Тулкни

Бакlиб ахир замана – пасадбиахъуб гlялам

Ахир заманала халкь, дунъяличи хъарихъур,

Вайси чули гlеббурцу, бархьси гьуни бархьбалта

Хlекьси гlеббурцнилизиб, илди бирар гlянцl-сукъур,

Бакlиб ахир замана – пасадбиахъуб гlялам.

Гlялимти ва жагьилти, дунъяличи хъямбикlар,

Уркlила цадехl дурцу, мухlли цархlилван бугьар,

Дунъяличи бахъ мяштlли, къагъли, гъапулли бубкlар.

Бакlиб ахир замана – пасадбиахъуб гlялам

Гlялимла гъайла хlергъу, насихlят вягlза хlергъу,

Бунагьуни дирули, жагьаннаб тIинтIбирахъу,

ГIязабти имцIадарес, хIярам-хIялал мас бурчу,

БакIиб ахир замана – пасадбиахъуб гIялам.

Дурхъати халкь бебкIили, кали леб вайти гIялам,

Цала гъай-мез цаличи, ардиху биру ламарт,

Бургу чули жагьаннаб, буцIарил цIала гIязаб,

БакIиб ахир замана – пасадбиахъуб гIялам.

Лазат кайсу, канилис, чархлис бирули къуллукъ,

Насабличи хъарихъур, гапбиру чула бекIахъ

Аллагьла гьуни балта, хIекьси амрула байрахъ,

БакIиб ахир замана – пасадбиахъуб гIялам.

Аллагь хIерикIул уркIи, бирахъули бахъ жярга,

Халкь хIербикIути чарх-бекI, дирахъули дахъ жага,

Лагъла уркIиличибси, Аллагьли ункъли бала,

БакIиб ахир замана – пасадбиахъуб гIялам.

ХIяпизхIяжила тулки, лер даршлим вецIну кIира,

ХIядис-аятла мягIна, касили далдушира,

Халкь пикрибухъаб или, чус насихIят бурира,

БакIиб ахир замана – пасадбиахъуб гIялам.

 Ил Шамил Валиюллагь рушбатуначил асиб

ВерхIелра къирантази Шамилла хабар дикиб,

Капуртала уркIбази, халал урехи дикиб,

Пачала солдатуни, сунечил къунахъбикиб.

Ил Шамил Валиюллагь рушбатуначил асиб.

ШаригIят кабизахъес, сунела хъябла асиб,

Вайличибси хьанцIа тур, арзили уратхIесиб,

Динул Ислам багьандан, халаси жапа чесиб.

Ил Шамил Валиюллагь рушбатуначил асиб.

ХIярхIубала дайлизи, арсланван ухIнаиркиб,

ХIила хIуркIби каили, кьаркьлуми кадиркахъиб,

Янсав-хIярхIя датурли, капурти гьарбулхъахъиб.

Ил Шамил Валиюллагь рушбатуначил асиб.

Расулулагьла гьуни, сунени марли буциб,

Аллагь кумеквирули, гьар мерличив гIевуциб,

ВерцхIерцеси мерличив, гьачамцун ахIи верциб.

Ил Шамил Валиюллагь рушбатуначил асиб.

Капур мунапикьуни, лебилра бахъ ахъбиуб,

Илдас мутIигIвакIили, гьеч къакъ чехIебаахъиб,

Сай вяхIчивизурхIели, капур, мунапикь руржиб.

Ил Шамил Валиюллагь рушбатуначил асиб.

Гъал-гъану шура дуслис, турличил гъаза бариб,

Москав пачала гIяскар, сунени мутIигIбариб,

Масличил исис или, пачали пикрибариб.

Ил Шамил Валиюллагь рушбатуначил асиб.

Илала муридуни, дунъяличи хъарахъиб,

Сайсули рушбатуни, капуртачи къакъбяхъиб,

КIарахъазиб алкунси, нурла чирагъ бишахъун.

Ил Шамил Валиюллагь рушбатуначил асиб.

