Къурбандин сувар мубаракрай!

Дагъустан Республикадин Муфтий, алимрин Советдин председатель Агьмад эфендиди уьлкведин мусурманриз Къурбандин сувар мубаракна.

Играми стхаяр ва вахар! Шукур хьуй Халикьдиз , чаз и йикъар аквадай ва мусурманрин виридалай чIехи Къурбандин сувар мукьва хьуниз шад жедай мумкинвал гайи!

Вири мусурманар патал важиблу йикъар регьимлувилихъ, масадан язух атунихъ, игьсанар гунихъ ва кьилинди – Аллагь Тааладиз кьадар авачир кьван муьтIуьгъ хьунихъ галаз алакъалу жезва, ва гьар са рикIи и сувар лап еке гьуьрметдивди кьабулзава. И йикъара дуьньядин вири мусурманри къурбандар гузва ва и карди жуван диндиз рикIин сидкьидай вафалу тирди лишанламишзава.

Къурбандин сувари мусурманар сад авуналди, абуруз неинки пак суварин тарих хуьнин ва адаз гьуьрмет авунин тербия гузва, гьакIни сада-садаз хъсанвал ва регьим ийиз чирзава. И юкъуз мусурманри къурбандар гузва, мубаракар ийизва ва сад-садан патав мугьмандиз физва, садакьаяр пайзава.

Маса крарилай гъейри, Къурбандин сувар – им гьаж (пак Меккадиз ва нурлу Мединадиз ийизвай зиярат) акьалтIарун лишанламишзавай суварни я. Гьайиф хьи, и йисуз коронавирусдин тIугъвал себеб яз, дуьньяда авай вири мусурманриз (Саудовский Аравиядин мусурманрилай гъейри) Исламдин вад лагьай дестек – гьаж – тамамардай мумкинвал хьанач.

За Аллагьдивай начагъбур сагъар хъувун ва чи вири халкьар и азардин писвиликай ва адан судурдикай хуьн тIалабзава. Адахъ галаз санал за Халикьдивай чи вири къурбандар ва садакьаяр кьабулун, вири гунагьрилай гъил къачун, чи рикIер ва фикирар михьи авун ва гьакIни чи вири хъсан крарин суваб артухарун тIалабзава.

Квез виридаз ислягьвал, сагъламвал ва Халикьдин регьим хьурай, азиз тир стхаяр ва вахар! Квез Къурбандин сувар мубаракрай!