Хурег балкьарахъни

ТАЛЬБИНА

Нушала Идбаглис ﷺ бегIлара дигуси каш-тальбина мухъила сабри. Бизили тIембикIуси ил халатас ва биштIатас цаван дигахъу. Ил букухIели чарх ванабирар. «Тальбинани зягIипсила уркIи ряхIятбирахъу ва пашмандеш чебарку», – ибси МяхIяммад Идбагла ﷺ хIядис лебси саби Бухарила ва Муслимла сборникуназиб.

Мухъила пайдаличила камти баянти:

Ил ризкьила бухъалализир углеводуни 75 ва белокуни 15 процент леер. Крахмал биалли, дебали камси саби. Илизир В,Е,А,Д витаминтира, кремний, фосфор, калий, кальций, магний, никель, марганец, селен, йод, цинк микроэлементунира лер. Мухъилизир вирусуначи ва бактериябачи къаршити – «лизин» ва «гордецин» лерти сари. Ил багьандан сари мухъила шин, бетIу ва дахни халкьла медицинализир дебали дузахъути. Илдани бемдрила, чимхъаумхитIла, хургьрала, кесмала излумачи къаршидеш диру. Мухъила кьукьри диалли, бактериябачи ва вирусуначи къаршити дармунти дирухIели пайдаладирути сари.

Мухъила дахни

Нушаб гIягIнидиркур:

Мухъила бетIу, шин, ниъ, гIявадеш ва варъа. Бабза лутIиличилси шанг касили, илизи 400 мл ниъла ва 200 мл шинна кертIая ва дубличи абаайчи дицIибти 3 халати кьулса мухъила бетIула какьурли, гIяхIли гъудурдарая. ГIур халаси цIаличи чебизурли, 5-7 минут жургъбирули белхьахъеная. Белхьи гIергъи, кьямлизи кабихьая ва бизидеш хIясибли зе, варъа ва гIявадеш дархаая. Бизидешлис гIуррара корица ва кардамон дархаэсра вирар. Чедаахъибти продуктунала кьадарлизибад хIушала 3 порция кашла детарар. ИмцIали бирадалли, продуктунира имцIадарес чебиркур.

БЯХI ХIЯДУРБАРИБСИ

ЛАЮСА ЮСУФОВА