Редакциялизи суал

- Хъулкидеш дарнилис бусурмантани сегъуна танбихI бируси?

 ШаригIятла низам-кьяйда дузахъути мераначир хъулкила някъ чеббирхъуси саби ишди шуртIри диалли:

1) балугълаваибси;

2) дагьричевси;

3) бигIунсила багьа динарла 1\4 бутIаличиб имцIа биэс гIягIниси саби;

4) бигIунсилизиб хъулкила бутIа хIебиъни;

5) бигIунси секIал хъулкила вегIдешлизиб хIебиъни.

Цайна секIал бигIунсила балуй някъла бекI някъ чеббирхъуси саби;

кIинайс бигIялли, алгъай кьяшла бекI кьяш;

хIяйнайс бигIялли, алгъай някъла бекI кьяш;

авнайсра бигIялли, балуй кьяшла бекI кьяш чеббирхъуси саби.

Илала гIергъира хъулкидеш дирули виалли, имамли илис лайикьси диван бируси саби.

- Секьяйда ахъвиэс гIягIниси суждаличивад: гьаланачи кьукьуби ахъдурцутив, някъбачи хъарахъили, яра някъби ахъдуцили гIур кьукьуби ахъдурцутив?

- ГIялимтала пикри хIясибли, дехIибайчивси адамлис гIергъиси ракагIятличи ахъвирухIели, гIяхIси саби някъбачи хъарахъили ахъвиэс. Имам ар – РафигIи викIар, сай сагаси ракагIятличи ахъвируси сай, някъби бетIу балшусиливан ибкьаили.

ЦархIил ахъвирнила жура хIясибли, адам ахъвируси сай гьамадли биахъес някъби урдуртачи ибкьаили ва гIур вархьируси сай. Амма гIягIниси ахIен ца кьяш (чараагардеш хIебиалли) ахъбурцес, гIур кIиибил, сенкIун иличи къадагъа леб.

ХIебиалли, дехIибайчивсилис суждаличивад яра ташагьгьудличивад ахъвирес гIяхIси саби някъби ибкьаили, сенкIун гьалар някъби ахъдуцалли, илдачи хъарахъес бетхIерар. Эгер адамла някъби ибкьаили кьукьуби ахъдуцес бетхIерули биалли, гьаланачи някъби ахъдуцили, гIур илди урдуртачи ибкьаили вархьиэс вирар.

(«Нигьая аль – МухIтаж»).

- ДехIибала хIедирусила дуббуцари кьабулдирутив?

- Рабазан базлизирти дуббуцари исламла динна авъибил бутIали дирути сари, ил ЧевяхIсини бусурмантачи хъарбарибси фарз саби. Илис далилли биубли саби Дурхъаси Кьуръа аят (мягIна): «Ва, дирханти! ХIушаб дуббуцари чеббарили саби» (сура «Аль-Бакьара», аят 183).

Динна кьанунти хIедузахъуси, амма илдала чараагардеш убхIебирхъуси адам бунагькар сай, амма ил хIерхусили ветаруси ахIен.

Эгер адамли дехIибала хIедирули виалли, азгъиндешли яра цархIил багьана хIясибли, амма илди дирес чараагарли гIягIниси биъни марбирули виалли, ил диннизивад дураулхъуси ахIен. ХIебиалли иличи хъарси саби дуббуцари бурцес, Аллагьла ﷻ ахъриличирли илди кьабулдиру.