Хъсан тахьай пластика

Вахаз нерин татугай пластика авунва. Ам мукьвалмукьвал шехьзава, гьамиша кефияр чIурузва ва саки кIваляй экъечIзавач. ЦIийи операция мукьвара жедач. Адаз гьикI куьмек ийида?

Психологдин меслят:

И дуьшуьшда виридалайни важиблуди – къимет гудай ихьтин жуьредин «акI авун герек тушир», «ваз лагьайди тир: «Ийимир»», «масабуруз яб тагайла ингье вуч жезвайди ятIа» ва ихьтин маса фикирар талагьун я. Куьне неинки гьакI лагьана кIанзавач, гьакIни масабуру гьакI лугьуникай ам хвена кIанда. ГьакIни ада гьакI рикIик кьазва, месэла ада фикирзавай кьван четинди туш лагьана, исятда ам инанмишарун лазим туш.

Ашкара я кьван, руш вичин тамам туширвал фикирда кьуна, вичи-вичиз агъуз тир къимет гайивиляй ва вич-вичихъ инанмиш туширвиляй операция ийиз фенвайди.

И кар себеб яз, исятда адаз виридалайни важиблуди – адан мукьвабуру рикIин сидкьидай и карда иштиракун, руьгьдин жигьетдай адаз куьмек гун ва дуствилин гуьгьуьл кутун я.

Ам вичин месэлайрихъ галаз кьилди тамир, ахьтин кьетIен са затIни хьанвач лугьуз, мукьвалмукьвал адахъ галаз ихтилатар ая. Нагагь адаз вичин месэладин патахъай рахаз кIан хьайитIа, адаз гьакI яб це, вичин рикIе авайбур, фикирар лугьурай.

Адан нер иерди я, ада вири вичи-вичиз гьакI туькIуьрнавайди я лугьуз ам инанмишариз алахъмир. Кар ана ава хьи, месэла акьван нера авач, гьикьван адаз вичиз-вич нагьакьан акуна аватIа. Гзаф вахтара икIни жезва хьи, гьатта хъсандиз кьиле фейи операциядилай кьулухъни, вичи-вичиз гузвай къимет агъада авайди яз амукьзава.

Гьахьтин крар бязи вахтара а кар себеб яз жезва хьи, гзафбуруз чпин нерин кIалуб туькIуьр хъувурла, абур гьасятда чеб-чпихъ инанмишбур жедайди хьиз ва вири кIвалахар туькIуьдайди хьиз ава, амма гьакъикъатда лагьайтIа, са затIни дегиш жезвайди туш.

Къуй ада вич кIвале ацукьнавай вахтуникай менфят къачурай. Къуй ада маса инсанрихъ галаз алакъаяр тайинарун ва жув-жуван гъавурда акьаз чирдай ктабар кIелрай.

Алимдин жаваб:

Аллагь Таалади чи динда ихтияр ганвай вири крара чун патал хъсанвал ава ва Ада къадагъа авур вири крара чаз писвал ва зарар ава. Гьайиф хьи, эхиримжи вахтара чи «хийир кIандайбурун» меслятриз табий хьана, жуван нефсиниз ва иблисдин футфа гуниз муьтIуьгъ яз, бязи инсанри чеб гзаф рикIи чIугвадайвал ва генани иер жедайвал, Раббиди чпиз ганвайдал рази тахьана, пластикадин операцийрикай куьмек къачузва.

Къуръандин аятрикай садан баянда Аллагь Таалади лагьанва (мана): «Чна инсан виридалайни гуьзел къаматда аваз халкьнава» («Ат-Тин» сура, 4-аят).

Аллагьдин Расулди вичин гьадисда лугьузва: «Халикьди лянет авунва дишегьлияр, хамунал нехишар язавай (татуировка ийизвай), ни язаватIа ва нин бедендал язаватIа; ни рацIамар акъудзаватIа ва нин рацIамар акъудзаватIа; ни иер акун патал сарар атIузватIа ва Аллагьди халкьнавайди дегишарзаватIа!» (Аль-Бухари, Муслим).

Чаз аквазвайвал, Аллагь Таалади халкьнавай затIар дегишарун патал гьи жуьредин хьайитIани хирургиядин къаришмишвал хьун Аллагьди ва Адан Расулди къадагъа ийизва.

Адетдилай къерехдиз акъатзавай дуьшуьшар – ибур хизан арадал гъуниз (эвленмиш хьун ва я гъуьлуьз фин) манийвал авун мумкин тир нукьсанар я, гьакIни, эгер а карди адан сагъламвилиз зарар гуз хьайитIа. И дуьшуьшда хирургиядин къаришмишвилелди абур дуьзар хъувун абурун тIебиивал дегишаруниз хьиз ваъ, сагъар хъувуниз хьиз къимет гузва.

Сагъар хъувун патал ийизвай пластикадин операцияр динди ихтияр гузва. ГьакI, месела, лугьузва хьи, Афража тIвар алай асгьаб са женгина нерикай магьрум хьана ва Аллагьдин Расулди адаз къизилдикай нер ийидай ихтияр гана (Абу Давуд, Ат-Тирмизи).

Гьавиляй, эгер куьне нерал операция ам анжах хъсан акун патал авунватIа ва гьич са нукьсанни, рехнени квачиртIа, куьне чIехи гунагь авуна. Куьне туба авуна кIанда, Аллагь Тааладивай гъил къачун тIалабна кIанда ва мад гьа гунагь хъийидач лагьана кIеви ният авуна кIанда.

Эгер квез мад анжах иер акун патал операция хъийиз кIанзаватIа, гьа имани, винидихъ лагьайвал, къадагъа я. Нагагь операциядилай кьулухъ нукьсан ва я рехне амукьнаваз хьайитIа, операция хъувуртIа жеда, гьатта сифтедай иер акун патал авунвайтIани.

Играми вах, рикIел хуьх, гьакъикъи иервал – им руьгьдин иервал я, вучиз лагьайтIа Аллагь Таала чи винел патаз килигзавач, Ам чи рикIериз ва крариз килигзава. Гьавиляй дин чириз, адан вири истемишунар тамамариз башламиша – ва куьн и дуьньяда ва эхиратда бахтлу жеда.

АЛИАСГЬАБ МУРЗАЕВ, ПСИХОЛОГ МАГОМЕД МАГОМЕДОВ ИСЛАМДИН ИЛИМРИН ДОКТОР