Чара дишегьлидихъ галаз хелветда хьун къадагъа тирдакай

Аллагь Таалади лагьана: «Куьне абурувай (ина Аллагьдин Расулдин ﷺ  папарикай ихтилат физва, амма им амай вири папаризни талукь я) квез герек са шей тIалабдайла, арада перде аваз абурувай тIалаб…» («Аль-Агьзаб», 53).

1. Укба бин Амира агакьарайвал, са сеферда Аллагьдин Расулди ﷺ  лагьана: «Къуй квекай са касни гьич са вахтундани чара дишегьлияр авай чкадиз тефирай!» Ансаррикай сада жузуна: «Эгер ам гъуьлуьн мукьвади яз хьайитIа?» Ада лагьана: «Мукьвади – им телефвал я!» (Яни, гъуьлуьн мукьвадаз кIвализ къведай ихтияр хьуниз килигна, ам хаталу темягь финин себеб хьун мумкин я) (Аль-Бухари, Муслим). Мукьвади лагьайла, им стха, стхадин хва ва я имидин, халудин хва фикирда ава.
2. Ибн Аббаса агакьарайвал, Аллагьдин Расулди ﷺ  лагьана: «Къуй квекай садни гьич са чIавузни чара дишегьлидихъ галаз хелветда амукь тавурай, эгер адахъ мукьва кас галачиз хьайитIа!» (Аль-Бухари, Муслим).
3. Бурайдади лагьана: «Садра Аллагьдин Расулди ﷺ  лагьана: «Аллагьдин ﷻ рекье дяве ийизвайбурун папарик кягъун виже татун, дявейра иштирак тийизвайбуруз чпин дидейрик кягъун виже татуниз тешпигь хьун лазим я. Дяведиз тефена амукьай вуж хьайитIани, дяве ийизвайдан хизандин къайгъуйра ам эвеззавай, амма адан патахъай вичин везифаяр тамамар тийизвай, Дувандин юкъуз ам дяве ийизвайдан вилик акъвазарда ва адан хъсан крарикай вуч кIан хьайитIа ва гьикьван кIан хьайитIа ада вичиз къачуда». Ахпа Аллагьдин Расул ﷺ  чахъ элкъвена ва жузуна: «Куьне идан патахъай вуч фикирзава?» (Яни: куьне гьикI фикирзава, а крарикай са затI хьайитIани амукьдани, эгер инсандиз руьгьдиз къанихвал хьтин хесет хас тирла, ва Аллагьди ﷻ адаз вичиз кIандай кьван вири шейэр къачудай ихтияр гайила?) (Муслим).