Хьунул адамтала мажлисуни
Ахъушала район
Арбякьунси базлизиб Дагъистан Республикала Муфтиятла шайчибси Ахъушала районна хьунул адамтачил бузуси багьудила отделла бузери дебали жигарчебсили бетаур. Районна шимазир дахъал далдуцуни детерхур, сарира нушала дурхъаси МухIяммад Идбаглис ﷺ хасдарибти. Илди далдуцуни – мавлидунала сиптакарли риуб хьунул адамтала багьудила отделла руководитель Анисат ГIябдулатIипова. Илини шимала хьунул адамтачил дарх мавлидуни дурадеркIиб, илкьяйдали хьунул адамтас чараагарли дагьес хIяжатти баянтачилра тянишбариб. Илала дурабадра дявила хасси балбуцлизибтала нешани ва хьунри пикрила дураб хIебатур. Илди шими сари: Ахъуша, ХIинтIа, МулебкIи, ТIантIы Усиша, ТIебекмахьи, Куркеби, Цугни, Зилмукь, Ургани, Балхъар. Далдуцуни разити аги-хIяйзир детерхур, суалтала викторинабира дархли. Ахирличир лебтанилар балга-дугIя дариб.
МяхIячкъала
МяхIячкъалализиб гьалабван Дагъистанна Муфтиятлизи кадурхути хьунул адамтала багьудила «Гьидаят» центрла, къиянти аги-хIяйзи бикибти хьунул адамтас хасбарибси «Марьям» центрла ва хьунул адамтала багьудила отделла сипталичил «Кегель-бан» заллизиб балбуц бетерхур. Ил хасбарилри дявила хасси балбуцлизиб бутIакьяндеш дирути бургъантала хьунул адамтас. Балбуцличир зайдухъун нашидуни, мавлидуни, зикруби. БучIантани сценкаби чедаахъиб. Ила жибарибти бургъантала хьунрас ва нешанас имканбакIиб чула децI бутIес, сабигъунти хьунул адамтачил тянишбиэс. Дагъистаннизиб бузуси «Нешанала цIакь» бикIуси организациялис бекIдешдируси Сафижат МяхIяммадрасуловани илдигъунти далдуцунани хьунул адамти цабирахъниличила буриб. Ахирличиб нушала бургъанти чедибдешличил хъули чарбухъахъес балга-дугIя дариб.
Избербаш
Ишди бурхIназиб Избербашла бекIлибиуси мижитлизиб мавлид дураберкIиб. Ил хасбарилри дявила хасси балбуцлизиб бутIакьяндеш дирутала хъалибаргунас. Илабси мадрасала мугIяллимтала кумекличил бургъантала нешани ва хьунри жибарили, мавлидуни, зикруби, салаватуни делчIун. Дургъби къалабали тамандиахъес балга-дугIя дариб. Балбуцлизир жигарла бутIакьяндеш дариб Зугьра Адзиевани, Раисат ГIямаровани, Аминат АрслангIялиевани, Марьям ХIяжиевани, Луисат Кьадиевани, Рукьият Кьурбановани ва бахъал цархIилтанира. Илдачи гIяхIладли ракIибси дарган мезличил дурабулхъуси «Ас-салам» газетала редактор Наида Гъуруевани хьунул адамтачил ихтилатбариб. Адамтала гIямрулизиб газетала кьадри-кьиматличила буриб. Ил бархIи цагьатIи разиси анцIбукь бетаур. Мадрасала бучIантала кумекличибли мугIяллим Раисат ГIямаровас гIумрализи путевка савгъатбариб.
Наида Гъуруева
