Сукъурти ва пил
Пулан дубуртала гIелаб ца шагьар лебсири, сунезибра лебилра хIербирути адамти сукъурти. Цагьачам цархIил улкала пачали ил шагьарла мякьлабси авлахъличи чятирти кадяхъес пикрибариб. Илала гIяскарлизиб халаси дявила гьуни ахъибси пил лебсири, сабира дахъал дургъбазиб бутIакьяндеш дирули машгьурбиубси. Ца сунела куцличил илини душманти руржесиулри.
Ил тамашала мицIирагличила хабурти аргъибти шагьарлантас багьес дигулри се сабил пил. Илдазибад чумал вакил къалабабикиб пачала чятирти лерси мерличи баэс. Пилличила селра хIебалути илдани, ил хахамбирес бехIбихьиб. ИлхIелира гьарилли сегъуна-биалра ца бутIа хахамбарили, ил секIайчилацун багьурли, ил мицIирагличила лерил секIал далути кьяйда, шагьарлизи чарбухъес къалабалири. Илди чарбухъунхIели, сабурагарти шагьарлантани илди алавбуциб. Пилличила селра хIебалути илдас гьар секIайчила бархьдеш багьес дигулри. Сукъуртани цали цалис ургабулхъули хьарбиулри се мицIираг сабил пил. ЛихIи хахамбарибси викIар: «Пил – ил дебали халаси, бягIуси ва хъумхърарси кьалтIингъуна саби».
Къянкъ хахамбарибси викIар: «АхIен, хIу хатIавиркулри! Нуни якьинни баласра, пил мешуси саби бацIси турбаличи, урехиласи ва заралласи». «АхIен! ХIуша дикIуси бархьси ахIен, хIуша пил лебси мерла даибтигъунти ахIенра. Пил цIакьси, кьуватла, зантси ва халаси тIалгъуна саби», – викIар хIябэсил, пилла кьяш хахамбарили. Илдала дурути тIашаиб авэсилли, суненира къуйрукъ буцибси: «ХIушани пил се сабил багьес дигадалли, набчи лехIдизирая! Ил бабза гьаягъуна саби, хьарличиб бушкалайчилси». Илкьяйдали, жалтазиб, пил се сабил иргъахъулри гьарилли. Илдазибад гьарилли пилла камси бутIацун сабри хахамбарибси ва лебталалра пикри цалабяхъили баянти дурнила мерлаб, гьарилли сунела пикри иргъахъулри. Илдала дагьрилизи абицIули ахIенри, чули багьурси камси баянна дурабад, гIуррара баянти диэс дирни ва иличирли калунти шагьарлантазира хатIалати ва бархьдеш агарти пикруми гьаладирхьулри.
Илдигъунти адамти нушаургабра къаршибиркули бирар, баянти гьарли-марти диъни ахтардихIебарили, якьиндеш кахIебизахъурли, чус гьанбикибтани бугьули къунби ва гъай-мез адилкьути.
