Аллагьдиз дуьа авунихъ галаз алакъалу бязи месэлаяр
1.Усама бин Зайда агакьарайвал, Аллагьдин Расулди лагьана: «Эгер вичиз хъсанвал авур касди ам авурдаз лагьайтIа: «Къуй Аллагьди ваз хъсанвал гурай!» (Жазака-Ллагьу хайран!), - ада вичин разивал къалуруналди лазим тирдалай гзафни авуна» (АтТирмизи).
2. Жабира агакьарайвал, Аллагьдин Расулди лагьана: «Куьне куьн, куь аялар, куь малдевлет лянетламишун тIалабмир. Нагагь ам Аллагьдивай хъсанвилер тIалабзавай вахтунал ацалтайтIа (яни инсанрин дуьаяр кьабулзавай вахт), Ада квез жаваб гуда» (Муслим).
3. Абу Гьурайради агакьарайвал, Аллагьдин Расулди лагьана: «ЛукI вичин Раббидиз виридалайни мукьва жезвай вахт – им Адаз сажда ийизвай вахт я, гьавиляй гьахьтин вахтара мукьвалмукьвал Адавай тIалаб» (Муслим).
4. Абу Гьурайради агакьарайвал, Аллагьдин Расулди лагьана: «Квекай гьар садал жаваб агакьда, эгер анжах адак тади акатиз икI лугьун тийиз хьайитIа: «За Аллагьдивай тIалабна, амма заз жаваб ганач!» (Аль-Бухари, Муслим).
Муслима гъизвай и гьадисдин жуьреда лугьузва хьи, са сеферда Пайгъамбарди лагьана: «Аллагьдин лукIран дуьайриз акьван чIавалди яб гуда, та ада Аллагьдиз гунагьдин крарин патахъай ва я мукьвавилин араяр атIунин гьакъиндай дуьаяр ийидалди ва ада жавабдин патахъай тади тавуртIа». Инсанри адавай жузуна: «Я Аллагьдин Расул , тади авун вуч лагьай чIал я?» Пайгъамбарди лагьана: «Ам ада икI лугьуда лагьай чIал я: «За Аллагьдивай мад ва мад тIалабна, амма Адаз заз жаваб гуз кIанзавайди хьиз аквазвач!», - ахпа адаз дуьаяр авун залан жезва ва ада мад хъийизвач».
5. Абу Умамади лагьана: «Садра Аллагьдин Расулдивай жузуна: «Гьихьтин дуьадиз жаваб гуда лагьана виридалайни гзаф умуд кутаз жеда?» Ада лагьана: «Ам йифен юкьва, гьакIни ферз тир кпIарилай кьулухъ Аллагьдиз ийизвай дуьаяр я» (Ат-Тирмизи).
6. Убада бин ас-Самита лагьана: «Са сеферда Аллагьдин Расулди лагьана: «Дуьньядал яшамиш жезвай гьи мусурманди хьайитIани Аллагь Тааладиз дуьаяр авуртIа, Аллагьди гьар гьикI хьайитIани адаз тIалабайди гуда, я тахьайтIа ада тIалабай затIуниз барабар тир писвал адалай алудда, эгер анжах ада гунагьдин са затIни ва мукьвавилин араяр атIун тIалаб тавуртIа». Инсанрикай сада лагьана: «АкI ятIа гила чна мукьвалмукьвал дуьаяр ийида». Пайгъамбарди лагьана: «Аллагьди квез артух гуда (яни тIалабайдалай артух)» (Ат-Тирмизи).
Аль-Гьакима гъизвай Абу Саид аль-Худриди агакьарай и гьадисдин жуьреда лугьузва: «… ва я ада тIалабай затIуниз барабар тир савкьват адаз гьазурда».
Масадан патахъай Аллагьдиз дуьа авунин лайихлувал
Аллагь Таалади лагьана: «Абурулай гуьгъуьниз атайбуру лугьуда: «Я чи Рабби! Чалай ва динда чалай вилик акатайбурулай (яни чалай вилик инанмиш хьайибурулай) гъил къачу…» («Аль-Гьашр» сура, 10-аят).
Аллагьди гьакIни лагьана: «… жуван гунагьдилай ва инанмиш тир итимрилайни дишегьлийрилай гъил къачун тIалаб» («Мугьаммад» сура, 19-аят).
Аллагьди гьакIни лагьана (яни ибур Аллагьди Къуръанда гъанвай Ибрагьим пайгъамбарди лагьай гафар я): «Я чи Рабби! Гьахъгьисаб ийидай Юкъуз залай, зи дидебубадилай ва мусурманрилай гъил къачу!» («Ибрагьим» сура, 41-аят).
1. Абу-д-Дардади агакьарайвал, адаз ван хьана Аллагьдин Расулди икI лугьуз: «Исламдихъ инанмишвал ийизвай Аллагьдин гьи лукIра хьайитIани чкадал алачир диндин стха патал Аллагьдиз дуьа авуртIа, адан патав гвай малаикди гьамиша лугьуда: «Вазни гьам гурай!» (Муслим).
2. Абу-д-Дардади агакьарайвал, Аллагьдин Расулди лагьана: «Мусурманди вичин диндин стха алачир чкадал ам патал ийизвай дуьа кьабулда, вучиз лагьайтIа адан патав кьетIен тапшуругъ ганвай малаик гва ва гьар сеферда ада вичин стхадиз хъсанвал тIалабиз Аллагьдиз дуьа ийидайла, тапшуругъ ганвай гьа малаикди лугьуда: «Амин, вазни гьам гурай!» (Муслим).
«РИЯЗУ САЛИГЬИН» КТАБДАЙ.
