Гъетерихъ инанмиш жемир!
Гъетерихъ инанмиш жемир!
Хабарар къвердавай гьикьван гзаф зегьле ракъурдайбур ва дуьнья фад дегиш жедайди жезватIа, гьакьван фалчийривай куьмек къачун машгьур жезва. Лунддин университетдин ахтармишунри къалурзавайвал, коронавирусдин тIугъвал авай вахтунда, гороскоприхъ итижвал садлагьана хкаж хьана ва 2019-йисалай гатIумна адан метлеблуван анжах виниз хкаж жезва.
А хатавилик акатзавайбур – 25 йисалай 40 йисал къведалди яшда авай дишегьлияр ва пенсиядин яшда авай инсанар я. Personality and Individual Differences журналда чапнавай ахтармишуни къалурайвал, акьулдин дережади ва нарциссизмдихъ инсандин майилвал хьуни жедай крар гъетери къалурдайдахъ инанмиш хьуниз таъсирзава. Неинки илимдин ахтармишунри, гьакI акьулдини фикирдиз гъизвайвал, IQ гьикьван виниз хьайитIа, гьакьван инсанриз гороскопар тIимил кIелиз кIан жезва.
Вучиз астрология гилани ишлемишзава?
Оденвальда тестикьарзава хьи, астрологиядиз илимдин бине авачирди алай аямдин инсанри аннамишзаватIани, жедай крарикай чир жез кIан хьун психологиядин акьалтIай ажайиб крарик акатзава – чпиз кIанзавай кар ван хьунихъ игьтияжвал. «Инсанри хъсан терефар гзаф къалурзава ва пис терефар рикIелай алудзава, гьа саягъда чун туькIуьрнава», - лугьузва НАСА-дин векилди. Клиникадин психолог Денис Долгован гафарай, гороскопар машгьур хьуниз Барнуман ва я Фореран таъсирдалди баян гуз жеда. Асул мана ам я хьи, инсанри фикирзавайвал, гороскопдай хсуси чпикай ва гележегда жедай крарикай лугьун кьилди чпиз туькIуьрнава. Гьакъикъатда лагьайтIа, вири малуматар лап умумибур, тайин туширбур я, абур гьар са инсан патал ишлемишиз жеда. «Эгер лагьайтIа: куьн дерин, акьуллу инсан я, амма бязи вахтара квез хкягъиз четин жезва – им чIехи пай инсанрихъ галаз дуьз къвезва. Эгер ахьтин нетижа планетаяр ва Рагъ акъвазнавай тегьердал бинелу яз куьн хайи югъ ахтармишунин нетижада авунвайди я лагьайтIа, ахьтин хабардихъ ихтибарвал гзаф хкаж жеда», - гъавурда твазва Денис Долгова.
Хаталу астрология
Ахьтин дуьшуьшар ава хьи, астрологияди лугьузвай крарихъ инанмиш хьун гележег патал лап хаталу хьун мумкин я. Гьихьтин дуьшуьшра мукъаятвал авуна кIанда? Эгер инсанди гьамиша вичин уьмуьр астрологияди лугьузвай гафарихъ галаз гекъигиз хьайитIа. Нагагь астрологрин фикирдалди гъетер чIуру саягъда акъвазнаваз хьайитIа, ам вич тадиз фена кIанзавай чкадивайни, цIийи кIвалахдивайни акъвазда. Инсанри астрология мукьвабурухъ галаз алакъаяр туькIуьрунин къайда къалурдай рехъ хьиз кьабулун лап хаталу я. «Бубадихъ галаз зи алакъаяр писзава, вучиз лагьайтIа зун Акьраб я, ам – Гьер». Куьне фикирдиз гъваш садра, ахьтин жуьре инсанар ава хьи, ва абур тIимил туш, абуру ихьтин малуматар рикIивай кьабулзава ва хизанда жезвай гьуьжетриз гьабуралди баян гузва. Эгер астрологиядал машгъул хьайила пулунин патахъай зарар хьанватIа, мукъаят хьухь. Инсанди хсуси гороскоприз, вахт акадар тийиз астролограл меслят гъуниз зурба пулар харж авун мумкин я.
