Аллагьли ﷻ дурхъабарибти
Аллагьли ﷻ дурхъабарибти
ХIядисуназиб бурули саби бегIлара дурхъаси, бегIлара Аллагьлис ﷻ дигуси гIямал гIилмулизив учIни саби или. Идбагра ﷺ викIули сай: «ГIилму багьес къайгъибара, ил багьандан Китайлизи арукьес хIяжатбикалра». ГIилмула дурхъадешличила дахъал хIядисунира, Кьуръа аятунира лер. Илдачила декIарси бутIализир гъайъдикIехIе. ГIилму суннатлара лерти сари, гьар адамличир чертира лерти сари. Иш бутIализир гьар адамличир черти гIилмуличила бурехIе.
Исламла динна мягIна саби: шагьадат бурни, дехIбала дирни, дуббуцари бурцни, ахъри лебсини хIяж барни, закат бедлугни. Илди лерил гьар адамличир черли диъниличи мешули, илди дирнила жура, илди дукьдулъахъути секIалра дагьес гьар адамличиб чебла саби. Нушанира къайгъибирехIе декIардарили илдачила бурес. Илдачи мешули, гьар адамличир чулира дагьес, лебли биалли чула дурхIназира, чула хIерудилиубтазира, нушала Идбагличила ﷺ ва илала бегIтачила, насабличила, хьунрачила, дурхIначила баянти дагьахъес чебси саби. Илкьяйдали Идбаг ﷺ акIубси замана, мер, гьижра барни (гечвиъни), МигIраж (заклизи ахъуцили Алжана, жагьаннаб чедаахъни), Исраъ (дугила заманализив Байтуль-ХIярамлизивад аль-Акьсала мижитла укили, чарварили кибни) дагьахъес черти сари.
ИмцIали гIялимтани буруси хIисабли, нушала Идбаг ﷺ акIубси сай пилла дусла Рабиуль аввал базла 12 - личив. Идбагла ﷺ дудешлис ГIябдуллагь бикIусири. Идбаг ﷺ нешла канилав чумал баз виубхIели, ГIябдуллагь вебкIиб. Идбагла ﷺ дудешла шайзибадси дурхъаси насаб саби: « ГIябдуллагь, ГIядулмутIалиб, Гьашим, ГIябдуманаф, Кьусай, Килаб, Муррат, Каъб, Луайй, Гъалиб, Фигьр, Малик, Назар, Кинанат, Хузаймат, Мудрикат, Ильяс, Музар, Низар, МягIяд, ГIяднан».
Идбагла ﷺ нешлис Аминат бикIусири. Идбагла ﷺ нешла шайзибадси дурхъаси насаб саби: «Аминатла дудеш Вагьб, дудешла дудеш ГIябдуманаф, хала дудешла дудеш Зугьрат, Килаб». Идбагла ﷺ дудешла шайзибадлира нешла шайзибадлира насаб Килабличиб цалабиркули саби. Ил дурхъаси насаблизиб я дудешла, я нешла шайзибад халаси хIурматла бегIти ахIенти чилра агара. Идбагла ﷺ дудешхъалира нешхъалира бегIлара умутира, бегIлара дурхъатира саби.
