Сив хуьнин сувар мабаракрай!
РД-дин Муфтий, шейх Агьмад Афандиди уьлкведин мусурманриз сив хуьнин шад сувар мубарак авуна.
«Ассаламу алайкум ва рагьматуллагьи ва баракатугьу!
Играми стхаяр ва вахар! За квез лап рикIин сидкьидай сив хуьнин сувар мубаракзава. ЧIехи сив хуьн акьалтIарун лишанламишзавай и шад югъ вири мусурманриз виридалайни важиблу ва пак тир йикъарикай сад я. Вири вацра вири дуьньядин мусурманри тIуьникай ва хъуникай чеб хуьз, муьтIуьгъвал, хъсан къилих ва регьимлувал къалурзавай, Аллагьдиз ﷻ шукур ийиз, хъсан крар ийизвай. И четин вахтунда квекай гзафбуру, чпин уьмуьрда авай четинвилеризни килиг тавуна, садакьаяр пайзавай, жуьреба-жуьре куьмекдин пулар кIватIдай мярекатра иштирак ийиз, пулар садакьа ийизвай. Къуй Аллагьди ﷻ гьар са хъсан кар, ам шумудни са сеферда артухарна, кьабулрай.
ГьакIни жуьреба-жуьре миллетрин ва динрин векилар, неинки Дагъустандин, гьакI вири уьлкведин гзаф чкайра, вири вацран къене санал сив хкудиз (ифтIар) ва сив кьаз (сугьур) кIватI жезвай. Ида гзаф шадарзава, вучиз лагьайтIа ихьтин мярекатар неинки стхавилин алакъаяр сад хьунин ва мягькемарунин себеб жезва, гьакI ватанпересвилин руьгь, жуван ватан ва садаз-сад кIан хьун цIийи хъийизва. Ихьтин межлисра диндикай ийизвай ихтилатри ва важиблу месэлаяр веревирд авуни гьар са касда руьгьдинни ахлакьдин ва яратмишунин къиметлу затIар арадал гъизва ва мягькемарзава.
Аллагьди ﷻ чаз мад и шад йикъар аквадай мумкинвал гунай за Адаз кьадар авачир кьван шукур ийизва. Адахъ галаз санал, за Халикьдивай ﷻ гуьгъуьнлай къвезвай йисарани чун и регьимдикай магьрум тавун тIалабзава. За Аллагьдивай ﷻ чи вири сивер, закат ва гьакIни вири хъсан крар кьабулун тIалабзава.
За Халикьдиз ﷻ минетзава чаз виридаз къуватар, сабур ва акьул гун ва авур крарал акъваз тавуна, муькуь варцара генани гзаф хъсан крар авун, сада-садаз куьмек гун, гъил къачун ва жувалай гъил къачун тIалабун, мукьвабурухъ ва маса инсанрихъ галаз ахьтин рафтарвал авун хьи, гьихьтин рафтарвал абуру вахъ галаз авуна ваз кIанзаватIа. За Мергьяматлудавай тIалабзава и бахтавар вацран гьуьрметдай чи вири гунагьрилай гъил къачун, вири бедбахтвилерикай, фитнейрикай ва дявейрикай хуьн, исятда четин гьалда авайбуруз сабур ва дурумлувал багъишун. Квез ислягьвал ва Халикьдин ﷻ регьим хьурай, играми стхаяр ва вахар!»
