БалкIа галгаличила
Ца дебали балкIси ва биштIаси галга лебри. Ил саби жагали хIебиъниличи дебали зигарбикIулри, сенкIун мякьларти лерилра галгуби дебали ахътири ва жагатири. Илисра дигулри илдачи мешусили бетаэс, сунелара дягIлиур кьялуби жагали лапIардикIахъес.
Амма галга дубурла катругличиб тIашлири, илала мякьиби къаркъуби ургарти камти гIянжилизи дархилри. Илала кьялубазиб ва кIапIразиб бяргIибси дягI шятIбикIулри. БархIили ил савлицун сабри ванабируси, хIерейчибад биалли, шурмала гIела аркьулри ва цархIил шайчирти галгубас шалабикIулри. Галга халабаэс ва жагасили биэс ахъри агарсигъунари ва илини сунела талихIагарси кьисматличи лягIнатбушилри. ЦархIилти галгубачи кьясдешличил хIербикIулри.
Амма гьачам савли ил берхIила цаибти нуранани шалабарибхIели, илини удибси майдайчи хIеръили тамашабиуб. Илабад пергер, хIяйранвиэси, жагаси тIабигIятла сурат гьалабилзулри. Илабси жагадеш сунес алавти цалра галгалис чебиули ахIенри, сенкIун саби ахъдешличиб тIашлири. Гьалаб ил мякьларти жагати галгубачицун сабри хIербикIуси ва алавси цархIил жагадеш чехIебиулри. Саби алавти галгубас ил жагадеш гьаргбирули ахIенри. Галгалис гьанбикиб сунела гIямру илцадра вайтIа ахIенгу или, ва гьар савли ил жагадешличи хIербикIули, паргъатбиранбиуб. Шурмани ил дяхIилизибад ва миълизибад бихIулри. Сунела жагали ахIенси балкIа ар, чIумати мякьуби ва кьялуби агарли ил мерличиб мицIирли калес хIебири. Ил урхIмешуахIенси галга сунеласун жагасири, ва тIабигIятлизиб сунес декIарбарибси мер буцилри. Хъуммартидая, иш ванзаличибси тIабигIятлизиб гьар секIа сунес декIарбарибси мер лебси саби.
