Эхиримжи гаф
эвел алатай нумрайра
Эй муьруьдар, рикIерин гьал хуьз алахъ, агъудикай хуьдай шейни ава хьи. МичIивал алуддай яракь ишлемиша, рабитIадин (муршиддихъ галаз руьгьдин алакъа) ва вукъуфдин (рикIиз фикир гун, ана Аллагьдин ﷻ тIварцIелай гъейри са затIни тежедайвал) къуват туьхуьн тийидайвал.
Вахт куьтягь жезва, халкь чIур хьанва, фитневал тамамвилелди чилел дуьздал акъатнава. Чун идалай вилик ам алукьуникай ахъаяй вахтунда яшамиш жезва.
Авамвилиз талукь яз лагьайтIа, ам кьадар авачир кьван гзаф хьанва ва инсанар чирвилерин лайихлувилин гъавурда акьазвач. Чирвилер къачудай гьатта мурадни авачиз кIелзавайбур акурла, абурукай са куьмекни авачирди, анжах диндиз манийвал авайди гъавурда акьазва. Аллагь Таалади, Вичин къарар са «Кун (Хьухь!)» гафуналди кьилиз акъатзавай, чун кутугай инсанар авачизни тунач. Чеб атеистрикай тир, Аллагьди ﷻ куьмек ганвай инсанри туба авуна ва Исламдиз куьмек гана. Куьмек гуз тахьайбур, акси язни экъечIнач, Ислам диндин гъавурда акьуна ва Аллагьдихъ ﷻ элкъвена. Амма бязи яд акат тийир «вацIун къванер» сакIани рекьив къвен тийиз Жегьеннемдиз физ алахъзава. ЯтIа чунни мажбур жезва абур аниз фад ракъурдайвал Халикьдивай ﷻ тIалабиз. Вич халкьнавай Рабби ﷻ чин тийизвай инсандилай бахтсуз кас авач. Якъин, вич Исламда хьунай шукур авун лазим тирдан гъавурда вуж акьуначтIа, а касдилай бахтсузди авач. Ингье Аллагь Таалади Исламдилай гъейри маса диндиз физ алахъзавайбуруз ракъурнавай аят (мана): «Али Имран» сура, 85-аят».
Пайгъамбардиз ﷺ ракъурнавай Къуръандикай къе дуьньяда гужлу рахунар физва. Къуръан инкар ийизвайбуруз гила адан чIалан гуьзелвал ва дерин мана аквазва. Вири дуьньяда машгьур жуьреба-жуьре динрин алимрини Къуръан тестикьарзава, ам ракъурнавай Пайгъамбардин ﷺ гьакъикъивал хиве кьаз, ва ада гъанвай дин кьабулзава (1. Америкадин космонавт Нил Армстронга, вацрал азандин ван атана, Ислам кьабулна. 2. Урус писатель Лев Николаевич Толстой. 3. Жак Ив Кусто, французрин алим-океанолог, гьуьлер ахтармишдайди. 4. Роже Гароди, французрин писатель, философ, Франциядин Коммунистрин партиядин ЦК-дин член, коммунистрин «Юманите» газетдин кьилин редактор. 5. Морис Бежар, французрин хореограф. 6. Французрин алимар Луи Масиньон, Рене Генон, Ева де Витрай, Морис Бюкай. 7. Леопольд Вайс (Мугьаммад Асад), Австралиядин алим. 8. Ингилис алимар Ричард Бертон, Мармадуюк Пикхтоль, Мартини Лингз, Кэт Стивенс. 9. Швейцариядин алимар Титус Буркхардт, Роже дю Паскелье. 10. Немс Фритхов Шоун ва мсб. Францияда 100 000 касди Ислам кьабулна). Абуруз чизва хьи, ам эхирдай ракъурнавай ва маса динар амал аламачирбур яз малумарзавай Аллагьдин ﷻ Калам тирди. Чирвилер ва акьул авай вири, а чирвилерал амал ийиз, бутпересвилихъай къакъатзава ва Исламдиз къвезва.
