Хъсан амалар дуьнья ва эхират патал хийир я
Хъсан амалар дуьнья ва эхират патал хийир я
Мадинани Ариф чилел ацукьна къугъвазвай. Садлагьана абур сад-садахъ галаз гьуьжет ийиз эгечIна:
- Ингье гьа им къачу! – тIалабна Мадинади.
- Ваъ! Ам заз кIандач! – гьарайна Арифа. – Ам заз гьич герек туш! Ам къачудалди за ингье и затI къачуда.
Гьа икI абурун арада къал акъатна.
Аялрин гьарайрин ван хьайила, диде абур авай кIвализ гьахьна:
- Вуч хьана? Вучиз куьне сада-садаз гьарайзава?
- Диде! Арифа зи кефи хазва! – лагьана Мадина дидедин патав катна. Дидеди руш къужахда кьуна ва Арифаз килигна:
- Чан хва, вучиз вуна чи гъвечIи Мадинадин кефи хана?
Арифа кьил агъузна:
- Ада заз яб гузвачир!
- Гъавурда акьуна. Мадина, вучиз вуна ви чIехи стхадиз яб гузвач? – дидеди рушвай хабар кьуна, амма ада жаваб ганач. Диде Арифахъ элкъвена: - И сеферда куь арада вуч патал гьуьжет арадал атана?
- Гъавурда акьазвани, - башламишна Ариф, - къе пакамаз чун къадим Египетдикай ахъайзавай передачадиз килигна. Ам са хъсан, рикI аладардай передача тир, анай рекьидайла агъа дуьньядиз, ана ишлемишдайвал ва четинвилер гьисс тийидайвал, мал-девлет, парталар, тIуьн, балкIанар гьатта лукIар чпихъ галаз тухузвай фараонрикай ахъайзавай. Гьа икI занни жувахъ галаз агъа дуьньядиз тухудай шейэр кIватIун кьетIна. Мадинади лагьайтIа, заз манийвал ийизва, гъиз вичин нинияр зи чантада твазва. За нинийрикай вуч ийида кьван?! Абур заз гьич герекзавач! За жувахъ галаз ктабар, машинкаяр ва пул кIватIзавай кьвати къачуда.
Диде мягьтел хьана:
- Зи хва, пулуникай вуна вуч ийида кьван?
Арифа са тIимил фикирна, ахпа жаваб гана:
- Передачадай лагьайвал, фараонри чпихъ галаз пулни тухузвай!
- Лап ажайиб кар я им! – лагьана дидеди ва хабар кьуна: - Яраб Пак Къуръанда идакай лагьанва жал?
- Ва-а-аъ… ахьтин шейэрин ван заз хьайи туш, - жаваб гана Арифа.
- Белки адакай чи играми Мугьаммад Пайгъамбардин ﷺ гьадисра лагьанва?
- Заз чидач, - лагьана Арифа ва къуьнер чуькьвена.
- Белки ваз са гьинай ятIани мусурманри гьакI ийизва лагьана ван хьана ва я акуна жеди?
- Ваъ, акур туш ва ванни хьайи туш! - хиве кьуна Арифа ва гъиле кьунвай пул авай кьвати чилел эцигна.
- Зи хва, Аллагь Таалади Къуръанда фараондикай вуч ахъайзава? Зи рикIел хкваш, ваз минет хьуй! – лагьана, диде къулайдиз дивандал ацукьна.
- Ана лугьузва хьи, фараон ва адан терефдарар Аллагьдихъ ﷻ инанмиш тушир. Гьатта ада вич аллагь я лагьана малумарна ва адаз аллагьдиз хьиз ибадат ийизвай.
- Дуьз я! Египетдин халкьди чпин регьбер Халикьдин ﷻ чилел ракъурнавай илчидай, яни кьвед лагьай аллагьдай гьисабзавай. Астагъфируллагь! Вуна абур гьахъ тир лагьана гьисабзавани?
- Ваъ, гьелбетда! Аллагь ﷻ сад тирди виридаз чизва хьи.
- Альгьамдулиллягь, вун и кардин гъавурда ава! Гила ваз чир хьухь: кьейидалай кьулухъ инсанриз къизил, гимиш, мал-девлет, тIуьн ва лукIар герек къведач. Гьа икI Аллагь Таалади лагьанва. Са затIунилай гъейри мад инсандивай вичихъ галаз агъа дуьньядиз гьич са шейни тухуз жедач. Ам виридалайни багьа хазина я! Анжах гьа хазинадивай адаз куьмек гуз жеда!
- Ам вуч я? – Ариф кIвачел къарагъна.
- А хазина – Аллагьдихъ ﷻ инанмиш хьун я! Агъа дуьньядиз тухузвай виридалайни хъсан шей лагьайтIа, хъсан амалар я. Анжах хъсан амалри, зи хва, ваз и дуьньяда ва эхиратда куьмек гуда. Аллагь Таалади чаз Къуръанда лугьузва хьи, пул ва мал-девлет – им и дуьньядин безек я. Гила вун гъавурда акьунани, чан хва?
- Эхь, диде, зун гъавурда акьуна, альгьамдулиллягь! – вич гъавурда акьуна лугьуз Аллагьдиз ﷻ шукур авурдалай кьулухъ, Арифа Мадинадиз теклифна:
- Мадина, ша чна кьведани санал Къуръан кIелин ва Аллагь Тааладивай чаз гзаф хъсан амалар ийидай къуват гун тIалабин!
