Абу Бакр ас-Сиддикьакай кьисаяр
Абу Бакр ас-Сиддикьакай кьисаяр
Абу Бакра лукIар азад ийизва
Абу Бакра Аллагьдихъ ﷻ инанмиш хьанвай лукIар маса къачузвай ва азадзавай, вучиз лагьайтIа абуруз чпин иесийри пис азабар гузвай.
Са сеферда адаз Меккада Нагьдия тIвар алай дишегьлини адан руш акуна. Абур сифте дин кьабулнавайбурукай тир. Абуру чпин гъилери кьуна Бани Абди Дар тайифадай тир абурун бикедиз гъуьр тухузвай. Мусурман дин кьабулнавай дишегьлийриз ада ажугъвилелди гьарайзавай: «За Аллагьдал кьин кьазва, за куьн са вахтундани лукIвиликай азад ийидач». И гафар ван хьайила, Абу Бакра адаз лагьана: «Я дишегьли, вуна кьунвай кьиникай туба ая».
- Жува туба ая, - жаваб гана ада, - вуна абур рекьелай алудна, вуна гила азадни ая!
- Ваз абурухъ гьикьван кIанзава? – хабар кьуна Абу Бакра.
Ада вичин къимет лагьайла, Абу Бакра лагьана: «За абур вавай маса къачузва ва къенин йикъалай абур азад я. Вахце адав адан гъуьр», - буйругъна Абу Бакра. «Белки чна сифте чи кIвалах куьтягьин?» - жузуна абуру. «Эгер квез гьакI кIанзаватIа», - лагьана ада.
Аллагьди ﷻ Абу Бакракай лугьузва
Абу Бакра мукьвал-мукьвал иман гъанвай лукIар азадзавай. Гьа са вахтунда адаз Аллагьдин ﷻ разивилелай гъейри са затIни кIанзавачир. Садра бубади адаз лагьана: «Я Абу Бакр, вуна зайиф къуватсуз лукIар азад ийизва. Ваз хъсан жедай, эгер вуна лукIвиликай къуватлу ва жегьил итимар азад ийизвайтIа. Ваз четин вахтар хьайила абурувай вун хуьз жедай». Абу Бакра адаз жаваб гана: «Я буба, за ийизвай кар за анжах Аллагьдин ﷻ разивал къазанмишун патал ийизва».
Идалай кьулухъ Аллагьди ﷻ Абу Бакран патахъай Дувандин югъ алукьдалди кIелдай ихьтин аятар ракъуруна тажуб жедай са карни авач:
«Ни садакьаяр гузвайтIа ва Аллагьдихъай ﷻ кичIезвайтIа, ни виридалайни хъсан крар хиве кьазвайтIа, Чна регьят кардиз рехъ кьезиларда. Вуж мутIлакь тиртIа ва вич са шейинихъни муьгьтеж туш лугьуз фикирзавайтIа, ни виридалайни хъсанди таб яз гьисабнатIа, Чна адаз четин кардиз рехъ кьезиларда. Ам кьейила мал-мулкди ам къутармишдач. Чна дуьз рекьяй тухузвайди я. Эхиримжи уьмуьр ва сифте уьмуьр Чибур я. За куьн ялав алаз кузвай цIукай виликамаз хабардар авуна. Аниз анжах виридалайни бахтсузди фида, ни гьакъикъат таб яз гьисабзаватIа. Аллагьдихъай кичIеди адавай яргъа жеда, ни вичин девлет пайзаватIа, михьи хьун патал, ва гьар са регьим тамамвилелди эвез хъийизватIа. Анжах Аллагь Тааладихъ гьерекатун патал. Ам гьикI хьайитIани рази ийида» («Аль-Лайл» сура, 5-21 аятар).