Ингье имам Магьди къведай вахт мукьва хьанва ва цаварай Ругьуллагь Иса эвичIда. Магьдидин куьмекдалди ада Дажал ва адан терефдарар алчахарда. А вахт атайла, бахт ганвай гьар са кас гьич шаклу тахьана Исадин гуьгъуьна аваз фида. Гила зани виридаз веси ийизва, алимризни, авамризни: Иса эвичIнавайди акурла, адан гуьгъуьниз алад. Вуж Ругьуллагь ибн Марьямаз, Аллагьдин ﷻ пайгъамбардиз акси яз экъечIайтIа, ам динда рекьелай алатда. Адан гуьгъуьниз фейи вири, кIантIа хашпараяр, чувудар ва я мусурманрин уммат хьурай, дуьз рекьел жеда.
Я вири Алемдин Пачагь! Ви лукIар, рикIера нур туна, дуьз рекьел эциг, абуруз дуьз рехъ аквадайвал. Ваз ибадат авун патал халкьнавайди чин тийизвай авам инсанриз чирвилерин варар ахъая. Чун а кар чизваз халкьнаватIани, чаз Ваз ибадат ийидай алакьун бес жезвач, чаз Ви багъишламишун це! Я Мергьяматлуди ﷻ, вичин сифте кьил Пайгъамбардилай ﷺ башламишзавай устазрин цIиргъ атIудач лагьана, Вак умуд ква.
Сивяй лагьай гафар къизилдин яд ганвай ракьуз ва я цуруниз тешпигь я, эгер рикIе Аллагьдихъай ﷻ кичIевал авачтIа. Нагагь руьгьдин къуватди, гунагьар себеб яз рикI кIевнавай перде кун тавуртIа, рикIи инсандиз секинвал гудач. Чна, чирвилер ва акьул авай чIехибуру, чун тупунал къугъвазвай аялри хьиз тухвана виже къведани кьван?! Эгер Шариат кьиле тухун тавуртIа, тIарикъатни чIур жезва хьи, тIарикъат чIурзавай кар вучиз ийида кьван?!
Заз виридалайни залан кардикай лагьайтIа – им гайи тапшуругъ тамамардай сухтаяр жагъизвач. Адалай гъейри, зи рикIин хер сагъариз манийвалзавай шей – им тадиз гьялна кIанзавай месэла ахъайдай мумкинвал тахьун я. Вуч ийида, эгер пурар янавай кьенерар алай балкIан гъайила, адал ацукьиз чин тийидайла?! Эгер ихтибар ийиз жедай сандухда хвена кIанзавай гевгьер гьамбарханадиз гадарайтIа, ам чуьнуьхдачни мегер?! Гьуьлуьн кIане авай тIебиатдин девлетар цел алай кфадихъ галаз гекъигун кутугнавани кьван? ЧIуру емишар кIватIиз дуьзен чуьлда яшамиш хьайи касдиз ахпа багълар хьайила, вучиз ада шукур ийизвач?! Гьатта халкьди вун цаварал кьван хкажайтIани, вун Халикьдин ﷻ лукI тирди рикIелай алудна виже къведач. Гьатта вири инсанри, та мез галат жедалди, тарифар авуртIани, инсандиз вичин алакьунар вичиз чир хьун лазим я.
