Кефи хунилай гъил къачун
Чакай саки гьар садан уьмуьрда чи мукьвабурукай, дустарикай, санал кIвалахзавайбурукай бейкеф хьайи дуьшуьшар арадал атайди я. Нагагь а бейкефвилерикай вахтунда азад тахьайтIа, абур йисаралди кIватI жезва, рафтарвилер чIур хьунин себеб жезва, вилик финиз, жуван мурадар кьилиз акъатуниз ва гьар йикъакай лезет къачуниз манийвал ийизва. Бязи бейкефвилер лап аял чIавалай амукьзава ва вири уьмуьрдиз пис таъсир ийизва.
Мукьва ва яргъа инсанрикай бейкеф хьун – бахтлу ва иер кутугай уьмуьрдихъ тухузвай рекье бегьем манийвал хьун мумкин я. Абуру пис гьиссер кIватI хьунал, инсанрал ихтибар тагъун мягькем хьунал, кьилдивилин ва виридакай хкатунин гьиссер арадал атунал, стресс ва къалабулух хьунал, мукьвабурухъ галаз алакъаяр пис хьунал, гьатта сагъламвилихъ галаз алакъалу тир месэлаяр арадал атунал гъизва. Килигин, гьикI бейкефвилерилай гъил къачуз ва секиндиз яшамиш жез башламишиз жедатIа.
Бейкефвилерилай гъил къачун – им жув пис гьиссерин пардикай азад авун ва тамам уьмуьрдалди яшамиш жез башламишун лагьай чIал я. Им гьамиша регьят кар туш, амма мумкин кар я.
Бейкефвилерикай азад хьун патал камар
- Бейкеф хьанвайди хиве кьун
Сад лагьай кам – чун бейкеф хьанвайди хиве кьун я. Им четин хьун мумкин я, иллаки чна чи гьиссер яргъалди чуьнуьхзавайтIа. Амма бейкефвал хиве кьун – ам алудун патал важиблу кам я.
Жуваз суалар гуз алахъин: «Куь зун бейкефарна?», «За гьихьтин гьиссер синемишзава?». И суалриз гузвай жавабри жуван гьиссерин гъавурда хъсандиз акьаз ва гуьгъуьнин камуниз гьазур жез куьмек гуда.
- Веревирд авун ва гьал цIийи кьилелай фагьум хъувун
Чна чи бейкефвал хиве кьурдалай кьулухъ, а гьал веревирд ийиз алахъин. Фикир ийин, вучиз инсанди акI авунатIа. Мумкин я, адаз, чна гьисабдиз къачун тавур, вичин себебар ва багьнаяр авай.
Жув маса инсандин чкадал эцигиз алахъин. Ида чаз адан фикирдин гъавурда хъсандиз акьаз ва гьал маса патахъай акваз куьмек гуда.
Адалай гъейри, бязи вахтара бейкеф хьун а гьал дуьз кьабул тавунихъ галазни алакъалу хьун мумкин я. А гьалдин гъавурда акьурла, гила ам цIийи кьилелай фикир хъийиз алахъин.
Месела, эгер са касди вичи гайи гаф кьилиз акъуднач лугьуз чун бейкеф хьанватIа, гъавурда акьаз алахъин хьи, чаз чин тийизвай себебар хьун мумкин тирди. Ида чаз гьал маса жуьреда акваз ва бейкефвал багъишламишиз куьмек гун мумкин я.
- Гъил къачун
Гъил къачун – им гьамиша регьят туш, амма бейкефвилерикай азад хьун патал, чаз регьятвал гъидай, чарасуз кам я. Фикирда кьун лазим я хьи, гъил къачун – им рикIелай алудун ва я инсандин крар гьахълу авун лагьай чIал туш, амма им лагьай чIал я – жуван пис гьиссерилай гъил къачун ва жув абурун эсердикай азад авун.
Бязи вахтара чун масадакай ваъ, жувакай бейкеф жезва – къалмакъалдин вилик пад кьаз тахьайвиляй ва я жуван сергьятар хуьз тахьайвиляй. Аннамишун герек я хьи, вири крар гьамиша чаз кIандайвал жезвач, гьавиляй жувалай гъил къачуна кIанда. Гьа ихьтин жувалай гъил къачуни къенепатай гуж гун тIимилариз куьмек гуда.
