Къуват – Аллагьдин ﷻ патай пай

Къуват – Аллагьдин ﷻ патай пай

Хьана кьван, хьанач кьван Аслан лугьудай са гада. Яшариз вичелай чIехи гадайрихъ галаз хьайи кукIунра Аслан гьамиша гъалиб жедай.

Вахтар алатайла Аслана дамах къачуна, сабурсуз хьана ва са карни авачиз вичин юлдашар гатаз, къуват къалуриз эгечIна. Юлдашри адахъ галаз дуствилин араяр атIана, амма Асланаз дустари вичел пехилвалзавай хьиз тир, ам мадни дили жезвай. Асланан дидедиз хцин гьал хъсан акунач ва адахъ галаз суьгьбетун кьетIна.

- Чан хва Аслан, вахъ вуч хьанва? Вучиз вун гьич куьчедал экъечIзавач? Гьикьван хъсан югъ ятIа килиг! Вири гадаяр куьчедал ала. ЭкъечI са геренда.

Амма телевизордиз мадни мукьва хьана, Аслана разисуздаказ лагьана:

- Фикирди кьунва! Абурухъ галаз куьчедал итижлу туш! Абур вири кичIебур, къуватсузбур я!

Дидедиз аламат хьана:

- Жеда гьа! Вуна акI вучиз лугьузва?

- Вучиз лагьайтIа абуруз захъай кичIе я ва зи къуватдал пехилвалзава! – хъел кваз лагьана Аслана. - Гьавиляй абур захъ галаз хъел хьанва. Заз пара къайгъу! – лагьана, ам анихъ элкъвена ацукьна.

- Заз аквазвайвал, гьакъикъатда ваз къайгъу авачиз туш, - секиндиз лагьана дидеди ва хцин кьилелай гъил эляна. – Текдиз яшамиш жедани? Заз чиз вун вири юлдашрихъ галаз туьхкIуьн лазим я, икьван дамах жедайди туш. Ви къуват – им Халикьди ﷻ ганвай пай я! Иниз килигна, вуна Аллагьдиз ﷻ шукур гъана ва къуват хийир рекьиз серфна кIанда!

Асланан дамахди дидедихъ галаз рази жез тазвачир:

- Ун, лап! Зи къуват – им зи гьунар я! Зун лап аял чIавалай спортдал машгъул жезва, гьавиляй ихьтин къуватлуди я! И кардикай я заз регъуьзвач, я дустарни заз герекзавач!

Дидеди пашмандиз ухь аладарна:

- Гьавайда лугьузва, чан хва! Аллагьдивай ﷻ Вичиз вуч кIан хьайитIа, гьа шей регьятдиз ийиз жезва. Эгер чна шукур тавуртIа, Адавай чун вири къулайвилерикай магьрумариз жеда.

ЯтIани Аслана дидедихъ яб акалнач, гъил эляна. Гадайрихъ галаз ам туьхкIуьнни авунач. Амайдалани перт жез хьайи ам виридаз надинж гада хьиз машгьур хьана.

Гьа икI ам яшамиш жезвай. Йикъарикай са юкъуз Аслан писдиз азарлу хьана. А тегьерда азарлу хьана хьи, меселай гьич къарагъиз жезвачир. Югъ къандавай ам къуватсуз жезвай. Диде-бубади ам гъилерал алаз тухуз духтурриз къалурзавай. Кьил акъат тийизвай азардиз абуру гьикI куьмекда кьван…

Са пакамахъ ахварай аватай Асланаз вичин кьилихъ ацукьна шехьзавай диде акуна ва адан рикIиз дар хьана. Ам са гужуналди дидедиз мукьув хьана ва вичин зайиф хьанвай гъил адалай алтадна:

– Шехьмир, чан диде, вири хъсан жеда.

Диде вилерилай накъвар физ-физ хциз килигна, темен гана, кIваляй экъечIна. Аслан вичин зайиф, къуватсуз хьанвай бедендиз килигна ва гьасятда рикIел и мукьвара, къуват – им Халикьдин ﷻ патай пай я лагьай, дидединни вичин суьгьбет, Аллагьидвай ﷻ вири алакьунрикайни къулайвилерикай магьрумариз жедайди, хтана. Аслана вилер кIевна. «Субгьан-Аллагь!» - фикирна ада. – Я Аллагь! Залай гъил къачу, Халикь! Шукур тавунай залай гъил къачу! Гъил къачу! Вуна заз ихьтин алакьун ганвай, амма за ам герек авазни авачиз ишлемишзавай! Зун гьикI батIул тир. Гъил къачу залай, гъил къачу!» - ахварал фидалди акъваз тавуна тикрарзавай Аслана.

Пакамахъ Аслана вич авайдалай хъсандиз гьиссна. Хцин хъуькъвер яру хъхьанвайди дидедини кьатIана, адаз шад хьана. Гьа икI гада хъсан хъжез башламишна. Куьруь вахтунда хъсан хъхьай тегьер акур виридаз аламат тир, амма Асланаз вичиз Ни куьмекзавайтIа чизвай. Ада Аллагьдиз ﷻ шукур авун акъвазарзавачир.

Вахтар алатайла Асланаз гьа виликдай хьтин къуватни хтана. Къуват виликдай хьтинди тиртIани, гада дегиш хьанвай. Гила ада вичиз ганвай пай анжах хъсан кIвалахра ишлемишзавай: диде-бубадиз куьмекзавай, аялриз майданар туькIуьрунра иштиракзавай, аялрин пад кьазвай, азаддиз кьуршахар кьунай школадин патай сифте чкайриз лайихлу жезвай. Вичин краралди ада инсанрин арада гьуьрмет къазанмишна ва адахъ халисан гзаф дустар хьана.