Начагъ хьун хъсан туш
Садра Аминадин гъвечIи вах кIевиз азарлу хьана. Дидеди вири вахт кефсуззавай рушахъ галаз акъудзавай, ам шад ийиз алахъзавай. Вахаз манийвал тавун патал Аминадиз ван алаз къугъун къадагъа авуна. Суфрадал алай жуьреба-жуьре ширинлухарни начагъзавай Фатимадиз эцигнавайбур тир.
Аминадиз килигдай вахт дидедиз гьич авачир. Ара-бир руша дидедивай вичихъ галаз къугъун тIалабдай. Амма дидеди вич азарлу Фатимадин патав хьана кIанзава лугьузвай.
И карди Аминадин кефи чIурзавай. Ам вахахъ ва дидедихъ галаз къугъваз вердиш хьанвай эхир. Гила лагьайтIа, адаз вахан кьилив фидай ихтияр авачир ва дидедизни вахт авачир.
Кефи чIур хьанвай Аминади гьаятда къугъун кьетIна. Дидедивай ихтияр къачуна экъечIдайла, адаз мекьи тахьун патал дидеди кьилел алукI лагьай ван хьана. И вахтунда рушан кьилиз са фикир атана. Азарлу хьун лап хъсан тирдахъ ам инанмиш тир, вучиз лагьайтIа аялрин бахчадиз фин герек къвезвачир, ваз вуч кIандатIани ийиз ва мультфильмайриз килигиз жезвай, ваз кIамай кьван ширинлухар недай ихтияр жезвай ва кьилиндини – гьамиша диде патав жезвай.
Ихьтин фикирар аваз Аминади кьилелай хутIунна ва туьквендиз фена. Ада морожни къачуна ва ада вичиз начагъ жез куьмек гудайдахъ умудлу яз, къанихвилелди ам нез гатIумна.
Са кьадар вахтунилай руш кIвализ хтана ва вичиз мус пис жедатIа лугьуз, вил алаз акъвазна. Белки гила азарлу хьанватIа? Амма гьикI чир жеда? Аминадиз гзаф суалар авай. Амма эгер ам азарлу хьайитIа, дидедиз гьар гьикI хьайитIани аквадайди адаз чизвай. Амма дидедиз са затIни аквазвачир. Вичин фикирар кьилиз акъатнач лугьуз, Аминадин кефи чIур хьана ва ам пашман яз ксана.
Мукьвара Фатима сагъ хъхьана ва вахар мад вахт санал акъудиз, къугъваз, шадвал ийиз хьана. Начагъ хьанач лугьуз Аминадиз шад хьанвай. АкI хьанайтIа адавай вичин вахахъ галаз къугъваз жедачир эхир.
Амма са кьадар вахтунилай Аминади туьд чухвазвайди хьиз гьиссна, ахпа ам пис тIалдиз элкъвена. Туькьуьниз лап четинзавай. Мад са тIимил вахтунилай температура хкаж хьана: кьил гьакI пад жезвай ва вири беден а саягъда тIазвай хьи, на лугьуди ам са кьакьан чкадилай аватнава.
Аминадиз вич начагъ хьанвайди гьасятда чир хьана. Амма адаз акьван писзавай хьи, азарлу хьана лугьуз адаз гьич шадзавачир.
Ам месел къаткурна ва дарманар ийиз башламишна. Духтурдиз эверна ва ада Аминадиз цIуд йикъан къене рапар ягъун кхьена. И ван хьайила Аминадин кефи михьиз чIур хьана. Адаз виридалайни гзаф рапарихъай кичIезвай кьван.
Адаз гьар жуьредин ширин затIар гъизвай, амма абуру ам гьич шадарзавачир. Кьил ва туьд гзаф тIазвайвиляй Аминадиз тIуьн гьич кIан жезвачир.
Гьелбетда, ада вичи гьа кар авуна лагьуз, ам гзаф пашман хьана. Амма гила гьайиф чIугуни сакIани куьмек гузвачир ва вичи авур игьтиятсузвиляй адал жаза агакьнавай. Амина инанмиш хьана хьи, азарлу хьун шад кар туширди ва азарлу жедалди ширинлухар гьич тIуьн тавуртIа, дарихмиш хьайитIа, мультфильмайриз килиг тавуртIа хъсан я.
Гьа чIавалай инихъ Амина вичин сагъламвилихъ хъсандиз гелкъвез ва азарлубурухъ рикIин сидкьидай рикI куз хьана.
