Абу Бакран такъва (Аллагьдихъай кичIе хьун)

Чаз виридаз чизва хьи, Абу Бакр - пайгъамбаррилай алатайла виридалайни чIехи кас я. Аллагьдин Расулди адаз ам Женнетдиз фидай инсанрин дестедин кьиле жеда лагьай шад хабар гана.

Садра Аллагьдин Расулди лагьана: «Абу Бакран тIвар Женнетдин вири варарай кьада ва ам залай кьулухъ аниз гьахьдай сад лагьай кас жеда».

Вири и лайихлувилер аваз Абу Бакра лугьудай: «Заз зун атIудай тар хьанайтIа кIандай». Ара-бир ада лугьудай: «Заз закай са гьайванди недай хъач хьанайтIа кIандай». Ада гьакIни лугьудай: «Заз зун мусурмандин бедендал алай чIар хьанайтIа кIандай». Са сеферда ам багъдиз гьахьна ва адаз чIив-чIивар ийизвай нуькI акуна.

Ада дериндай нефес акъадарна ва лагьана: «Ваз гьикьван хъсан я, нуькI! Вуна незва, хъвазва, тарарин сериндикай лув гузва ва къвезмай уьмуьрда жедай са гьахъгьисабдихъайни кичIезвач. Заз ви чкадал хьанайтIа кIандай!» Рабиа аль-Аслямиди ахъайзава: «Садра зун Абу Бакрахъ галаз гьуьжетар хьана ва ада зи кефида акьадай са гаф лагьана ва ам заз бегенмиш хьанач. Ам гьасятда а кардин гъавурда акьуна ва лагьана: «Стха, за ваз тавакъу ийида, гьа гафуналди заз жаваб хце, ам залай гъил къачуниз себеб жедайвал».

За акI ийидач лагьана. Ада кIевивал ийизвай ва вири Аллагьдин Расулдиз ахъайда лугьуз гьатта кичIерарни гузвай. Амма адаз гьахьтин гаф лугьуз зун рази жезвачир. Ам къарагъна хъфена. Зи тайифадикай тир бязибуру лагьана: «Килиг садра! Им гьикьван ажайиб кар я! Инсанди ваз писвал ийизва ва артух яз Аллагьдин Расулдиз арза ийида лугьуз, кичIерарни гузва». За лагьана: «Квез ам вуж ятIа чидани?

Ам Абу Бакр я. Адаз хъел гъун – Аллагьдин Расулдиз хъел гъун лагьай чIал я, Аллагьдин Расулдиз хъел гъун – им Аллагьдиз хъел гъун лагьай чIал я! Эгер Аллагьдиз закай хъел атайтIа, Рабиа телеф хьуникай ни къутармишда?» Зун Аллагьдин Расулдин патав фена ва вири хьайивал ахъайна. Ада лагьана: «Вуна адаз жаваб яз а гаф лугьун тавуна дуьз кар авуна. Амма вуна адаз лугьун лазим я: «Аллагьди валай гъил къачурай, я Абу Бакр !»

Килиг садра, Абу Бакраз Аллагьдихъай I гьикьван гзаф кичIезвайтIа! Адаз и дуьньяда амаз вичин гунагьрилай гъил къачуна акьван кIанзавай хьи, ада маса касдиз хуш текъвер са гаф лагьана агакьдалди, ам гьасятда вичи лагьай гафунал пашман хьана ва вичизни гьа гаф лугьун патал тIалабиз хьана. Адаз хьайи кар гьатта Аллагьдин Расулдиз ахъайна вичин кар кьилиз акъудиз кIанзавай. Чаз лагьайтIа, са касдин намусдик хкIадайвал авун адетдин кар хьанва, амма гьа са вахтунда чаз я жазадихъай кичIезвач, я Дувандин юкъуз жедай гьахъгьисабдихъай.

«АСГЬАБРИН КЬИСАЯР» КТАБДАЙ.