Пикридухъеная
Гьарил бархIи – ЧевяхIси Аллагьла ﷻ савгъат саби. Хъуммартид иличила челябкьлаличила паргъатагарти ва кьакьати пикрумазив. Арбякьунсиличила децI, шишимъала ураса… Ца Аллагьличицун ﷻ хъарахъи ва гьаладяхI вашен!
Дурхъаси хIядислизиб бурили саби: «БегIлара Аллагьлис ﷻ дигути
сари ишди авал дев: «СубхIянаЛлагь» – Аллагь ﷻ умуси, «АльхIамдулиЛлагь» – Аллагьлис деза, «Ла илагьа илла Ллагь» – Аллагь ﷻ цацун сай левси, «Аллагьу акбар» – Аллагь ﷻ ЧевяхIси. Чидилличивад илди дурес вехIихьадра хIед гIяхIдешцун бирар. Баахъибси (Муслим).
МухIяммад Идбаглизи ﷺ хьарбаили саби: «Алжайзи викес багьандан се сабабли бируси?»
«Аллагьлизивад ﷻ урухкIни ва гIяхIти хасиятуни, адабдеш», - буриб илини.
ГIур хьарбаили саби: «Адамти Жагьанаблизи биркнила сабаб се саби?» «Лезми ва гIаврат», - сабри жаваб. (Тирмизи, Ибн Маджа).
ЦацабехIтала кьяшми агара, дехIибайчи кабизес багьандан, цархIилтала някъби агара, дугIя барес, цацабехIти гъайбикIес хIебалули «Аллагьу акбар» ирес бирули ахIен, итилилти мицIирли агара уркIи-уркIилабад сужда барили ванзаличи анда чекабаахъес…
Амма леб саби мицирли хьалли, уркIби дебкIибтира…
БебкIала малаик викIар: «Ну бархIили шуйна ва дугели шуйна
адамтала дяхIла хIерикIусира илдала сягIят сабаилил багьес багьандан» (Табарани).
Ца давлачевлизи хьарбаили саби: «ХIу секьяйда давлачеввиубсири?» «Наб бакьира хIядис: «Садакьа бирусила лебдеш гьатIира имцIабируси ибси ва Аллагьличил ﷻ абзикира», - буриб илини. Нуни садакьа бедира, Илини биалли наб гьатIира имцIабариб, нуни бедира, Илини гиб… ва ахирличив ЧевяхIси Аллагь ﷻ чедиикиб».
ВирххIерхуси иманагарси адам чеибхIели – шукру бирен Аллагьлис ﷻ хIед Сунени гибси имайс. ЗягIипси яра чулахъси чеадли – шукру бара хIед арадеш гибнилис. Багьуди агарси чеадли – баркалла ирен, хIуни багьуди каснилис. Селра агарси мискин чеадли – шукрвикIен Аллагьлис ﷻ хIед лебдеш гибнилис. Сукъурси чеадли – шукру бара, хIед ЧевяхIсили гибси хIулбала шалалис. ГIянцIси чеадли –Аллагьлис ﷻ деза бара хIед бикьни багьандан. Алавчарли хIеризи, сецад адамтала агарал хIед Аллагьли ﷻ гибтицад нигIматуни ва шукру бирен.
