Айдимир Каймаразовлис – 75 дус

Айдимир Каймаразовлис – 75 дус

Айдимир Каймаразов акIубси сай 1949 ибил дуслизив Сергокъалала районна УбяхI МулебкIила шилизи кабурхуси ЦIурмахьилизив. Ил 40 дусцадхIи районна «Эриндешличи» бикIуси газетализив узи. Россияла писательтала ва журналистунала Союзунала член, ДР – ла культурала урибси хIянчизар Айдимир Каймаразов даргантани поэт, сатирик, журналист сайливан валусири. Илала творчество дигантас ишди назмурти гьаладирхьулра.

Аллагьлизи ﷻ балга

ЧевяхIси Аллагь ﷻ хIези

Азирна шукру биаб,

ХIела кьудратличибли

Бунагькарти камбиаб.

ХIела асхIябталацад

ЦIакь ва хIялалдеш лерти,

Ва Кьудратла ВегI Аллагь ﷻ,

ИмцIабара муъминти.

Нуша гьунчидушеси

Агара караматчи,

Аллагь ﷻ, уркIецIи бара,

ХIеризи хIу нушачи.

Малугад дунъяличир

ГIяргадеш, гаши, дургъби,

ХIялалти нешанала

ЧяхIмадулхъахъид нурбгъи

УркIецIи, ряхIму, хIяя

МадубкIахъид нушазир,

ИмцIабиахъа диги

Адамтала уркIбазиб.

Къяна-къалпли балхути

Мискинбара мамунти,

Я, Кьудратла ВегI Аллагь ﷻ,

Камбара кIибяхIянти.

Бархьдеш набзи гъайбухъун

Чичи лехIизаслира

ГIярзъала цIумъала сар,

«Бархьдеш агара» ибти

Биса гъудурти гъай сар.

ГIяламлизиб изули

Рушбатла изала саб,

БицIхIебицIуси шахли

БяргIяхъили уркIи саб.

Чинаб лебсира бархьдеш?

ХIейрулра ил чебаэс.

Бикаллири вегIебшла

Ца къуйрукъалра буцес.

Бархьдешла гьанаалли,

Илис гIергъиулхъулра,

«ГIевхIейудну, дуцIмайкIуд» -

Илала цIум иргъулра.

Ца дуги муэрлизиб

Бархьдеш набзи гъайбухъун,

Ишди дугьби дурули,

ХIяйранни зигарбухъун:

«Эй, поэт, инжитмайруд,

ХIуни ну хIебургура,

Бамсурли пяхIли буун

ХIушагъунти чумилра.

Ну баргес умцIутала

ЧехIебиулрив кьисмат?

Гъургъаше хIярхIя саби

Илдас лугуси кьимат…»

Бархьдеш гъайбухъи гIергъи

Мурхьли пикриухъунра,

Бархьдеш лебси саб или

Сагадан ватухъунра.

Бархьдеш ахIену нушаб

БерхIи, Бац ва Зубарти,

Цуг-цугли пай бирули

Мискинтасра ухути.

БегIла жагати гIямру

ХIянчилав, архIяличив

ВегIли ункъли хIегьурси,

Гапирни яра валтIни

АхIен баркьуди гIяхIси.

БегIла бизиси, гIяхIси,

Ца саб беркала лебси,

ХIярамдеш барх агарли

ВегIла някъба сархибси.

Иш дунъяла къакъличир

БегIла жагати гIямру,

Бихусила сар илди

Суни Аллагьла ﷻ амру.

Садакьа

Садакьа саб гIяхIси дев,

Мякьлавсилизи бурни,

Гьунчив варгибси гьункья

Машиналичи атни.

Садакьа саби – бархьдеш

МалхIямдешличил бурни,

КIибяхIяндеш агарли

Бархьси хIукму дурайсни.

Гьарил ганз дехIибайчи

АркьухIели кайцIуси,

Садакьа саби салам

ДяхI шалали лугуси.

Садакьа – галга саби

Мякьи алжаннизирси

Садакьа – балга саби

Шантас хIялалбатурси.

Нешла уркIи иргъалри…

Лебил гIяламлис дутIес

ХIела малхIямдеш диур,

Неш, хIела чебла ахъес

Дунъяла мас хIебиур.

Нуша гьаргхIедиахъес

ХIурхъиван хIянриубси,

Нуша гушхIедиахъес

ХIу чуйна гушриубри?

КIантI-кIантIли хIела ахъри

ХIуни нушаб харжбарри,

ХIедисули дусахъес

Азирна гьанкI батурри.

Нуша цIуръабас хъали

ХIуни шалабиради,

Нуша ятимтас анкъи

ХIуни ванабиради.

Нушаб талихI булгули

Чумдарш балга дарири?

Нуша гьанни рузули,

Неш, хIу рухънараири.

Аллагьли ﷻ хIела балгни

Кьабулдарили дургар,

СенкIун вайти агара

ХIела дурхIнала урга.

Нушаб хIейгуси урхIлис

ХIебирули дузулра,

Адамлис гIяхIдеш барес

ГIелумра хIедилзулра.

ХIечила назму белкIес

Ну кьалли къеликIулра.

ХIу черяхIрареси пагь

Набзиб агни балулра.

Иш дунъяла нешани

Саби лебил дурхъати,

БерхIилара нешлара

Саригу дяхI цагъунти.

Эгер гьарил дурхIяли

Нешла уркIи иргъалри,

ГIязабхIебуркIи гIялам

Ахирагар зулмули.