Сивяй анжах хъсан гафар акъуд!
Сивяй анжах хъсан гафар акъуд!
Йикъарикай са юкъуз Агьмад вичин дуст Фазилахъ галаз кIвалин гьаятда авай къумадал къугъвазвай. Фазилаз къумадикай иер кIвалер эцигдай алакьун авай, амма Агьмадавай и кIвалах ийиз жезвачир.
Агьмада Фазилавай вичизни къумадикай кIвалер туькIуьриз чирун са шумуд сеферда тIалабна. Фазил лагьайтIа, къумадин къеле эцигунал машгъул тир ва дустунин тIалабунриз фикир ганач. Агьмадаз са тIимил хъел атана ва адан хъиляй вичи-вичиз кIвал туькIуьриз эгечIна. Гзаф алахъна Агьмад, тIимил алахъна, амма Фазила туькIуьрзавай хьтин кIвалер адавай туькIуьриз хьанач. Ажугъди кьур Агьмада гъили яна вичин къумадин кIвал чукIурна, гьарайна дустуниз чIуру са гаф лагьана: «Фазил, агь Фазил! Вун дуст ваъ, … я!» Агьмадан дидедиз и гафарин ван хьана. Дидеди дакIардай кьил акъудна, Агьмадаз ва Фазилаз вичин кьилив эверна, абуруз насигьат авуна: «Чи Пайгъамбар Мугьаммада ﷺ лагьана: «Аллагьдихъ ﷻ ва Къияматдин йикъахъ агъунвай инсанди хъсан ихтилат авурай ва я кисна акъвазрай». – Мусурманди гьич садрани чIуру гаф сивяй акъудна кIандач. Гьамиша чун анжах хъсан ихтилатар ийиз чалишмиш хьун лазим я.
Арифдар Лукьманан уьмуьрдай за квез са кьиса ахъайда, дикъетдивди яб це. «Са гьикI ятIани иесиди Лукьманаз хеб тукIуна, адакай виридалайни тIямлу кьве кIус гъун буйругъна. Лукьмана иесидин кьилив мезни рикI гъана, ибурулай тIямлу шей авач лагьана. Маса сеферда иесиди Лукьманаз хеб тукIуна ва виридалайни пис кьве кIус гъун буйругъна. И сефердани Лукьмана мезни рикI гъана. Мягьтел хьайи иесиди хабар кьуна: «Абур гьа са вахтунда виридалайни хъсанбур ва писбур гьикI хьун мумкин я?» «Абур хъсан хьайитIа, абурулай хъсан шей авач, пис хьайитIа, абурулай писди авач», - жаваб гана Лукьмана», - ахъайна кьиса Агьмадан дидеди.
Иниз килигна, аялар, куь мецер хуьх, гьамиша хъсан гафар лагь, хъсан ихтилат ийиз жезвачтIа, сив гьич ахъаймир. Хъсан гафар лугьузвай инсандилай Аллагь ﷻ рази жеда, писбур лугьузвайдалай – нарази. Пис гафар лугьузвай инсан халкьдизни такIан жеда, хъсанбур лугьузвайди – кIан. «Лагь, квез Женнетдиз физ ва инсанри гьуьрмет авуна кIанзавани?» - жузуна Агьмадан дидеди. «Эхь, гьелбетда!» - санал жаваб гана гадайри. «АкI ятIа, анжах хъсан ихтилатар ая», - лагьана Агьмадан дидеди.
