудуналди) кичIе хьайи ва чпин нефсерин къизмиш гьевесриз акси яз женг чIугур. Къуръандиз ва Пайгъамбардин Суннадиз табий хьайи кас гьакъикъатда бахтлу жеда. Играми стхаярни вахар, за рикIин сидкьидай Халикьдивай чна хвейи сивер, гайи садакьаяр ва гьакI амай вири хъсан амалар кьабулун тIалабзава!
Къуй Аллагьди чаз са шумуд сеферда артухарна суваб гурай, гьакIни ибадатар ийидай ният авай, амма са гьихьтин ятIани себебар аваз, алакь тавур мусурманризни сувабар гурай!
Къуй Халикьди чаз виридаз Вичин регьим, сагъламвал ва кьве дуьньядинни хъсанвилер гурай! Амин».
