Сурун къван
Желил халудиз вичин тангъахдиз, акьулдиз дигай гзаф дустар авай. Идалай гъейри, ам вири хъсан инсанрихъ галаз таниш тир.
Герейханован совхоздал Мустафаев Разахан лугьудай яшлу фекьи алай. Ам Желил халудин рикlин дуст тир, абур гьамиша, капl-тlеат ийизвай маса юлдашарни галаз, Разаханан кlвализ зиярат ийиз къведай.
Са юкъуз Желил халу атайла, Разахана сурун къван туькlуьрна куьтягьнавай ва адал кхьинар ийиз гьазур хьанвай. Желил халуди хабар кьуна:
– Разахан стха, ви гъиле вуч дерди ава? Ам вуна низ язавайди я?
Разахана адаз ихьтин жаваб гана:
– Им за чаз язавай къван я.
– Ам вуч лагьай гаф я? Зун гъавурдик кутура кван.
– Эгер зун вилик кьейитlа, ам заз жеда, зи тlвар кхьин хъувурай. Инал за садан тlварни, я йисни кхьизвач. Залай вилик вун кьейитlа, Желил, зи дуст, ви сурухъ за им зи патай савкьват яз гилигда. За адал ви тlвар ва вун хайи, ва кьейи йисар кхьин хъийида. Вун и зи къарардал рази яни, зи дуст?
Желил халудиз пара шад хьана:
– Эхь, дуст Разахан, чна гьакl ийида, - лагьана.
Гьазурнавай къван Разаханан кlвале амай. Кьве йисни ара фенач, Желил халу са вацра кьван начагъ хьана ва, нетижада, чан гана.
Вичин дуст къакъатна лугьуз Разаханаз пара гьайиф хьана. Малла Желил халу и дуьньядилай фейидалай кьулухъ алукьай сад лагьай жуьмя юкъуз Разахана сурун къванцел адан тlвар ва амай кхьинар хъувуна ва сурун кьилихъ ам акlурна.