- Гьиссерихъ галаз кIвалах
Бейкефвилерихъ галаз гзаф вахтара пис гьиссер жезва, месела, ажугъвал, рикI хун, сефилвал. И гьиссерихъ галаз кIвалах авуни бейкефвилелай гъил къачуз куьмек гун мумкин я.
Жуван гьиссер яратмишунра къалуриз алахъин – месела, шикилар ягъуна ва я кхьинар авуна. Ида чаз жуван гьиссерикай лугьуз ва абурукай азад жез куьмек гуда.
- Рази хьунин тежриба
Рази хьун – бейкефвилерихъ галаз женг чIугвадай зурба алат я. Чна чун разизвайдакай фикирдайла, чун пис фикиррилай масанихъ алатзава.
Гьар юкъуз чун чи уьмуьрда разизвай пуд шей кхьиз алахъин. Абур вуч хьайитIани хьун мумкин я – куьлуь-шуьлуьйрилай чIехи вакъиайрал кьван.
- Куьмекдихъ къекъуьн
Чна ихтибарзавай мукьва инсанривай куьмек тIалабиз кичIе хьана кIандач, я тахьайтIа пешекар психологривай – абуру чаз бейкефвилерихъ галаз кIвалахдай цIийи фикирар ва рекьер къалурун мумкин я.
- КьатIун, капI, релаксация
КьатIун – им гьа инал ва исятда жуван гьиссерал, алай вахтунал фикир желб ийиз ва ам гьихьтинди ятIа, гьахьтинди кьабулиз чаз куьмек гузвай тежриба я. И къайдади чаз бейкефвилерилай гъил къачуз ва алай вахтунда яшамиш жез куьмек гун мумкин я.
Релаксацияди, гьакIни кпIуни чи акьул секинариз ва пис фикирар алудиз куьмек гуда. Аллагьдивай ﷻ бейкефвилерал гуж акакьариз куьмек гунин тIалабун жаваб авачиз амукьдач. ГьакIни секин жедайвал куьмек гуда гьамиша къайдадалди ийизвай нефесдин упражненийрин тежрибади.
- ЦIийи таъсирар ва хобби
ЦIийи таъсирри ва машгъулатри чаз бейкефвиликай ийизвай фикирар масанихъ алудиз куьмек гуда. Чаз бегенмиш тир машгъулат жагъурзава ва адаз вахт чара ийизва.
Ам вуч хьайитIани хьун мумкин я: шикилар ягъун, хурун, спорт… Кьилинди – чаз шадвал ва разивал гъизвай кар жагъурун я.
- Жуван къайгъу чIугун
РикIел хкин, жуван къайгъу чIугун – им эгоизм туш, чарасузвал я. Жуван итижриз, хоббидиз, сагъламвилиз вахт чара ийин. Ида чаз чун хъсандиз гьиссиз ва бейкефвилерал гуж акакьариз куьмек гуда.
- Хъсандакай фикир авун
Гьар юкъуз жуван уьмуьрда са хъсан затI жагъуриз алахъин. Им са гъвечIи хъсан кар ва я агалкьун хьайитIани жеда. Хъсандакай фикирдайла, чавай пис гьиссери ийизвай эсер тIимилариз жеда.
- Жув кьабулунин тежриба
Хиве кьун герек я хьи, инсанар вири тамамбур туш ва гъалатIар авун мумкин я. Жув ва масабур гьихьтинбур ятIа, гьахьтинбур кьабулуни чаз чи умудрин ва истемишунрин дережа тIимилариз куьмек гуда, ада лагьайтIа, вичин нубатда, чи бейкефвилерин кьадар тIимиларун мумкин я.
- Жуваз къимет гунал кIвалах авун
Жуваз пис къимет гуни бейкефвилер кIватI хьуниз куьмек гуда. Жувахъ инанмиш хьунал кIвалахна кIанда!
