Мусайлимат Каззаб яна кьиникьикай куьруь гьикая

эвел алатай нумрайра

Къуватлу кьушун галаз Халид мукьва жезвайдакай Бану Гьанифат тайифадал хабар агакьна. Абуруз меслят герек тир. Вуч ийидатIа чир тахьайла, абур вичин арифдарвилелди ва чирвилералди машгьур тир Самаматал меслят гъиз фена. Самамат Мусайлиматун Каззаб тапархъан тирди чизвайбурукай сад тир.

Инсанри ам элкъуьрна кьуна ва адаз суалар гуз башламишна. Абуру Халид мукьва жезвайдакай ахъайна, Мусайлиматакай хабар кьуна ва абур дуьз рекьел акъуддай меслят гун тIалабна. Акьуллу Самамата инсанриз лагьана: «Эй зи тайифа, заз яб це. Гьабибуллагь Мугьаммад Аллагьди ракъурнавай гьакъикъи пайгъамбар тирдал шак алач.

Мусайлимат тапархъан я, вичи-вичикай хкудзавай гафаралди адав куьн алцурариз тамир». Ахпа ада вичиз, вичин хизандиз ва мал-девлетдиз хатасузвал тIалабиз йифиз вич Халидахъ галаз гуьруьшмиш жез физвайдакай лагьана.

Инсанри адан дуьз меслятдиз яб гана ва йифиз чинеба Халидахъ галаз гуьруьшмиш жез фена. Абуру чеб Исламдилай элячI тавунвайдахъ ам чIалахъарна ва чпин чанарин ва мал-девлетдин хатасузвилин заминвал къачуна, элкъвена хтана.

Анай Халида кьушунни галаз рехъ давамарна. Абур Ямаматдин патав кIамун къерехдал акъвазна. Халида кьве виш атлу душмандин къастар ахтармишна чириз ракъурна. Абуруз рекье гьалтайди есирда кьуна хкун буйругънавай.

Абурал Бану Гьанифат тайифадай тир къанни пуд касдикай ибарат десте гьалтна. Абур есирда кьуна ва Халидан патав тухвана. Халида абурувай хабар кьуна: «Куьне Мусайлимат вуж яз гьисабзава?» «Ам пайгъамбарвиле Мугьаммадан шерик я», - тапархъан Мусайлимат пайгъамбар тирди тестикьна, жаваб гана абуру.

Амма абурукай сада, Сарият ибн Амира, Халидаз лагьана: «Я Абу Сулайман, зун Мусайлимат пайгъамбар яз кьабулнавайбурун терефдар туш ва ам хуьзвайбурухъ галаз рази туш». Ахпа Абу Сулаймана Мажаатаз лагьана: «Вуна вуч лугьуда?»

Мажаата вични муртад туш лагьана, жаваб гана: «Зунни Сарият гьеле Расулдал чан аламаз Мединадиз фенай ва адахъ инанмиш хьанай ва къенин йикъалди чун Исламдилай элячIнач». Абуру кьведани Халидаз кьин кьуна. Муькуь есирриз Халидан къилинжди жаза гана. Ракьар алудна, абур кьушунда амукьунин шартIуналди, Мажаатни Сарият азадна.

Халид рекье гьатна ва Акруба лугьудай чкада акъваз хьана. Абурун къаншарда Мусайлимат кьиле аваз Бану Гьанифатан кьушун жергейра акъвазнавай. Табий жез ният авачир кьве кьушундини и югъ сад-садаз килигиз акъудна.

Пакадин йикъан экуьнахъ дуьз жергейра акъвазнавай кьушунри чпичпел гьужумна. Бану Гьанифатан аскерри къилинжар къакъарай акъудна ва Халидан кьушундиз къурхуяр гуз гатIумна. Абурун такабурвал акурла, Халид асгьабдиз шад хьана. «Чаз шадвал жеда», - хабар гана ада вичин аскерриз.

Имансузар патал бедбахтвал хьайи Халида виридалай вилик къилинж акъудна. Насигьатдиз яб гана ва эмир кьилиз акъудун яз, ада сифте дяве башламишна. Халид душманрин кьушундиз къати гар хьиз, ахъайнавай хьел хьиз гьахьна.

