«Аллагь ﷻ багьандан ригахъусири»
Нушала диннизиб дебали хIяжатси секIал саби хъалибарг. Хъалибаргла ургабси дигира марлира Аллагь ﷻ багьандан биалли, цIакьси се биэс бирара или гьанбиркур.
Мурул-хьунулра гьар секIайзиб Идбагла ﷺ гьуни буцили вяшбикIалли, Аллагь ﷻ багьандантили детарар илда дигира. Дахъал хIядисуназиб амру бирули саб мекъ бирахъес. Мекъла дурхъадешра дебали халали бурули саб. Сецад халаси къайгъи бараллира, мекъ хIебарибсила, мекъ барибсилайчи гIибадат ва даража ахIебиркниличила хIядисуназиб бурули саби. Саби асубирутазибадли бетаурси, амма бегIлара дебали Аллагьла ﷻ гьими алкIахъути баркьудлумазибадли саби мурул-хьунул декIарбиркнира. ИшбархIира делхъути хъали-цIа имцIадикIалли ахIи, камдикIули ахIен. ДекIарабикес дигути, яра мекъ барес хьулбикIути адамтас дарсли биахъес ца хабар бурехIе.
Жагьилти, базла шалаван жагати урши-рурси мекъ бареси заманаличи абаиб. Магьарла гьунили илдала кьисмат цабариб. Жагьилтала иманчебси, Аллагьличи ﷻ дигичебси, саби-ургаб дигили бицIибси, чебаибсила хIяздухъеси хъалибарг бетаур. ЦархIилти кьяйдали, жагьил мурулра, сунела хъалибарглис яшавбарес дураухъес хIяжатбикили арякьун. Хьунул хъали бихIули, сунела мурул чарухъайчи хIерлири. Аллагьлира ﷻ Сунес дигахъутас сари балагьуни дурхьути. Хъулирси хьунул, хIилизи вай изала бикили вайтIарикиб. Изай жагьил рурсила кьаркьала барсбиахъуб ил рухънараибсиван каризур, сари биалли мицIирли калун. Ил жагьил рурси сари или буралри чилра вирххIери. Ил 70 дусла гIямруличи араибсиван каризурлири. Муруйчи ил хабар баахъиб. Сунела хIянчира таманбарили, хъули чарулхъуси мурул, бехIемцIлизи викили, хIулбала шала бетахъиб. Муруй-хьунуй дарх гIяхIцад разити, жагати гIямру деркIиб. Амма сегъуналра хъули бебкIала замана хIебакIили кахIевлан. Илдачира бебкIала сягIят сабаиб. Рухъна ухънас гьалар ахиратла хъули аррякьун. Ухънани сунечил дарх гIямру деркIибси хьунул хIяририхьиб. Халкь хIябрачибад чарбулхъухIели, иличи ца жагьил адам гъамвиубли, хъули арукес кумекбарес гьуцIухъун. Ухъна илизи викIар: «ХIу укьен дила урши, хIу Аллагьли ﷻ баракатла вараби, нуцунра хъули чарухъес бажардивиркус». Тамашавиубси жагьилли хьарбаиб: «Хала дудеш, хIу сукъур сайригу, хIела кумекчира гьатIи чархIерухъесли аррякьун, хIуцун секьяйда бажардииркуда?». ИлхIели ухънани гьарил адамла хIулбазирад биса дурадухъахъести гъай дуриб: «Ну сукъур ахIенра дила урши, я сукъурли хIейраси дила гIямрулизив. Дила хьунул вайси изай рухънараахъибхIели, нуни ил набзирад урузхIекIахъес или сукъурла гIердарибтири. Марлира, наб дила хьунул Аллагь ﷻ багьандан дигахъусири, нуни иличил дарх жагати гIямру деркIира…»
