Абу Бакр ас-Сиддикьакай кьисаяр
Абу Бакр ас-Сиддикьакай кьисаяр
Абу Бакр инсанрикай виридалайни жуьрэтлуди я.
Са сеферда Али ибн Аби ТIалиба, вич халиф тир вахтунда, вяз гудайла инсанривай хабар кьуна: «Куьне гьикI фикирзава, инсанрикай виридалайни жуьрэтлуди вуж я?»
Абуру лагьана: «Я мусурманрин гьаким, ам вун я». «Закай лагьайтIа, - лагьана Алиди, - душмандихъ галаз сад-садан хура акъвазна дяве ийидайла, зун садрани кIаник акатайди туш, амма, ятIани, чакай виридалайни викIегьди Абу Бакр тир. Са женгина чна Пайгъамбар патал алачух яна. Адал йифиз къаравулвал авун лазим тир. Асгьабри чпин арада Аллагьдин Расулдал ни къаравулвал ийида лугьуз сада-садавай хабарар кьаз хьана. Абу Бакралай гъейри, садавайни рикI авуна а алачухдин патав физ ва вичел ам хуьнин жавабдарвал къачуз хьанач. Анжах са ада вичин гапур къакъарай акъудна ва Аллагьдин Расулдин патав акъвазна. Гьакъикъатда, ам виридалайни жуьрэтлу инсан тир».
Ахпа ада давамарна: «За Аллагьдал ﷻ кьин кьазва, заз акуна гьикI Меккада къурайшитар Аллагьдин Расулдал элкъвена кIватI хьана адан намусдик хкIадай кар ийиз кьетIнатIа. Абурукай сада ада эцязавай, сада вегьена адан парталар кьазвай. Абуру адаз лугьузвай: «Им вун яни чи бутрикай са Аллагь авунвайди?!» А вахтунда Абу Бакралай гъейри садани Пайгъамбардин патав физ ва адаз куьмек гуз жуьрэт авунач. Ада Пайгъамбардиз куьмек гуз тади авуна. Ада Аллагьдин Расулдин патавай инсанар эцяна къакъудзавай, абур язавай, абурухъ галаз кикIизвай ва лугьузвай: «Квез бедбахтвал жеда, анжах инсанди: «Зи Рабби – Аллагь я» лугьуз акурла, яраб куьне ам яна рекьида жал?»
ГьакI лагьана, Алиди вичин чин абадалди кIевна ва шехьиз гатIумна, та накъвари адан чуру кьежирдалди».
Али ибн Аби ТIалиб Абу Бакракай
Садра Али ибн Аби ТIалиба инсанривай жузуна: «Тавакъу ийида, заз лагь, инсанрикай вужар хъсан я – фиръаванан инсанрикай иман гъанвайбур (чпин иман чуьнуьхзавай ва фиръаванахъай кичIезвай) ва я Абу Бакр? Инсанри адаз жаваб ганач ва шехьиз гатIумна. А вахтунда Алиди лагьана: «За Аллагьдал ﷻ кьин кьазва, фиръаванан тайифадай тир иман гъанвайбурай ацIанвай вири чилелай Абу Бакран уьмуьрдай са сят хъсан я. Абуру чпин иман чуьнуьхзавай, Абу Бакра лагьайтIа, адакай виридаз ван къведайвал лагьана».
«Пайгъамбардин халифрикай 600 кьиса» ктабдай