Амма ятIани, эхирдай аялриз насигьат гуз кIанзава, вичикай гзаф менфят авай а касдиз, нивай ам хкудиз хьайитIа, - им талукь я алимдизни, авамдизни, девлетлудазни, кесибдизни, гьар са мукалляфдиз (яш тамам хьанвай, вичивай гьахъ-гьисаб ийидайди). Ам лугьуз регьят я, амма амал ийиз четин. Эгер чавай акI ийиз хьайитIа, ада вири крара винизвал гуда. Адал амал авуртIа, алимар жезва, гьатта ктабар кIел тавуна, ва илимар кIелай касдиз – чешне. Месела, нагагь вун хьтин са маса инсандихъ галаз рафтарвилер ийидайла, адаз са вуч ятIани ийиз ва я лугьуз кIан хьайитIа, сифте адан чкадал жув эциг. Ахпа фикирдиз къачу ва хъсандиз фагьума, ам ви чкадал эцигна. Ваз гьикI жеда, эгер ваз ийиз кIанзавай ва я лугьуз кIанзавайди ада ваз авуртIа ва я лагьайтIа? Нагагь а кар ва я гаф ваз бегенмиш тахьайтIа, сагълам рикI аваз, вуна акI авуна кIандач. Эгер ваз а кар таз кIан тахьайтIа, вун гьахъ жедач, ва акI хьайила, ваз дуьз рехъ герек туш. Вун гьуьжетчи жеда ва тахсир вак кутада, ва инсанрин арада вун алчах жеда. Чилел Ислам хьтин михьи къурулуш алач ва адаз гьуьрмет тавур касдиз бахт жедач. Низ эхирда авай, гуьгъуьнлай къвезвай бахт кIанзаватIа, вичиз тахьана кIанзавай кар масабуруз ийидалди, ада вич тадиз магълуб хьайидай гьисабун лазим я! Нивай вич кIаник акатун кьабулиз хьайитIа, ам Аллагьди ﷻ виниз акъудда ва ам и дуьньядани, эхиратдани бахтлу жеда.
Я ягъалмиш хьанвайбуруз хъсан рехъ Къалурзавайди, акьалтзавай несил дуьз рекье тур, абуруз бахтунихъ гъидай къилих гана. Я Аллагь ﷻ, куьмек це а сухтайриз, вуж медресадиз атайла чирвилер къачуз алахъзаватIа. Аксивал ийиз, Исламдиз манийвал ийизвайбуруз анжах са Вавай акьул гуз жеда. Гъилер ивида авайбур къудратдин къамчидалди ягъ, Вун акьул татайбуруз жаза Гузвайди я хьи. Чаз куьмек це, гьикI Бадрдин женгина, аскерриз таквадай кьушундин къуват багъишна, куьмек ганатIа. Я вири Алемдин Пачагь, Намрузан кьушундал ветIерин кьушун ракъурай, чна Вак умуд кутазва.
Ви Шариатдихъ галаз кьан тийизвай гафарай ва крарай чна гьар юкъуз туба ийизва, чалай гъил къачу, Рабби ﷻ. За Ви регьимдик умуд кутунва, зи туба вич гьамиша тубадихъ муьгьтеж я эхир. Я Мергьяматлу Аллагь, ви регьимдиз сергьятар авач ва Ви регьим ажугъдилай вилик ква. Чаз Вахъай регъуьзва, чаз виликдай авай умматриз авачир кьезилвилер авунва хьи.
За диндин стхайривай ва вахаривай дуьа тIалабзава ва алатай уьмуьрдикай за гьайиф чIугвазва. Къе зи гьал, ишлемишай далу авай ламран гьалдиз ухшар я, ва пар, кьел хьиз, залан я. Вахт заз тIимил ава, гъилерни зи устIарвал квачирбур я, амма, гьикI ятIани, ктаб эхирдив агакьнава ва Аллагьдин ﷻ куьмекдалди шииррин жуьреда Аллагьдин ﷻ пайгъамбаррикай кхьенвай кьиса кьилиз акъатна. Я Аллагь ﷻ, за лазим яз гьисабна ва девирдин истемишунриз килигна кхьенвай вири гьикая халкьдиз менфят жедайди ая, гьатта ам кхьиниз зун лайихлу туштIани, ва адакай михьи келимаяр ая, ам патал Вуна заз туьгьмет тийидайвал. Зи патай салават ва салам играми Агьмадал ﷺ, адан хизандал ва асгьабрал агакьара, гьакIни абурун рекьяй фейи ва Ви Шариат хвейи умматдин имамрал.
Амин Аллагь, я Аллагь! Амин Аллагь, я Аллагь! Амин Аллагь, я Аллагь! Кьабула, я Рабби ﷻ.