Сагъ са сятина нехирдал вегьей асланди хьиз, дяведин майдан ивидай авуна ада женг чIугуна ва сагъ-саламат яз вичин кьушундин патав хтана.

Адалай кьулухъ душманрал Аммар ибн Ясара гьужумна. Ада гзаф кафирар яна кьена ва вичин рикIе авай цIай кьена амни вичин юлдашрин патав хтана. Пуд лагьайди Хишам ибн Гьарис экъечIна.

Аллагьдин куьмекдалди ада викIегьдиз женг чIугуна ва такьатдай аватдалди муртадар яна ва сагъ-саламатдиз элкъвена хтана. Кьуд лагьайди Зайд ибн ХатIтIаб экъечIна, им йикъан эхирар тир. Ада Бану Гьанифатан кьушундиз акси яз гъазават башламишна, на лугьуди абур патал ам агъу авай къаб хьана.

Зайда гьасятда муртадрин кьушундин вад башчи яна кьена, къуватдай аватдалди дяве авуна ва гзаф душманар кьена, вични шагьид яз телеф хьана. Ахпа адан имидин хва Амир дяве ийиз экъечIна. Ада вичин стха кьейи чкадал вични кьин патал къилинж акъудна.

Ада асланди хьиз муртадрин кьушундал вегьена ва гзаф ивияр экъичай женгина вични кьена. Адалай кьулухъ кьве кьушунни къати женгина сад-садак акахьна. Халидан кьушундикай пуд виш кас кьван кьена ва са кьадар гзаф муртадарни.

Йиф алукьна ва кьушунар чеб алай чкайрал хтана. Сада-садаз ихтибарвал тийиз и йиф кьве патани, къурху хьанвай къушари хьиз, вилер акьал тавуна акъудна.

Пакамахъ абур мад сад-садал фена. Сифте Мусайлиматан везир вилик экъечIна. Ам, къилинж акъудна, акъваз хьана ва садлагьана Халидан кьушундал гьужумна. Дяве гатIумна, чил ивидай ацIана. Мусайлиматан везирди инсафсуздаказ дяве ийизвай.

Адан вилик Сабит ибн Къайс экъечIна. Ада къилинж везирдин руфуниз сухна ва ам балкIандилай аватна. Сабит вичи женг авур чкадал элкъвена ва имансузрин кьушундиз килигна. Мусайлиматан везир яна кьиналди ам секин хьанач ва абурухъ галаз дяве авун патал душмандал гьужумна.

Асланди гьайванар гьикI терг ийизватIа, гьакI Сабита Бану Гьанифатан муртадар ягъиз рекьизвай. Чан гьайиф татана, ада душманрихъ галаз дяве ийизвай. Ада абур гзаф кьена ва вични шагьид яз телеф хьана. Ам кьейидалай кьулухъ Саим ибн Авама, катра хьиз, Мусайлиматан кьушундал гьужумна. Ада, суьруьдал вегьей жанавурди хьиз, душманар къилинждал ягъиз кукIварзавай ва амни шагьид яз кьена.

Женгинин къизгъинвал акур Бара ибн Маликак сифте зурзун акатна, ахпа ам вич-вичикай хкатна. Вичвичел хтайла, гьич фикирни тавуна ада душмандин кьушундал вегьена.

Адет яз ихьтин гьалдилай кьулухъ Барадин къуват тежер хьтин артух жезвай. Вич-вичел хтайла адакай маса инсан жезвай, адаз тахьай хьтин къуват къвезвай ва адан хура садавайни акъвазиз жедачир.

Баради Мусайлиматан муртадриз Дувандин югъ авуна. Ада къилинждал ва жидадал ягъиз, чеб-чпел хкведай мумкинвал тагуз, кьушун кукIварзавай. Ахпа ам элкъвена хтана. Ида Бану Гьанифатан аскеррик пис хъел кутуна. Сада-садак гьевес кутаз, муртадар, виридан гаф сад хьана, вагьши гьайванар хьиз Халидан кьушундиз акси яз кьетIивилелди гьужум авунив эгечIна.

КьатI ама.

ШЕЙХ САИД ЭФЕНДИ, «ПАЙГЪАМБАРРИН КЬИСАЯР 2-ПАЙ» КТАБДАЙ.