Насрулла ГIямаровлис – 75 дус
Насрулла ГIямаровлис – 75 дус
ГIямаров Насрулла МяхIяммадович акIубси сай Ахъушала районна Ахъушала шилизив, 1948 ибил дуслизив. Россияла писательтала ва журналистунала Союзунала член сай. БучIантас ил кагибти ва мурхьси мягIнала белкIаначивли жявлил тянишси сай. Илала сай вегIти хабуртачил, назмуртачил ва поэмабачил дахъал жузи дурадухъун. Илди-ургар: «Дила дунъя», «Ахъушан ГIяли-ХIяжи», «Гьанбикунала къала», «Гумайла дурсри» ва цархIилтира. ХIушаб поэмализибад бутIа гьалабирхьулра.
Гъазликьян ГIяли
Къазакъунани Ахъ-шаб
Калун урдабяхъили.
Адамдешлис хIяялис
Дахъ цIакьли лардяхъили.
Шимала, махьурбала
Халкьлизи буйрухъ сабри
Дучили чус дедахъес
Скъбанти, чIянкIи, гулби…
Мер-мераначиблебри
ЦIубабала вакилти,
Ахъушара кайхьилри
ЦIубабани штабуни.
ГIякIалис кебисуси
ХIебиулри илдас мас.
ГIурра чули дукулри
Халкьла лерти маза-мас…
Къагъбашунала буйрухъ –
Абхьахъес къахIбахана,
Дубуртала умудеш
Даресра пана-хана.
Бедиб ГIяли-ХIяжини
Гъубзнази бархьси хъарбаркь:
Ца цIябси дугилизиб
Барахъес гьужум ахIмакь!
Шими-махьурбазибти
Къазакъунала тайпа
Ясирбуциб гъубзна,
Тяп тIимкьли буцIи кьяйда.
Илдазирад керасиб
Ябни ва дергъла ярагъ,
Гьанна цIудар-цIяббиуб
Душмантас чемъурси аргъ.
Гъубзназив гъабза сайлин
Вала Шагьумла ГIяли.
Дубуртира хъатдикIи
Ил адам акIубхIели.
Ахъуша — Даргализиб
Къазакъуни буцили,
Керасибти ярагъли
Дигути бегIбирули.
Шайхул-исламличи ил
Вякьунгу тиладили,
Урчи -ярагъ сунесра
Савгъатдарая или.
Хъябда капанра дигьи
Арякьун вахъ гьалакли,
Шагьиддешла бебкIали
Улхус или, гъазали.
ГIяя-Кьакьала майдан
БелхIехъунси къазакъ дам
Туп-тупхана лерхули
Лябкьуси — зулмукар кьам.
Хьунул адамти, дурхIни
Сахъли, хIерли лехIлири.
Дубурти гьужумлизи
ГьуцIдухъун сари-сарил.
«БекI дигалли, гьу — кьяшми» -
Къазакъуни бебшилри
Чула ламус-хIяялис
саби илди бершилри.
Вай кьасличил лябкьути
Къазакъ тайпала кьамла
КьапIализи чегахъиб
Багьадурта нушала.
Урчилизи бабгили
Хъусбяхъяхъили тупра
ЧеибхIели вебшибси,
Саиб ила ГIялира.
«Аллагь багьандан хIуни
КахIевшили шушкали,
Кавшаба ну тупангли» -
Иб къазакъли, мукIурли.
Тупанг биалри хIуша
Айахъутирив иша!
ХIушала ярагъличил
Сарра дургъути нуша».
Къазакъла шушкаличил
Къазакъла бекI чеббушиб.
МицIирли калунтани
Чули чус лягIнатбушиб.
УркIичеббирусири
Барх бургъути ГIялини.
Гьужумлизи ахъбурци
Багьадурти илини.
ГIялини тур-тупангли
Къирбирулри душманти.
Барх бургъули лебтири
Чумра сунела шанти.
ГIур мажарла хIярхIуби
КерхурхIели ГIялила
Шушкаличил вирхъули
КъегIбариб къазакъуни.
Душма сукъур хIярхIяли
ГIу жан асиб ГIялила -
Шагьидла бебкIаличил
ХIера алхи сай илра.
«Левсири ишкIун дила
Абзур ца гIяскарлизи» -
ЧедиберкIиб устазли
Някъ жаназачибадли.
Шантани мижитлизиб
Барибсири хIурматра,
Ярагъра сунечирли
ХIярикайхьиб ГIялира.
