Кlвачер гьикl эцигда?
Кlвачер гьикl эцигда?
Суал: Жемятдин капI ийидайла са бязибуру кIвачерин арада кьве кьуьнтуьнилайни гзаф чка тазва ва абур къвалав гвайбурун кIвачерив агудзава. Им дуьз яни?
Жаваб: КапI ийизвай касдиз вичин кIвачерин арада са чипIинилай гзаф мензил тун меслят къалурзавач. «Фатгьу-ль-Аллам» ктабда кхьенвайвал (2-том, 239-чин), кIвачерин арада са чIиб мензил тун сунна я. Гьа са вахтунда капI ийизвайдавай вичин кIвачин кIегьебар къвалав гвайдан кIегьебрив агудайтIани жеда. Эгер капI ийизвайда вичин кIвачер са чипIинилай гзаф ачухайтIа, аданни къвалав капI ийизвайдан къуьнерин арада гзаф чка амукьда. КIвачерин арада са чIиб чка турла, капI ийизвайбурун къуьнерни сад-садав агатда, гьа ихьтин кпIунай къвезвай сувабни гзаф я.
Алай вахтунда са бязи капI ийизвайбуру чпин кIвачер къвалав гвайдан кIвачерив агакьарун патал саки са метрдин ахъайзава. Сад лагьайди, им вири мазгьабриз акси я. Кьвед лагьайди, и жуьре ийизвайбуру чпи къвалав гвайдаз капI ийиз манийвалзавайди фикирда кьуна кIанда, вучиз лагьайтIа гьа икI авуналди абуру къвалав гвайдан кIвачерал кьуьл илисзава. КапI ийизвайдаз манийвал авунал Шариатди кIевелай къадагъа эцигнава. Пуд лагьайди, и карди Пайгъамбардин ﷺ гьадисдиз аксивалзава. «Са сеферда жемятдин кпIунин вахтунда Аллагьдин Пайгъамбардиз ﷺ жергедай са тIимил вилик акъатнавай кас акуна. Гьа вахтунда Аллагьдин Векилди ﷺ лагьанай: «Эй Аллагьдин лукIар! Я куьне куь жергеяр туькIуьрда, я Аллагьди куь рикIер сад-садавай къакъудда» (гьадис имам Агьмада ва Абу Давуда Нуъман бин Баширалай агакьарнава). Нуъмана лагьанай: «Заз Пайгъамбардин ﷺ асгьабар жемятдин кпIунал акунай. Абуру чпин кIегьебар (фикир це, кIвачин тупIар ваъ, кIегьебар) сад-садав агуднавай, абурун къуьнерни сад-садахъ галукьзавай».
Куьне гила фикир це, кIвачер са метрдин ачухзавайбурувай чпин къуьнер сад-садав галукьариз жедани бес? Гьаниз килигна, жемятдин кпIунал акъвазнавайбуру чпин кIвачерин арада са чипIинилай гзаф мензил туна кIандач.
