Файдачивал кIевелай къадагъа тирдакай
Аллагь Таалади лагьана: «Дувандин юкъуз файдачивилел машгъулбур шейтIанди вичин кягъуналди дили авурбур хьиз къарагъда. ИкI жеда, вучиз лагьайтIа абуру лугьузва: «Алишвериш файдачивал хьиз я», - амма Аллагьди алвер ихтияр ганва, файдачивал къадагъа авунва.
Файдачивилел машгъулбурукай ни вичин Раббидин патай насигьат агакьна а кар акъвазарайтIа, адан вилик хьайи крарилай гъил къачуда (яни: файдачивилин гунагьдилай гъил къачуда), ва Аллагьди къарар акъудда адаз вуч ийидатIа, амма вуж элкъвена а кардал хтайтIа, абур ЦIа жеда ва ана гьамишалугъ яз амукьда.
Аллагьди процентар терг ийида ва садакьа артухарда (яни, файдачивилин куьмекдалди атанвай къазанжийрик берекат жедач ва абуру гъиляй акъатунал гъида, садакьа хьиз ганвайдаз талукь яз лагьайтIа, ада неинки девлетар артухарда, гьакIни инсандиз Аллагьдин ﷻ патай савкьват таъмин ийида), ва вичиз авур хъсанвал чир тежедай гьар са гунагькар Аллагьдиз кIан туш.
Гьакъикъатда, иман гъайибуруз ва хъсан крар авурбуруз, ва капI авурбуруз, ва закат гайибуруз абурун Раббидин ﷻ патав савкьват гьазурнава, ва абуруз са куьнихъайни кичIе жедач ва абур пашман жедач.
Эй иман гъанвайбур! Аллагьдихъай кичIе хьухь ва квез къвезвай файда къачумир (яни масабурув пул буржуниз вугана процентрилай къвезвай пул), эгер куьн гьакъикъатда иман гъанвайбур ятIа» («Аль-Бакъара», 275-278).
И кьилиз талукь тир якъин гьадисрикай лагьайтIа, абурун кьадар гзаф я ва абур малум я. Абурукай сад вилик квай кьиле Абу Гьурайради гъайи гьадис я.
- Ибн Масуда лагьана: «Аллагьдин Расулди ﷺ файдачидивай пул буржуниз къачузвайди ва файдачивилел машгъул жезвайди лянет авунва» (Муслим).
И гьадисдин ат-Тирмизиди ва маса мугьаддисри гъизвай жуьреда агакьарзавайвал, Ибн Масуда лагьана: «…ва гьакIни адан кьве шагьидни (яни, процентрихъ пул вугузвайдан ва я къачузвайдан шагьидар) ва кхьизвайдини».
