Имам Магьди атуникай куьруь кьиса
Имам Магьди атуникай куьруь кьиса
Гила, дуьньядин эхир мукьва жедайла ачух жедай лишанрикай, тIимил баянар гун. Абурукай гзафбур хьанва ва чаз абур аквазва. Гьеле ачух тахьанвайбур – лап чIехибур я.
Аллагьдин Расулди ﷺ виликамаз, дуьнья явавилера акIидалди ва Дувандин югъ алукьдалди, вуч жедатIа лагьана. Вири чил гужар авунай ва адалатсузвиляй ацIайла, къайда хтун патал имам малум жеда. Ктабра лугьузва хьи, адан тIвар Мугьаммад ва я Агьмад я, адан бубадин тIвар – Абдуллагь. Гьабибди ﷺ адакай ахъайнавай гьадисриз талукь яз лагьайтIа, абур лап гзаф ава. Ам чна гуьзлемишзавай имам Магьди я, ва ам атун инкарзавайбурухъ инанмиш жемир, вучиз лагьайтIа ТIагьади ﷺ гьакъикъатда ам къведа лагьана, гьатта а кар дуьньядин эхир жез са югъ амаз хьайитIани.
Низ имамри агакьарнавай якъин гьадисар чир хьана кIанзаватIа, ктабриз килиг. Гьабибдин ﷺ вири гьадисра якъиндиз лагьанва хьи, Магьди – адан несилдай я. Лугьузва хьи, адаз иер винел патан акунар ава, чинин кIалуб арабдин хьтинди я, бедендин кIалубдалди израилвийриз ухшар я. Ахпа лагьанва: «Чалай башламишай дин Магьдидал куьтягь жеда, амни чакай я (зи несилдай)». Адалай артух яз, тIарикъатдин терефдарриз шадвал ава: имам Раббаниди лугьузва хьи, накъшубанди тIарикъатдин цIиргъ дуьньядин эхирдиз мукьва вахтуналди атIудач ва имам Магьди гьа тIарикъатда жеда. Чал михьи яз агакьай тIарикъат, дегиш тежер бине авай, гьахьтин дегиш тахьай, михьи жуьреда адал агакьда.
Ам накъшубанди тIарикъатдин кар давамарзавайбурукай эхиримжиди я ва адалай кьулухъ мад муршидар жедач. Адал къе чан ала, амма инсанрихъай чуьнуьхнава ва чил зулумдай ацIайла, ам малум жеда.
Дувандин югъ мукьва хьунин гьеле ачух тахьанвай лишанриз талукь яз лагьайтIа, сифте имам Магьди малум жеда, ахпа Дажал къведа, адалай кьулухъ Иса эвичIда, ахпа Дабат аль-арзи лугьудай гьайван акъатда. Адалай кьулухъ рагъ рагъакIидай патай экъечIда, чилелай Къуръан къахчуда, анжах михьи чарар тада. Дажал яна кьейидалай кьулухъ Яжуж-Мажуж (Гог ва Магог) къведа. Инсанри Магьди имамвиле хкяда ва Ибрагьиман макъамдинни Гьажар аль-Асвад (ЧIулав къван) авай пипIен арада адаз вафалувиле кьин кьада. Лугьузва хьи, им Ашурадин юкъуз жеда (Мугьаррам вацран цIуд лагьай югъ). Магьди малум хьунин эхиримжи лишан Рамазан вацран сад лагьай йифиз Варз кьун ва цIувад лагьай юкъуз Рагъ кьун жеда. Абур гьич тахьай хьтин Рагъ кьун ва Варз кьун жеда. Ахпа Хорасанда лянет хьайи Дажал пайда жеда, чувударни туьрквер адан гуьгъуьниз фида, ва лагьанва хьи, са Исфахандай адан гуьгъуьна аваз пудкъанни цIуд агъзур кас фида. Маса риваятда лугьузва хьи, Магьди малум жедай йис жуьт туширди жеда ва ам имамвиле хкягъайдалай кьулухъ, ам кIуьд йисалай гзаф яшамиш жедач.
Магьди атун дуьньядин вири мусурманар патал гзаф шадвал жеда. Цава авай малаикар, къушар, гьашаратар – шадвал къалур тавур гьатта гьайванни амукьдач. Масжид аль-Гьарамда адаз кьин кьадай инсанрин кьадар Бадрдин женгина иштиракайбурун кьадардиз барабар жеда, абур лагьайтIа пуд вишни цIипуд авай, ва кьин кьурдалай кьулухъ сифте гаф, далу Кябедихъ агалтна, халифди лугьуда. Ахпа ада Къуръандай ихьтин манадин аят кIелда: «Аллагьди квез ганвайди (Бакъиййатуллагь), куьн патал хъсан я, эгер куьн инанмиш хьайитIа». Ахпа алава хъийида: «Зун гьа кас я, Аллагьди квез ганвай, ва Адан сердер я» ва вичин рахун куьтягьда. Адаз ихьтин гафаралди салам гуда: «Ассаламу алайка, я Бакъиййатуллагь фи-ль-арзи».
Ахпа Бакъиййатуллагь Куфадиз фида ва вири патарихъ кьушунар ракъурда. Гьадисда лугьузва хьи, гьавада, адан винел малаик жеда, ада икI лугьуда: «Им Магьди я – чилел Аллагьдин ﷻ сердер, адан гуьгъуьна аваз алад!»
КьатI ама.
Шейх Саид эфенди, «Пайгъамбаррин кьисаяр 2-пай» ктабдай
