Азиз Рамазан варз мубаракрай!
Ассаламу алайкум ва рагьматуллагьи ва баракатугь! Играми стхаяр ва вахар!
Шукур хьуй Аллагьдиз, чаз Рамазандин варз багъишай – гунагьрилай гъил къачунин ва берекат ракъурунин варз.
Рамазан вири мусурманриз виридалайни важиблу ва гьуьрметлу варз я. Иман гъанвай гьар са касдин рикIе «Рамазан» гафуни виликамаз чIехи варз алукьунин – имтигьанрин, ибадатдин ва куьтягь тежедай сувабрин варз, чпин къимет анжах Мергьяматлу Аллагьдиз чизвай – шадвилин гьисс ва са гьихьтин ятIани ашкъи кутазва.
Шукур хьуй Аллагьдиз, йисалай-суз дерин иман аваз ва умунвилелди Рамазандин йикъар сивер хуьз, йифер ибадат ийиз акъудзавай мусурманрин кьадар артух хьунай. Амма сагъ са вацра сив хуьз тежез кичIевиляй, гьич сив техуьзвайбурни амукьзава хьи. Абурун рикIел чарасуз Аллагьдин Расулдин ﷺ гьадис хкана кIанда: «Ни са юкъуз сив хвейитIа, Аллагь Таалади адан ва Жегьеннемдин цIун арада чилелай цавуз кьван мензил авай сенгер яратмишда» (атI-ТIабарани).
Квез чир хьухь хьи, сив хуьнин гьар са легьзедай квез Аллагьдин ﷻ патай ахьтин суваб атун мумкин я хьи, ам и дуьньяда са сувабдихъ галазни гекъигиз жедач. И вацра чун алахъна кIанда хъсан патахъ дегиш жез, сада-садаз хушвал ийидай фикир гуз, иллаки чи къайгъу чIугунихъ ва куьмекдихъ муьгьтежбуруз.
Аллагьдин Расулди ﷺ лагьана: «Ни Рамазан вацра Аллагьди ﷻ суваб гудайдахъ инанмиш яз ва умуд аваз сивер хвейитIа, адан виликдай хьайи гунагьрилай гъил къачуда» (аль-Бухари, Муслим).
За гзаф умуд кутазва, чун вири Аллагьди ﷻ виликдай хьайи гунагьрилай гъил къачудайбурук акатда ва чи сивер кьабулда лагьана.
За вири мусурманриз и пак варз алукьун мубаракзава ва рикIин сидкьидай кIанзава чна вирида ам лайихлувилелди ибадат ийиз акъуддайвал, ахъайна ракъурай са декьикьадин патахъайни гьайиф чIугван тийидайвал.
