Папалай тариф авун
«Зи гъуьл захъ аялдихъ хьиз гелкъвезва. За фикирзавайвал, гьакI дуьз я», - ахъайзава чи газет кIелзавай Маккади. «Ас-салам» газетдин социальный сетра хабарар кьуни итижлу гзаф фикирар кIватIна. Абур вири кьве патал пайиз жеда: гафаралди гьикI тариф ийидатIа ва гьикI краралди гьевес кутадатIа.
Чи газет кIелзавайбуру гьисабзава хьи, рикIин сидкьидай чухсагъул лагьана кIанда ва тажубвилелди къейд авуна кIанда: «Вун вири крар ийиз гьикI агакьзавайди я?!», хъсан гафуналди тереф хвена ва, эхирки, лагьана кIанда: «Вун виридалайни хъсанди я!»
Папаз крара гьуьрмет авун лазим я «жуван аялрин дидедиз хьиз», «цуьквер ва хуш къведай гафар багъишиз». Масабуруз важиблу я «хъвер, рикIелни алачир савкьватар, зарафатар» ва папаз «кIани крар» кьилиз акъудун. Мад папаз кIани савкьватар гун, «масабурун туьгьметрикай хуьн», «вичелай пис гьалда авайбур» къалурун, ва я, гьич тахьайтIа, «адаз чебурекар гьазурун».
Санлай къачурла, чи рушари цава авай гъетер тIалабзавач. Абурукай гьар сада умуд кутазва, хизан патал адан зегьметар ва къайгъуяр аквадайди, абуруз куьмек гудайди ва хъсан гафуналди ва хъвердал кьванни къимет гудайди.
Папалай гьикI тариф ийидатIа чирзавай вирибурухъ галаз кьадай къайда авач, амма тарифар ийизвайди фикир гудайди, регьимлуди ва дикъетлуди хьун лазим я. Амма тарифар ийидайла вуч авун герек туштIа, чаз чизва.
Ачухдиз чинал тариф авун. Ихьтин тарифди мукъаят ийизва ва ихтибардай вегьезва. Инсандиз вичин хъсан ва пис патар чизвайди я. Чна адалай кьадардилай гзаф тарифар авурла, папаз къвезвай сифте фикир ихьтинди я: «Ада кьасухдай, рикIивай тушир тарифар ийизва, адаз са вуч ятIани кIанзава». Ихьтин тарифди хъсан нетижа гудач.
Масабурухъ галаз гекъигун. Им чукIулдин мурцалай физвай хьиз я. ГьикI хьайитIани хер жеда. Адахъ галаз кьадай, адан ерийриз хас тир гафар жагъура. Папаз абур бегенмиш жеда.
Тарифрихъ галаз санал туьнбуьгьар авун. Са кардай тариф авун ва гьасятда маса кардай туьнбуьгь авун – пис фикир я. Туьнбуьгьар авун гьакIани пис кар я. Абурухъ кIватI жедай ва алакъайриз зегьерди хьиз таъсир ийидай кьетIенвал ава. Абур гьикьван гзаф хьайитIа, гьакьван хъсан эсер тIимил жеда ва пис нетижа гзаф. Туьгьметар тийиз яшамиш хьухь.
Эхиримжиди. Чи папар – им ксудай кIвале авай мебель туш, чна ам гадардалди ана амукьдай. Паб гзаф затIар эхиз гьазур я: яшайишдин четинвилер, пулунихъ галаз алакъалу месэлаяр, хизандин кьилел къвезвай жуьреба-жуьре имтигьанар. Амма ибур вири – анжах чпихъ галаз чи хъсан ва гьуьрметлу рафтарвал хьайила. РикIяй-рикIиз ийизвай ихтилатар, яб гуз ва куьмек гуз алакьун, туьгьметар тавун, чарабурун векъивиликай ва зияндикай хуьн, санал ийизвай кIвалахар – чIехи ва четин крар туш, амма гьа са вахтунда яргъал ихтибарлу алакъаяр ва хъсан гьиссер патал абуру хъсан таъсир ийида.
Эхирни, вахтуналди ва тежрибадалди ахтармишнавай къайда: чи къаюмвилик квайбуру – папани аялри – са вахтундани чаз яб гудач, та чна Халикьдиз ﷻ яб тагузмай кьван. Им кьведра кьвед – кьуд хьиз я. Чи гунагьар – Аллагьди ﷻ чи багърийрин ва мукьвабурун рикIерай чаз гьуьрмет авун акъудунин себеб я.
Чаз кIанзава Раббиди ﷻ чи виридан гунагьрилай гъил къачун, чи хизанар мягькемарун, чун вири ва чи багърияр бахтлу инсанрин малум тир ва эбеди мескенда кIватIун.
