Низ гьихьтин алхишар ийида?
Низ гьихьтин алхишар ийида?
Цан цазвайдаз
– Хийирар хьуй (Ас-Саламу алайкум)! Аллагь ваз куьмек хьурай! Гзаф чилер, техилар цадай, бегьерар кIватIдай къуватар гурай! Ваз (квез) и йис бегьерлуди хьуй!
Жаваб: – Сагърай (Баркалла)! Къуй Аллагьди гьар са затI вазни (квезни) булдаказ гурай!
Гвен гуьзвайдаз
– Хийирар хьуй! Къуй берекатар квез шаддиз недайбур хьуй! Къуй Аллагьди квез, абур, са тварни квадар тавуна, кIватIдай къуватар гурай!
Жаваб: – Сагърай! Къуй куь гафар Аллагьдиз ван хьурай (Аллагьди ﷻ абуруз жаваб гурай -ред.)! Къуй куь зегьметарни берекатлубур хьурай! Къуй Аллагьди квез чандин сагъвал ва къуватар гурай!
Векь язавайдаз
– Хийирар хьуй! Язавай векь квез бахтлудаказ ишлемишдайди хьуй! Къуй ам квехъ квез кIани кьадар хьурай!
Жаваб: – Сагърай! Къуй ви (куь) гафар Аллагьдиз ван хьурай!
РатIрал кIвалахзавайдаз
– Хийирар хьуй! Къуй ратIар квез бул техил гудайбур хьуй!
Жаваб: – Сагърай! Къуй Аллагьди квезни бул техил гурай!
Малдардиз (чубандиз, нехирбандиз, рамагбандиз)
– Хийирар хьуй! Къуй куь суьруьяр (нехирар, рамагар) къалин хьуй! Къуй абурухъ гелкъвезвай квез чандин сагъвал гурай!
Жаваб: – Сагърай! Аллагьди ваз (квез) куь вири уьмуьрда хъсанвални сагълам чан гурай!
Са гьихьтин ятIани кардал машгъул касдиз
– Хийирар хьуй! Къуй куь къуватар цIуд къат гзаф хьуй! Къуй куь крар агалкьунралди вилик фирай!
Жаваб: – Сагърай! Къуй Аллагьдиз куь ван хьурай! Къуй куь крарни туькIуьрай!
Рекье авай касдиз
– Хийирар хьуй! Къуй ви рехъ къениди хьурай! Къуй ам ваз куьруь хьуй ва ви уьмуьр яргъиди хьуй! Къуй Аллагьди ваз хъсанвал авурай!
Жаваб: – Сагърай! Квезни бахтар гурай!
Санай атай мугьмандиз
– Хийирар хьуй! Ви атун къениди хьуй! Ви атун бахтлуди хьуй! Вун сагъламдиз акваз шад я чун!
Жаваб: – Сагърай! Къуй Аллагьди квез сагъламдиз яшамиш жедай къуватар гурай!
Хъфизвай мугьмандиз
– Сагърай вун! Бахтлу рехъ хьуй! Къуй Аллагьди ваз хъсанвилер авурай! Къуй Аллагьди вун ви кIвализ сагъ-саламатдиз агакьаррай!
Жаваб: – Сагърай! Аллагьди квезни сагъ-саламатдиз ва хъсандиз, рикIер динждиз яшамиш жедай мумкинвал гурай!
ЦIийи партал алай касдиз
– АлукIдай сагъвал гурай и партал куьгьне хьуй ва мадни хъсан шейэр алукIдайвал хьуй!
Жаваб: – Сагърай!
ЦIийи затI къачурдаз
– Къуй ам ваз хийирлуди хьуй! Квез бахтар гъидай затI хьуй!
Жаваб: – Сагърай!
Азарлу касдиз
– Къуй Аллагьди ви тIавилер фад алудрай! Къуй Аллагьди ви начагъвал кьезиларрай! Къуй Аллагьдиз ви язух атурай! Фад сагъ хъхьуй вун!
Жаваб: – Сагърай! Къуй вун гьамиша сагъдиз ва шад-диз хьуй!
Азарлувал алатна, сагъ хъхьайла
– Бахтлу кIвачелди къарагънаваз хьуй! Къуй гьа идалди ви рикIин тIарвилер алатрай! Къуй Аллагьди вун вири азаррикай хуьрай! Аллагьдиз ви язух атурай!
Жаваб: – Сагърай!
Рагьметдиз фейидан мукьвабуруз
– Къуй Аллагьди адаз тагай йисар квез хгурай! Къуй адаз Женнет кьисмет хьуй! Къуй и бедбахтвал квез эхиримжиди хьуй! Къуй квез идалай кьулухъ ракIарай шад хабарар атурай.
Жаваб: – Къуй Аллагьди куь кьейибурузни рагьметар гурай!
