Ам чи сувар туш!
Ам чи сувар туш!
Шукур хьуй Сад Аллагьдиз мусурманриз кьве еке сувар гайи – Сив хуьнин сувар ва Къурбандин сувар. Ислам дин къведалди арабриз гзаф суварар авай, абурун виридан чкадал Аллагьди ﷻ кьве еке сувар гана.
Сив хуьнин сувар - Рамазандин варз куьтягь хьана, сивер хвена, капI-тIеат авур кас Аллагьди ﷻ вичин гунагьрилай гъил къачунва, рикI михьи ва иман кIеви авунва лугьуз шад жезвай, кесибриз закату-ль-фитIр пайзавай, мукьва-кьилияр сад-садан кIвалериз мугьманриз физвай сувар я. Къурбандин сувар – мусурманри чпин Рабби патал кесибриз къурбандар, садакьаяр пайзавай, капI-тIеат, шадвал ийизвай сувар я. Гьайиф хьи, алай вахтунда мусурманри чпин суварар лайихлу къайдада саймиш тавуна, маса динра авай суварар Исламдин суваррилайни гужлудаказ къаршиламишзава. Гьуьрметлу мусурман стхаярни вахар, хашпарайри ва я мажусийри Къурбандин сувар къаршиламишна квез гьина акурди я? Чун гьабурулайни агъуз аватнавани?
Мусурманриз Аллагь Таалади маса динрин суварар кьиле тухун къадагъа авунва. Пайгъамбардин ﷺ гьадисдани лагьанва: «Вуж гьи халкьдиз тешпигь жез алахъайтIа, ам гьа халкьдикай я». Гьи мусурмандиз вич хашпарайрикай ва я мажусийрикай хьана кIанзава кьван? За фикирзавайвал, рикIе са тIимил кьванни иман авай мусурманди цIийи йис алукьна лугьуз шадвал ийидач.
ЦIийи йис - им чи уьмуьрдикай мад са йис гел галамачиз фена, чун мад са йисан кьиникьдив мукьув хьанва лагьай чIал я.
Мад са ажайиб кар ава. Мусурманриз чпин суварар, мусурман цIийи йис мус алукьзаватIа гьич хабарни авач. Анжах чара динрин суварар мус аватIа хъсандиз чизва. Идалайни гъейри, мусурман цIийи йис гьикI къаршиламишун лазим я? Алатай йисуз хьайи кьван гунагьрилай Аллагьдивай ﷻ гъил къачун тIалабна, йис лайихлу къайдада кьиле тухуз хьанач лагьана пашман хьана, махсус дуьа кIелна, алукьзавай йисуз ибадат, хъсан кIвалахар гзаф ийидайвал Аллагьдивай ﷻ къуват тIалабна кIанда. Гила куьне лагь, цIийи йис алукьун мусурман патал шадвал ийидай себеб яни?
ЦIийи йис – им Аяз буба, ёлка, къиткьинардай шейэр, ички хъун, кукIунар, ягъ-кьиникь ва мадни чпикай анжах зарар авай крарикай ибарат хьанвай сувар лугьудай тIвар алай са шей я. Ам гьинай атанвай сувар я лагьайла, садавайни дуьз жаваб гуз жезвач. Гзаф пай алимри ам мажусийрин сувар я лугьузва. Мад куьне фикир ая, гьикьван еке зарар гузватIа и сувари тIебиатдиз, кьве юкъуз кIвале эцигна гадарун патал гьикьван тарар атIузва?! Инсанриз менфят хкуд лагьана ганвай няметар гьа икI вара-зара авун Аллагьди ﷻ кIевидаказ гьарамнавай крарикай сад я.
Чаз Аллагь Таалади гьим чIуруди ва гьим къениди ятIа къалурнава, акьул ганва, абурукай сад хкядай мумкинвални ганва, гьавиляй акьуллу кас вичин эхиратдин кIвал къени ийидай шей хкяйиз гзафни-гзаф чалишмиш хьана кIанда.
Къуй Аллагь Таалди чакай гьар садаз дуьз хкядай тавфикь, къуват гурай!
