ГIяхIбаркьлис кири баахъаб!
ГIяхIбаркьлис кири баахъаб!
АхIерти узби ва рузби! ХIуша гIяхIси хабарличил разидарес къалабалира. КIел дус дурхъати мераначи зиярат барес бетхIеурти дагъистанлантас, ахирра ишдуслизиб хIяжлизи букьес имканбикIур. 2022 ибил дуслизир Саудунала ГIярабияли квотала мерани кIинали камдариб. Россиялис декIарбарибси квота хIясибли, хIяжлизи 11 318 адам букьес бирар, илдазибад 4550 мер дагъистанлантас дедибти сари.
Мурталра Дагъистанничи уркIи изуси Сулайбан Керимов гIяхIбаркьла баркьудлумачил декIарулхъуси сай. Буралли, илини гьалабра чуйнара хIяжлизи букьес имкан агартас путевкаби декIардарибсири. ХIера, иш яргалисра Сулайбан Керимовли 1000 дагъистанлан хIяжлизи бархьес путевкаби декIардарили, адамтала уркIби разидариб.
ХIяжликьянабани хIяж бирухIели, бусурмантала диннизир чараагарли дурадуркIути баркьудлумала (рукнурти) шайчир кункдешуни акIахъес ва аркьутас гьундурачиб урехи хIебиахъес багьанданра, Сулайбан Керимовли кьасбарили сай лебил адамти МяхIячкъалализибад бархьли Мадинализи урцуси самолетличиб бархьес. Сулайбан Керимовла гIяхIбаркьла путевкаби хIясибли аркьутас, гьанна цархIилтас кьяйда кIел бархIи автобусуначиб Мадинализи башес хIяжатдеш агара. Ил хIяжликьянабас дебали халаси кункдеш саби. Иличил бархбасахъи Дагъистанна Муфтиятли илис халаси баркалла балахъули саби лебилра динна Идарала бургала, хIянчизартала ва хIяжлизи аркьутала шайзибад. ЧевяхIсини илгъуна ахирагарси гIяхIдеш барнилис сунесра халаси кири баахъаб.
Илкьяйдали дагъистанлантала хIяж ахъси даражаличиб бетерхахъес багьандан, Муфтиятла сипта хIясибли, хьунул адамтала багьудила центр «Гьидаятлизиб» хIяж бирнила шайчирти масъултала чебкад гьала хили специалистуни хIядурбарибтири. Илди хIяжликьянабала кьукьначил хьунул адамтас кумеклис барх аркьути саби.
Ил тяхIярли хIяжликьянабачил собрание дураберкIили, илди кьукьначил аркьути руководительтани илдачил иргъахънила хIянчи дураберкIиб ва лерилра суалти баяндариб. Сенатор С.Керимовла путевкаби хIясибли аркьути адамти хурегличил гIеббуцили биъниличила багьахъур. Иличи че, лебилра цалабикибти хIяжла кьанунтачил (рукнуртачил) тянишбариб. Ахирличиб, насихIятуни дуриб ва лерилра хIяж бирнила кьяйдурти делкIунти жузи дедиб.
Наида Гъуруева
