Гьусайн Меккадай Куфадиз гьикI фенатIа
Гьусайн Меккадай Куфадиз гьикI фенатIа
эвел алатай нумрайра
Али-чIехиди Шафидихъ (Аллагьдихъ) ﷺ галаз гуьруьшмиш жез фейидалай кьулухъ, Гьусайн лув галамачир къуш хьиз, текдиз амукьна. Вичин играми хва Гьабибдин ﷺ патав мугьмандиз рекье туна, ам вич адан гуьгъуьниз физ гьазур хьана.
Ада женгера ахтармишнавай гапур къачуна, балкIандал ацукьна ва, хизан алачухдик туна, кьушундин вилик акъвазна. Ада вичиз хаинвал авуна лагьана, абур тахсирлу авуна: «Эй, заз эверай ва гапурралди къаршиламишай, Куфадин агьалияр, пака квез вири чир жеда. Такабурлу хьун герек туш! КичIе жедай йикъара Арасатдал чун сад-садан къаншарда акъвазда. Сивериз муьгьуьр ядай, бедендин паяр рахадай юкъуз квез Гьабибдин ﷺ шафаат герек къведа. Вири уммат Гьабибдал ﷺ элкъвена кIватI хьайила, амма куьн кьабул тавурла, гьа чIавуз квез чIулав югъ алукьда. Ивидихъ маса къачунвай дуьньядин мал-девлетди квез яргъалди шадвал гудач. Расулдин ﷺ мукьвабур къирмишайбуруз жаза гудай варисар жагъида. Ибн Са`дан кьушундик икьван гзаф тахсирар кутурдалай ва кичIерар гайидалай кьулухъ, ада гапур акъудна. Чан аламаз амукьдайдакай умуд атIана, ада кьиникьин ният авуна ва, хизандиз сагърай лагьана, душмандал вегьена. Ада гзаф лянет хьайибурун кьилер атIана ва ада ягъай гзафбурай иви авахьна. Адан хура акъвазна дяве авурбурукай ада садални чан тунач, амма вич чан алаз вичин мукьвабурун патав хтана. Ада кIвалинбур вири кIватIна, абуруз сабур авуниз эвер гана, вязер ва насигьатар кIелиз абур секинарна, абуруз душманар шадар тийидайвал шехь тавун ва архайин хьун буйругъна, гьикI хьи куьмекзавайди Аллагь я.
Цихъай атIанвай ва четин гьалда гьатнавай Расулдин ﷺ хизанди суза ийизвай ва кьилди амукьнавай Гьусайнни цихъ къанихвиляй гьелек хьанвай. Эхиримжи сеферда Гьусайна гапур къачуна, балкIандал ацукьна ва, мукьвабур алачухдик туна, экъечIна. Расулуллагьдин ﷺ хтул, элкъвена хкведатIа чин тийиз, кьушундин вилик акъвазна. Гьусайна гьулдандин гапур акъудна ва лекьре хьиз кьушундал вегьена. Ада Аллагьдин ﷻ куьмекдалди ажугълудаказ дяве ийизвай. Икьван чIавалди хьайи са дяведани ада гьа юкъуз кьван гзаф инсанар кьенач.
Адаз, арадай рехъ авуна, Евфратдин къерехдал физ кIан хьана, амма адан вилик кьушун галаз Жавшанан хва алчах Шамар экъечIна. Гзаф иви экъична, санбар аскерар телеф хьана, амма Аллагьдин ﷻ душманри Евфратдал физвай рехъ атIана. Гьусайн вичин мукьвабурун патав хквез алахъна, амма кьушунди ам элкъуьрна кьуна, бязибуру лагьайтIа, агьль аль-байт авай алачухрални гьужумиз хьана. А кар акваз Гьусайнан рикIиз тIар жезвай ва ада душманриз лагьана: «Эй, имандикай магьрум хьанвай тайифа! Ягь ва намус кьванни хуьх! Аяларни дишегьлияр секиндиз тур, абуру квехъ галаз дяве ийизвач хьи!» Шамара аяларни дишегьлияр тун буйругъна ва вири къуватар Гьусайназ акси яз ракъурна. Патав къвез кичIебурукай са ажуз рикI авайда ахъаяй хьел Гьусайнан пелехъ галукьна. Хер хьанвай асланди жанавурар къазундачни кьван?! Гьусайна кичIевал тийижиз мад дяве ийиз башламишна. Мад барабар тушир дяве гужлу хьана ва Кербелада ивидин цIийи вацIар гьарнихъ авахьна.
Гьусайнални еке хирер хьана. Зараата гапурдалди яна адан чапла гъил галудна. Амр ибн ТIалгьата ам кьулухъай яна ва сайидан далудал дерин хер авуна. Санан ибн Анас Нахаиди ахъаяй хьел Гьусайнан хуруда акIана. Салигь ибн Вагьба гапур адан руфуниз сухна ва Гьусайн, къуватсуз хьана, балкIандилай аватна. Ам чилел аватна, вичин жендекдилай гъил чIугуна, ахпа гьа ивидай хьанвай гъил кьиливайни чурудивай гвяна ва эвер гана: «Я Аллагь! Гьа икI зун Ви вилик акъвазда!..»
Гьусайнал мунафикьрин кьушун элкъвенвай ва садавайни жуьрэт авуна адан патав физ жезвачир. Умар ибн Са`д ажугъламиш хьана вичин аскерриз гьарайиз гатIумна ва Гьусайнан кьил атIун буйругъна. Имансуз тайифадин ягъалмиш хьайи вагьшийри чпин Расулдин ﷺ рушан хва кьена. Жегьеннем патал халкьнавай хаинрикай виридалайни писбур, ам кьена, чпин мураддив агакьна.
КьатI ама.
