Жемятдин кпlунилай кьулухъ зикирар кlелдай тегьер
Суал: Жемятдин кпIунилай кьулухъ кIеви ванцелди зикир-тасбигь кIелзава. Эхиримжи вахтара и кар лап кIевелей инкар ийизвай инсанар пайда хьанва. Шариатди и кардин гьакъиндай вуч лугьузва?
Жаваб: Саудовский Аравиядилай гъейри вири мусурман уьлквейра жемятдин кпIарилай кьулухъ имамдини муэдзинди кIевиз зикирар кIелзава. Имам Шафиидин мазгьабдалди, капI авур касдиз жува-жувак зикир-тасбигь авун меслят къалурнава. Жемятдин кпIунилай кьулухъ имамди зикир-тасбигь кIеви ванцелди кIелзава. И кардин себебни яб гузвайбуруз зикир-тасбигь хуралай чирун я. Азкарар виридаз хуралай чир хьайидалай кьулухъ абур ван хкаж тавуна жува-жувакди кIелун меслят къалурнава.
Къе Дагъустанда имам Шафиидин мазгьабдив кьурвал кпIунилай кьулухъ азкарарни кIелзава, тасбигьни ийизва. Азкаррин хуралай чириз четин пай ван алаз, амай пайни, месела, 10 сеферда «ВагьдагьуЛлагь», «Аль-Фатигьа» сура, аят «Аль-Курси», «Аль-Ихлас», «Ан-Нас», «Аль-Фалакъ» сураяр, 33 сеферда кIелзавай «СубгьанаЛлагь», «Аль-гьамду ли-Ллагь», «Аллагьу акбар», зикир-салават жува-жувак кIелзава.
Гьелбетда, кпIунилай кьулухъ жемятди вирида санал зикир-тасбигь кIелуни ахпа Аллагь Тааладихъ элкъвена дуьа авуни хуш гьейранвал арадал гъида. Эгер гьа икIни тавуртIа инсанриз азкарар ийиз гьикI чир жеда? Гьаниз килигна кпIунилай кьулухъ зикир-тасбигь авуниз акси экъечIзавай касдиз ягъалмишди ва я авам лугьуз жеда.
Имам Шафиидин мазгьабдин лап машгьур алимрикай сад тир Авзаиди тестикьарзавайвал, вири азкарарни тасбигьар гьатта кIеви ванцелди кIелунни меслят къалурнава, вучиз лагьайтIа Пайгъамбардин ﷺ имидин хва Ибн Аббаса лагьанва: «Пайгъамбардал ﷺ чан аламайла кпIунилай кьулухъ азкарарни тасбигьар ван алаз кIелдай» (имам Бухаридини имам Муслима гъизва. «Аль-бид’ату фи-ль-мафгьуми-ль-исламиййи-ль-гьакъикъ» ктабдин 67-чиниз килиг). «Чун Пайгъамбардин ﷺ рекье аваз физва» лугьузвайбурун и гьадис рикIелай алатун тажуб жедай кар я.