Лерил аварла улкни, капуртачи чардяхъиб,

Гъунибла дубурличи, Шамилра чевяхIяхъиб,

Наибуни бершили, капурти абацIахъиб.

Ил Шамил Валиюллагь рушбатуначил асиб.

МутIигIварес дигули, халаси бусрав бариб,

Дила вайличибси тур, мутIигIхIейкIни саби иб,

Шагьидла бебкIа сархес, ва алхес пикрибариб.

Ил Шамил Валиюллагь рушбатуначил асиб.

Шагьид майруд бикIули, бахъли тиладибариб,

Сунела мугьажирти, жайчиб ахIерабариб,

Наб дигути багьандан, цIализи аркьулра иб.

Ил Шамил Валиюллагь рушбатуначил асиб.

Илавад дураухъи, сардарличи ватихьиб,

Някъ буцес хьулбикIули, вакилти гьала бакIиб,

Дурус агара или, някъ буцес кьабулхIейкиб.

Ил Шамил Валиюллагь рушбатуначил асиб.

Сардарли, - урусуни, абурхар викIулрив? - Иб.

-Урус пачала гIяскар, абурхар хIейкIира, - иб,

-Аллагьли хъарбарибси, барес пикри сабри, - иб.

Ил Шамил Валиюллагь рушбатуначил асиб.

-Пачала уркIиличир, къайгъи калахъунра, - иб,

-ГIяхIцад цIакьти хIурбуни, турли тIашаира, - иб,

-Туп-тупхана духIнарли, къалурби дехъубра, - иб.

Ил Шамил Валиюллагь рушбатуначил асиб.

-Чум-чумра генералла, хьунри бисахъира, - иб,

-ХIисаб багьхIебагьурли, гIяскурти алхунра, - иб.

-Мургьи-арц, хазна, давла, чуйна хъямдарира? - иб.

Ил Шамил Валиюллагь рушбатуначил асиб.

Дурхъа улка батурли, арукьес кьакьавакIиб,

Калунти мугьажирти, илдира язихъбариб,

Я Рабби Аллагь или, балга барес вехIихьиб.

Ил Шамил Валиюллагь рушбатуначил асиб.

Муъминти кьакьабакIиб, лебил бисес бехIбихьиб,

Шадлихъуни дирули, капурти булхъесбяхIиб,

 ГIяхIгъубзнала уркIбазиб, ухуси лами бишун,

Ил Шамил Валиюллагь рушбатуначил асиб.

Дагъистайчи бухъунси, шаласи берхIи буциб,

Игит гъубзнала турми, кьяртIайзир сигли дергун,

Шамилла тур ахъбуцес, цархIил гъабза ахIехъиб.

Ил Шамил Валиюллагь рушбатуначил асиб.

Капурти, давлачебти гъамбиуб, бекIдешдариб,

ХIядис, Кьуръан датурли, гIялимтани мас буциб,

Абадуллагь ахират, камил дунъялис бициб.

Ил Шамил Валиюллагь рушбатуначил асиб.

Саби акIахъуб аллагь, тIягIятлис кьабулхIериб,

Талхъан, узден хIеили, капуртас къулукъ бариб,

Чула узби-рузбиван, илдачил баришбиуб.

Ил Шамил Валиюллагь рушбатуначил асиб.

ХIекьдеш дигIянбирули, далкIти дакIудиахъуб,

Пакьиртачи зулмурти, дирули язихъбариб,

ГIядатла агьлу бархли, рушбатличи хъарахъиб.

Ил Шамил Валиюллагь рушбатуначил асиб.

Ламартла Дагъистайзи, Шамил гIур хьурахIейуб,

ХIябиб МяхIяммадличил, Аллагьли унра вариб,

Мадина шагьарлизиб, Бакьилизиб хIяб бариб.

Ил Шамил Валиюллагь рушбатуначил асиб.

Машрикь, магърибла ургаб, сай вебкIни якьинбиуб,

РяхIман Аллагьли зубри, лерилра хIунтIендариб,

Мусни-зубри диснила, гIяламат дакIубариб.

Ил Шамил Валиюллагь рушбатуначил асиб.