ХIурмат-кьимат халаси
ХIурмат-кьимат халаси
Дагъистанна халкьанала цадешла БархIи республикала динна гьавкья, муфтий шайх ГIяхIмад – Афанди акIубси бархIиличи цугбикнилизиб халаси мягIна леб или гьанбиркули саби. Илини дагъистанланти цабиахъес кьасли, гIяхIти баркьудлумачи ва цала цали хIурматбирахъес жибирули сай. Дагъистаннис мардеш чедиахъули, илала халкьличила къайгъи дакIубирни ГIяхIмад-Афандини цайнацун ахIенри чебаахъибси. Республикалис бегIлара къиянти дусмазиб, динна гьабкьяби кабуршули, къачагъуни чебулхъули, регионнизир низамагардешуни дахъдикIухIели, бирхути бархьси гьунчибад чебхIебалкIахъес багьандан илини урехиагарли, гьавкьядеш сунечи чекасибтири. Илкьяйдали ишаб гьанбушес чебиркур илини пандемияла манзил адамтас гIеббиахъуси кумекра.
Гьаннара илала бекIдешлиуб динна идарали бамсриагарли дявила хасси балбуцлизиб бутIакьяндеш дирути бургъанти ва илдала хъалибаргуни гIердурцули, мекелли халаси кумек гIеббиахъули саби. ИшбархIи Муфтиятли халаси гIяхIбаркьла ва багьуди тIинтIбирнила хIянчира дурабуркIули саби.
Шайх ГIяхIмад – Афандини бузерила 25 дусла бухIнаб бегIлара гIяхIти адабдешла къиликъуни чедаахъиб. Республикала гIямрула гьарил шалилизир жигарла бутIакьяндеш дирули сай. Илини республикала бусурмантицун ахIи цархIилти регионтазибтира цабиахъес къайгъилизив сай. Исламла дин гьалабяхI арбукес багьандан илини халкьлис шуртIри алкIахъули сай. Хала бегIтачирад нушачи букьурли даибти динна гIяхIти гIядатуни тIинтIдирули, жагьилтас бархьси бяркъ бедлугули, хIяжатдеш лебтас кумекла някъ гьабурцули сай.
Муфтий шайх ГIяхIмад – Афанди мубаракварес имканбакIиб илала халаси хIурматбирути «Ас-Салам» газетала хIянчизартасра. МяхIячкъалаллизи бакIилри журналистуни Санкт-Петербурглизибад, Башкортостаннизибад ва цархIилтира шагьуртазибадра, районтазибадра.
«Ас-Салам» газета Дагъистанна миллатунала мезаначилцун ахIенну, дурала улкнала ва Росияла цархIилти регионтала мезаначилра, абзурли 13 мезличил дурабулхъуси саби. Илар динничилацун ахIи, жура-журала макьалаби дурадулхъути сари, ишбархIила гIямруличил дархдасунти ва аргъбаибти масъулти хIердирути сари. Буралли, илди газетабазир гьарил бусурмайцун ахIи, гIядатла адамлира челукьути масъултас жавабти даргес вирар. Газетала кумекличил берцахъибти адамтачила гьарли-марти анцIбукьуни дахъал сари. Халаси кьадри-кьимат лебси багьудлумала хазна нушала халаси Россияла гьарилти регионтази биуси саби ва бегIлара халаси тираж лебси саби.
Шайх ГIяхIмад-хIяжини цалабикибтази сунела гIямрула гьунчир детаурти анцIбукьуни гьандуршули буриб: «Ну имамли узухIели, вягIза барес гьалаб, бабзаси вягIзурбала жуз касили, чуйнара сабирхъусири, нуни гIяхIил балуси декIарбарес ахIи, набчи лехIирхъутас мягIничебси тема баргес багьандан. ХIушанира кьасбиреная хIушала газета бучIантас пайдаласи, чараагарси, мягIничебсицун газетализи кабирхъес». Илкьяйдали Идбагла ﷺ хIядисуни гьандуршули дахъал цархIилтира пасихIти пикруми ва вягIза-насихIят дуриб.
Башкирияла мезличил дурабулхъуси газетала редактор Зульфия Хананова сунела хIянчизартачил ракIилри. Илини сунела бархкьябачил бируси хIянчиличила буриб ва савгъатлис муфтийлис варъа пешкешбариб. Цалабикибти журналистунани ва литературный редактортани бузери секьяйда гьалабяхI аркусил сагати пикруми гьаладихьиб. Сунела пикри бурули литературный редактор Юлия Зачесова рикIар: «Ну разилира нушала автортани бални, нушала бучIанти ца шицуна ва Дагъистанцуна хIебиъни. Илди саби лебил Россиялизибадти миллионти бучIанти, нушачи мешули ахIенти декIар-декIарти регионтазибадти. Илди саби Ханты-Мансийсклизиб, Хабаровсклизиб, Владивостоклизиб, Москвализиб, Мурмансклизиб, Калиниградлизиб ва улкала цархIилтира регионтазиб хIербирути гьар журала адамти. ХIера илдасра нушала газета гIяхIбилзес гIягIниси саби. Ил багьандан нушаб чараагарси саби илдала хасдешуни хIисаблизи кайсес».
Газетала редакциябала хIянчизартала шайзибад ГIяхIмад-хIяжи ГIябдуллаевлис камли къаршибиркуси Кьуръан савгъатбариб. Ахирличиб лебилра эркинси кьумур-алав жибариб. Марлира, ил цадешла бархIили лебилра регионтазибадти журналистунира цабиахъуб.
Рирхулра ишбархIи кьяйда ГIяхIмад – Афандила шайзибад нушани мурталра икьала-кумек чебиъниличи. УркIи-уркIилабад илис чIумаси арадеш, баракат, даршудеш ва ЧевяхIсила разидеш дулгулра.
